Sum duh kan chhiatpui
Kan Bible chuan, “Tangka sum ngainat hi sual tinreng bul a ni,” a lo ti a (1 Timothea 6:10). Ro phûm rûk zawngtute hi ngaihtuah ila; a tirah chuan an inthurual hle ṭhin a, hmu hnai deuhva an inhriat aṭangin an in îtsîk ṭan a, an hmuh chiah chuan an insual a, an inthat deuh ngei ngei ṭhin. Hei chiah hi Mizoram tlukchhiat mekna chu a ni.
Ministry kan neih tawh zawng zawngin mipuite hi ei bâr thar chhuah aiin sum thar min zirtir a, sum zawngin kan phe suau suau mai zawng a nih hi. Sum zawn chu inîtsîkna, inrinhlelhna, inbumna, insual buaina a ni a, chu chiah chu kan rama thleng mek hi a ni. Tuna kan rama thil thleng mek, eiruk, kuhva tawlh rûk, ruihhlo pung, kurtai siama fu hertute’n chini tam tawk an pawlh te hi eng dang vang mah a ni lo, sum zawng veka kan insiam vang chauh a ni.
Kan ram zîm têah hian kan ei leh bar tur thar aiin sum thar kan inzirtir uar a, thil hlutna rêng rêng sum vekin min tehpui a; thlai ching tura min tih rêng rêng chu sum tharna tur vek a ni. Kan hotute mi ramah an zin a, mi ram changkang tawhin an chin, an lo hlâwkpui tawhte min chintir ve zel a. A hlâwkna kan thlen hmain lal dang an zin leh a, a dang an rawn hâwn leh a; eng hlâwkna mah tel lovin kum tam kan hloh ta.
Kan ram tihchhiat hlauvin tlang loneih min sawi hnâwmpui a, sum chang thlai dangin kan thlak a. Sum chang thei a nih phawt chuan, ram tichhe thei chi kan pawisa leh hauh si lo. Hmunphiah chîn te hi sawichhiat ngam chi chu a ni lo vang, mahse, a chintawk kan neih loh chuan kan ram tiphûltu a ni mai ang tih ka hlau hlel lo ve.
Tunah chuan, kan buh chìnna ram neih ve chhun leilette pawh sum chang thlai dawnfawh leh thil dang chin nan kan ît thar ta zel a. Ei leh bar tharna ram kan tizîm tual tual a, kan kum chanve ei pawh kan thar mumal ta lo. Mi ṭhenkhat chuan buh ringawt ni lo ei kan inzirtir a ngai a ni, an ti a; a dik khawp mai, mahse, kan ram chhunga kan thar chuan si loh chuan awmzia a awm chuang lo. Mi dang lehte chuan, ‘Buh thar a ngai lo, Myanmar-in an thar tam lutuk, kawngpui an zo ṭêp alawm,” an ti.
Sawrkarin ramri hrûlah kawngpui an siam tluk tluk chuan ramin ven him a ngai zual tih hriat tur. Nakin lawkah an kawngpui siam ngil thui laiah jet fighter a rawn ṭum chhin lo vang tih kan sawi thei lo. Ramin harsatna a tawh chuan ram chhunga ei bar thar nei lote hi a tuar nasa zual tur chu kan ni mai. Sum zawn ringawt kan inzirtirna hian mi rethei leh in leh lo nei lo nasa takin a tipung a ni. Kum chanve ei tal pawh thar thei turte pawhin tih an tum tawh lo. Sum zawng bawkin an buai a, chumi atana awlsam, ruihhlo zuar kan tam phah a, jail lamah kan khat ṭûn mai a nih hi. Uluk takin i ngaihtuah nawn teh ang u.
- Commissioner Lalkiamlova