Mi ho tak chu

Thuhmahruai

Mi ho tak chu, han tih ngawt mai chu eng nge maw ni le, a va ṭul teh chiam lo ve aw, kan ti mai thei. Nia, ṭul vak lo, sawrkar, khawtlang, inchhung khur pawh khawih pha mang lo a ni. Hetih lai hian mihringte, inang lo tak tak, chi hrang hrang kan ni hlawm bawk a, ṭul leh ṭha kan tih pawh a inang lo thei khawp ang. Chuvang chuan, ho kan tih zawng pawh a inang lo thei hle ang.

Mizote Kristian kan ni a, biak in ringawt pawh a lo ṭhahnem ve viau ta mai. Hengah hian a hruaitu chi hrang hrang kan awm leh a, mi pangngai deuh chin chu pawimawhna tak tak nei deuh vek kan ni awm e. Tun hma anga zu in luih luih, cowboy tak ang chite kha kan awm ta mang lo. Amaherawhchu, patling tei mai mai, nupuite thawh chhuah sa ring erawh kan tam, inṭhen nikhua pawha mipa zawk chhuak ta hnuang hnuang sawi tur kan nei ta nual mai. Kan khawtlang nun pawh a letling thawk kan ti dawn nge, mipa thi lah chu kan tam tawlh tawlh mai bawk.

Mihring

Mihringte hi eng atana siam nge kan nih ve aw, eng nge ni kan tum (goal) ve ber hi? Kan lo piang ang a, kan tarthi leh ṭhin ringawt mai dawn em mi? Ran, ramsate anga hmasawn chuang lo, kual kual ve ṭhin ringawt ang kan ni ve em aw? Hei hi chu a ni chiah lo. Kan hriat ṭheuh angin vawiinah chuan hma kan sawn leh lutuk zawk lek lek emaw tih mai tur a ni. A finfiah nan internet lama thlalak hlui nen khan han khaikhin mah the; lungte pawh a tileng rum rum thei zawk a ni. Nakin zelah phei chuan kan khawvel chu eng ang tak la ni ang maw. Eng vanga hetia hmasawn zel thei bik nge kan nih le, kan vanneiin a ropui hle mai.

Bible-ah chuan mihring rilruah chatuan a dah a ti. Hetia kan ropui viau lai hian tu pawh mai hi kan lungphu a tawp chuan kan ho ve dêr chu a ni mai. Mitthi vuinaa titi pakhatah chuan, keini pawh eng tik ni emawah chuan kawng kal ṭhenkhat chuan, ”E, khu, mitthi an awm a nih khu an la rawn ti ve ang a, eng nâ nge maw ni dawn le, an van tam em em, an va tlem em em, an la rawn ti ve ngei ang. Min vui ni tuk tuk leh vel aṭang chuan dan pangngaiin thil a kal leh vut vut tawh mai dawn a ni.

Ho tak chu

Kan thawhpui pakhat chu ka hriat theih chinah a tlangpui thuin office hi chawhnu dar 1/2 velah a lo thleng ṭhin; nuihte pawh a za deuh roh zawk. A ni zawng, hrethiam ang, kan ti ve a, rilru tê têin. Hetih lai hian, ṭhenkhat han tlai ve hlek, haw hma ve hlek an hmuh khan, hniak phawi lek lova dâwt sawi, an tih ang khan sawisel bawrh bawrh a, mak ka ti hle mai. Mahni pawh engmah ni si lo, engtin nge a sawi theih chu aw ka ti deuh. Mihring hi a lo hoh theih viau mai. Mahni ek ei pawh tluk loh chang kan lo nei ve fo ṭhin dawn a lo nih hi.

Pathian thu sawi thiam takte pawh hi a tam zawk chu mi dangte tih atana sawi, nunpui bik chuang lo kan nih hmel hlawm. Tihdam rawngbawlna, a lema lo ti ṭhinte pawh foreign ramah chuan an lo awm ve zauh ṭhin, an ti; buaithlak. Mizotena sapṭawng kan ngaisang lutuk hi a buaithlak ka ti. AIR, Aizawla an kawmna ka ngaihthlak pakhatah chuan tlar khatah (sentence) a chang phei chuan Mizo ṭawng a tel ve zauh zawk hial a ni.

Pangngai tak chu

Kan la hre ṭheuhin ka ring, khawvela ram thil ti thei leh chak em em chuan an ram a rawn rûn dawn a, ramri-ah ralthuam hlauhawm leh chak tak tak a inchhawp rup mai. Anni chuan an puakrang mu round 2/3 vel bak sipaite’n pai tur pawh an nei lo a, an dinhmun chu a chau hle mai. Hmelma tan chuan bêl chhung sa an ni ringawt mai. Khawvel ram lian leh chak bera an hruaitu chuan a lo hlauhthawnpui ve hle a ni ang, tlanchhe tawh mai rawh, an ti hlum ang che tiin a sawm a. Keini chu ni ve ta ila, a rang a rangin kan tlanchhe duh nghal mai thei. ”Ka tlanchhe dawn lo, silaimu ka duh,” tih chu a lo chhanna a ni.

He ṭawngkam aṭang hian khawvelin a hmuh dan chu a inletling thawk ti ila kan tih sual ka ring lo. Van aṭang khian Pathian pawhin a hmuh hmaih bik lo a ni ang, vawiinah chuan khawvel ram hausa ber ber leh thil ti thei berte chuan i kiangah kan ding tlat dawn, pawisa pawh i duh zah zah, hmelma hian a tawpsan hma che chu, tiin thuthlung an siam ta sup sup mai. A hmelma (Russia) chu ram tin leh mi tin maiin kan hmu pangngai ta mang lo a lo ni ta der mai.

Tlangkawmna

Kan ram (Mizoram) hi state dangte ang chuan upa lo mah ila, India ram bung khat kan nih ve angin kan hmasawnna tur, intodelhna tur pawisa tam tham tak kan dawng ve ṭhin. UT sawrkar aṭangin state kan ni a. Kan ram hruaitute chuan hna ṭha takin kan thawk an ti kum tin vek; mahse, a ni tak tak meuh lo nge maw ni dawn le, vawiin kan dinhmun han en hi chuan. Pathian chakna ringa kan sawrkar thar pawh hian tih tur a ngah mah mah a ni lo maw, zero balance aṭanga bul han ṭan ṭhat leh chu. Kan hruaitu kal tate kha a sawia sawi ringawt, tak tak hmuh tur awm lo, nangni pawh ni ve u la, eng mah in ni chuang bik lo vang, min ti mai em mi?

Aw le, kan thupui lamah lut zel ta ila. Fiamthu thawh thiamte pawh hi a dik tak chuan mi ho nihna a ni deuh. Bible thu an han hmangte phei hi chu an ngaihtuah chian loh vang mai mai niin ka hria. Fiamthu duh tak kan han tihte pawh hi an nêlawmin an fel hmel viau a, mahse, zîktluak lohna lai awmin ka hria. Ṭhian atan, nupui/pasal atan, thawhpui atan mi ho tak hi chu an ṭhat loh hmel e. Hetih lai hian, mi ho tak hi a lo nih ve reng theihin ka ring.

- Lalchhandama Colney, Ph – 9862982321