MUHCS leh private hospital
Mizoram Universal Healthcare Scheme (MUHCS) kalpui mek a ni a, mipui nâwlpui chuan ṭha an ti tlangpui niin ka hmu. Opposition party, a bikin MNF leh Congress te chuan sawisel tur an lo zawng ngar ngar thung. MUHCS hi ṭha ka ti a, duhkhawp loh erawh ka nei, chu chu Mizorama private hospital tam bera a hman theih tlat loh lai hi a ni.
Tlem lai deuh khan kan venga mi pakhat chu zai a ngai thut mai a, Civil Hospital-ah hian an zai nghal mai thei si lo. Private hospital-ah zai nghal thei mah se, MUHCS hman lohna a nih avangin inzaina man to ve tak chu an bill thei dawn si lo, an buai ru hle. Zai vat a ṭul si avangin private-ah an zai ta niin ka hria. MUHCS-a inziak lut ni mah se, an pawisa sên erawh an bill thei lo.
MUHCS hnuaia sawrkar damdawi ina enkawlte senso ang ang chu sawrkar hian a pe ṭha rih viau niin a lang a, an sawi danin. Tun dinhmunah chuan an pe nghal zung zung a, hei vang hian sawrkarin damlo tana pawisa pek lâwk ngai lo (cashless) a tih hi a rintlak riau. Chuvangin, private hospital-te pawh hi ṭang tlat lovin, MUHCS hi tuna a nih ang hian pawm ve tawh mai se a duhawm ngawt mai.
Sawrkar pawh a inpawh fân ve a ngai tho. Cashless an ti a nih chuan sawrkar damdawi inah chuan cashless-a kal mai tur a ni a. Sawrjkar damdawi ina cashless-a an kal hi a ṭha tawk em em a, private hospital-ah chuan cashless ti lo pawh ni se a ṭha viau tho lo'm ni?
Cashless-a an kal hian damlo ten pawisa chawi lovin an chhuak leh mai a, damlo enkawlna senso chu damdawi in ten bill siamin, sawrkarah (Health Care Society-ah) an thehlut a, Society chuan sawrkar damdawi in hnenah a lo pe zung zung mai niin a lang.
Private hospital-ah cashless lovin MUHCS kalpui ni ta se, damlote'n inenkawlna senso damdawi in hnenah an pe ang. Damlote'n bill siamin, sawrkar (Healthcare Society)-ah an thehlut ang a, Society-in damlo hnenah pawisa a lo pe ve thung dawn tihna a ni mai a. Cashless-ah Society-in damdawi in hnenah pawisa (bill) a pe nghal zel thei a nih chuan, cashless ni lovah pawh damlo hnenah pawisa a pe zung zung thei tho dawn tihna a ni. MNF leh Congress sawrkar laia damlo hnena bill hun rei tak tak an batsak vanga harsatna ang kha damlote'n an nei tawh dawn lo tihna a ni.
Damlo hnena bill pek nghal zung zung a nih chuan cashless a nih loh pawh hian damlote tan a ṭha tâwk em em tho. Sawrkar hian uluk zawkin ngaihtuah se, mipui nawlpui ṭhat tlanna tur zawk a nih chuan private hospital tan chuan cashless ti ngut kher lo se a ṭha hle âwm asin.
MUHCS hi private hospital ten an hman ve ngei theih nan sawrkara hotute leh private hospital pawlte hian hma an lak vat vat a ngai a. Sawrkarin healthcare scheme a kalpui chhan chu mipui tan a ni a, mipui nâwlpuiin an hman theih nan insiam rem thiam a ṭha. Sawrkar damdawi inte'n min dâwl lo tih kan hre tlang vek a, mipui hian private hospital-te hi kan mamawh a, kan la mamawh zel dawn. Mipui ṭhat tlanna atan ngaihdan leh kalphung thlak ngam hi a huaisenthlak ve tho a nia.
- Zoramchhana