Ṭawngṭai Bethel Camping Centre leh a kaihhnawih

Ka hmuh dan leh ka thlir dante ka rawn thlasik mau puahpui ve phawng phawng dawn a ni e. A hmasa berah chuan ṬBCC dintu Pu TT Zohmingthanga hi Pathian in theihna, finna leh chakna a pek ang tawkin theihtawpin ruihlo ngaite enkawl hna a thawk a ni tih leh insiam ṭhat a ngaihna laiah pawh a insiam ṭha ve ṭhin tih hi i hmuh hmaihsak lo ang u.

Mizoram Societies Registration Act, 2005 hnuaiah a inziah duh loh chhan leh Central Government Funding Agency hnuaiah grant a dil duh loh nachhan hi eng dang ni lovin, Pathiana innghat tawpa Centre hi enkawl a duh a. Tin, kum tin dâwt tel miah lova Financial Report leh Annual Report siam ziah tur hian theih loh tluka harsa a nihzia chu kei aiin MSR 2005 hnuaia inziak luta Ministry of Social Justice & Empowerment hnuaia grant dawng ṭhin home enkawl NGO-te hian an hriat chian zawk ka ring.

Khawvel dana kan mithiam neihte (doctor, psychologist, psychiatrist)-te zir chhuah danah chuan ngawlveina (addiction) hi dam chhung daih leh dam hlen tak tak theih loh tih a ni a. Holy Bible-a Luka 18:27-ah erawh chuan, “Mihring tih rual loh hi Pathian tih theih a ni,” a ti a. Chuvangin, Isua Kristaah chuan kan dam thei (Ka u fapa ngei pawh hi he thu vang hian a beidawngin a nun hial kan chân phah ṭep a, ṭawngṭaina zarah a nun hi inlamlet theihna hun nei turin Pathianin min la zuahsak a ni).

India dan hnuaia inziak lut rehab hrang hrang, hospital leh home-ahte lut kualin ka dam zo lo va, khawvel dana hmuhsitawm aṭang hian ka dam miau a. Heta ka hriat chhuah tak chu, 1 Korinth 1:21 “Pathian finnaah chuan, khawvêlin finna hmanga Pathian an hriat theih loh hnuin, thuhril âtthlâk hmanga a ringtute chhandam chu Pathianin ṭha a ti hle si a,” tih leh, 1 Korinth 1:27-28 “Nimahsela, Pathianin khawvêl thil âte chu a thlang zâwk a, mi fingte chu a tihmualpho theihna tûrin; tin, Pathianin khawvêl thil chak lote chu a thlang a, thil chakte chu a tihmualpho theihna tûrin; tin, khawvêl thil chhia leh thil hmuhsitawm te, thil awm lote nên lam Pathianin a thlang a, thil awmte chu eng mah lova a siam theihna tûrin,” tih thu hi fiah takin ka hrethiam ta a ni.

ṬBCC-a enkawl mi tam zawk hi Pathian thuah pawh a ruh lang râwta sawi chu sawi loh, a thlîng hlang ei tur pawn heti lai chu a dum a kai, ka ei duh lo tih tur ang khawpa Pathian thu duhtui te, mihring siamṭhat nan khawdur a ngai tih chu sawi loh, ṭêk pawn a tihharh zawh hleih theih lohte kan ni tih hi hai rual a ni lo.

Pu Zohmingthanga hian a finna, theihna leh thiamna ang tawka Pathian rawng a bawlna hi a tiṭhuanawpsak zawng ni loin, fuih leh zilh a ngaihna a zilhin i ṭanpui tlang zawk teh ang u. Holy Bible-in min hrilh angin, “Hmangaihna chauh lo chu tuma engmah ba suh u,” a tih anga Pu Zohminga/ṬBCC a kal zel theih nan leh, ‘Rules & Guidelines zawm ba lova’ a thawh zawm theihna turin healthcare facility ngai pawhmawhte chuan sorkar, mimal, CYMA emaw kohhran ang zawngin emaw, medical professional-te rawihsakin, ṬBCC hmunah deputation/posting hi i siamsak zawk mai ang u.

Kan Zoramin Pathiana innghat tawpa ngawlveite enkawltu kan mamawhna a nasatzia chu hre chiangtu kan ni tlang a ni lawm ni. Tuna ṬBCC-a awmte an chhuah darh hma pawhin Synod-in ruihhlo ngaite puala camping a siamah pawh sang chuang an lut a ni a. Tun dinhmuna chhungkaw harsa tak tak, ngawlvei kawlte dinhmun hriatthiampuiin, Guidelines leh Rules and Regulation ang diak diaka inenkawlna hmunah hian kan mamawh min phuhru zo rih lo a nih hi i pawm ngam ang u.

A tawp berah chuan, ṭawngṭaina nena kan ram tana ṭha ber tura roreltute’n ro an relthiam theih nan Pathian rinchhana home din a, MSJE hnuai a ni emaw, funding agency rinchhan kher loa an kal theihna dan hran roreltute’n an siam theih nan leh, an puala dan hran hnuaia recognition an neih theih nan Pathian hnenah i dilpui ang u.

- Mala Ralte, 9366308152