ILP check uluk a ngai tak zet
Mizoram state hung bik kan nihna angin phai vaiho duh duha an lo luh lohna turin Inner Line Regulation kan nei a, kan vannei hle. Hetih lai hian, ILP hi kan thei sem mah mah em aw tih tur a ni. Mizo bawk hian dan kan bawhchhe fo mai a, kan harh thar a hun ta hle.
Tun hnai khan Chief Minster hoin mi pawimawhte'n ILP chungchang an sawiho a, eng ang takin nge kalpui an tum erawh a hriat mai rih lo. ILP hi khuahkhirh deuh deuh a ṭul niin a lang a, chu chu an sawiho pawimawh tak ni pawhin a lang. Hnam dang ILP nei ve si, an hnathawh tur ang ni loa khawsa an tam ta viau. Hengho hi a hnawk chho zel tur an ni a, en uluk a ngai viau a ni.
Sairang thlengin rêl a lo lut mai dawn a, hetah tak hian Mizote bawk hian sumdawnna kawngah hnam dang kan thurualpui nasa dawn hlein a hriat nghal mai. A bik takin kan hmeichhe ho bawk hi hnam dang thurualpui tam an ni. Hengte pawh hi kan en uluk tur chu a ni ang. Ka ziak fo tawh a, hnam dang phalna (trade licence) nei lo sumdawng, bungraw rawn phura Mizote zawrh aia tlawma rawn phur lut an tam ta viau mai. Hengho pawh hi check deuh a ṭul a, Taxation department tihchak zual a ngai hle.
ZPM a sorkar tirh khan Home Minister khan Vairengte Police gate-a motor lut a piang hnena pawisa an lak kha a titawp hmiah mai a, kha khan he gate duty-te rilru a tihnual viau tih mit ngeiin kan hmu tawh. An hlawh bak ei tur an lo fanghmano ei hmiah hmiah kha a tawp tak avangin an duty pawh an in thlahdah phah hle tih hriat a ni. Gate duty-te hi uluk zawka enfiah an ngai.
Chutihrual chuan, Mizoramin ILP kan neih hi state lian leh hausa ho chuan an duh lo viau a, hmânah pawh Parliament-ah putluh a nih tawh kha. Khatih laia kan MP huaisen Pu Hiphei khan thiam takin a do lêt a, chuvangin, sawi rik a ni leh ta rih lo. Sawi rîk a nih leh vaih chuan kan ILP hi an hlip mai ang tih pawh a hlauhawm hlel lo e. Chuvangin, ILP hi fimkhur taka kenkawh a ngai a ni.
Tunlai hian hnam dang car leh a aia lian deuhte Silchar aṭangin an rawn lut nasa em em a, eng nge an rawn tih ber hriat si loin an insûlpêl reng mai. A ṭhen chuan sumdawnna bungrua an phur a, a ṭhen chuan man chawiin mihring an phur tih a hriat. Hengte hi hmehmih vat a ngai a, sorkar kut tihchak a ṭul ang a, NGO hrang hrangte pawh an fimkhur tak chung sia an chet a ṭul ta tak zet a ni.
MZP-te hi hnam hmangaih tak tak an nih chuan hnam dang dawrkai leh supplier-te leh contractor-te hnen aṭanga tukluih donation khawn anga an sawi pawh hi inenfiah ta se, dan mumal loa hnam dang rawn sumdawngte leh an permit neih ang loa hnathawkte hi chhui chhuah hna han thawk se a lawmawm ngawt ang. Ṭhalai tha chakna la nei rualho hi Mizo hnam chhan turin kan mamawh a ni.
- Lal Rinmawia