Lirthei dan leh dan/thupek kenkawh
India ramah hian lirthei leh lirthei khalh chungchangah dan ṭha tak kan nei a, chungte chu mipui nâwlpui ṭhatna leh himna tura pawimawh tak tak a ni. Lirthei chungchanga India ram dan hi Mizoramah pawh hman a ni a, Mizoram chhung bik tana dan hranpa pawh a awm a ni awm e.
Tlem lai deuh khan min tâwk zawnga tlan scooty pakhat khalhtu hian scooty khalh pahin a phone a khawih mawlh mawlh a. Kan inhnaih tial tial a, min hmu thut a, a kâwi zawk a, a tlûk phah lêm lo.
Hmân deuh lawk khan Pathianni tlai thim thet thetah hian Bawngkawn-Chaltlang kawng chhovah kan tlan chho a, lirthei a tam reuh phian avangin tlan chak viau theih a ni lo. Ka hmaah chuan bike MZ-01 S-XX36 hmangin traffic police pakhat, an uniform (t-shirt) ha a tlan chho ve bawk a, a bike-ah chuan exhaust pipe (silencer) ring chi vuah a ni a, tlan chho zingah khan a thâwm a ring bik hle!
Traffic Police hotute'n exhaust pipe ri ring vuah phal a ni lo tih thupek an chhuah fo laia traffic police berin ri ring chi a vuah tlat si kha a inhmeh lo a; ani kha chuan exhaust pipe ring chi vuahte a man lo tawp ang. Dan leh thupek kengkawhtu turin langsar taka a pute thupek chhuah a bawhchhia kha a huaisar ngawt mai!
A hnu deuh lawkah Bawngkawn-Chaltlang kawng chhovah tho hian ka hmaa tlan taxi–sticker 'C' bel khalhtu chuan dashboard-a phone a dahah chuan games a khel mawlh mawlh pek a! Games khel na nâ nâ chu a tlân chak thei lo a, a chângin a kawi leh zawk ṭhin. Tlan pelh dawnin, min tâwk zawnga rawn tlan an awm ve reng bawk si a, remchang a awm mai lo, a ninawm duh hle. Lirthei khalh chunga games han khelh zet hi chu a him lo tak zet.
Traffic police hotute hian lirthei, a bik takin two wheeler-ah exhaust ring chi vuah phal a nih loh thu te, lirthei khalh laiin phone hman phal a nih loh thu te an puangzar fo a; khap a nih thu hriattirna an lo tichhuak fo tawh. Mahse, hengte hi a rêm thei chuang lo.
Mizote hian lirthei chungchanga dan hi kan va ngai pawimawh lo hlawm tak. Mipuiin kan ngai pawimawh lo va, dan kengkawhtute lamin an ngai pawimawh tak tak chuang bik hek lo. Kan ram Mizoram hi dan lalna ram, dan ngaih pawimawhna ram a va la ni har dawn tak!
Mipui hian a remchânna lai apiangah dan bawhchhiat a, dan lova thil tih kan tum a, dan kengkawhtute lahin ṭha taka dan kenkawh an tum bik hek lo, an enliam mai mai a ni ber. Hei hi a chianna chu, lirthei chungchanga dan anga thupek leh hriattirna an chhuahte'n zawm a hlawh lohzia aṭangin a chiang.
Dan leh thupek kengkawhtute'n an kenkawh ṭhat miau loh chuan mipui tan chuan mahni awlsamna, nawmsakna leh duh dana thil tih mai a awl ṭhin. Dan kenkawh ṭhat ni se, dan lova thil tite mana hrem hmak hmak zel ni se chuan tun ang em em hian lirthei chungchanga dante bawhchhe ngam an tam lo tawp ang le.
Mipuiin dan leh thupek kan ngaih pawimawha kan zawm ṭhat a ṭul a; dan leh thupek kengkawhtu lamin an ngaih pawimawha ṭha taka an kenkawh a ngai bawk a ni ber e.
- Lalduhmawia