ATL KAWNGPUI

Aizawl-Thenzawl-Lunglei (ATL) kawng hi kum 2000 aṭanga thawh ṭan niin, March 2011-ah kawng siam hna thawh zawh a ni. He kawng hi externally aided fund, World Bank sum hmanga Mizorama kawng siam hmasak ber nia hriat a ni. MPWD hnuaiah hna hi thawh niin, international consultant pahnih CPG Consultants Pte. Ltd. (Aizawl to Buangpui) leh Sheladia Consultants Pvt. Ltd. (Buangpui to Lunglei) te hman niin, anni hian design leh quality test te an khawih a ni.

Kawng siam dawn hian sik leh sa, lirthei rih zawng leh kawng innghahna leilung awm dan azirin kawng hi duan (design) a ni ṭhin. Tichuan, kawng phui (close grade road) emaw kawng phui lo (open grade road) te, alkatra phah chhah (thick bituminous layer-BC,SDBC) emaw alkatra phah pan (thin bituminous layer-PMC,MSS,SD,PM,BUSG) leh a dangah te hian kan kawng siamna hmun tur azirin kawng design pawh a danglam ṭhin. ATL kawng hmun hran hrana kawng phah inthuah dan chu table-a tarlan ang hi a ni a. Engvangin nge Thenzawl piah lam kawng hi a chhiat ngun bik tih tarlan kan tum dawn a ni.

A chunga section hrang hrang kan tarlan aṭang khian Section II a tlo ber a, chumi dawtah Section I leh Section III; Section IV (Buangpui to Lunglei) hi a tlo lo ber a, kan buaipui ber a lo ni ta a ni.

Section I & II hi Package-I (0-98 km) hnuaia awm niin, Valecha company-in an thawk a. Section II-ah hian a chung berah bituminous concrete (BC) hman niin, base course-ah WBM hman a ni thung. Tun thlengin Aibawk to Hmuifang hi a tlo bik a, kawng daih rei zawng (design life) kum 10-15 chhung a daih thei a ni. A chhan chu BC hi a phui ṭhat avangin kawng ruhrel (structure) chhungah ruahtui a lut tlang tlem a, tui lut chhun ang ang pawh hi WBM leh GSB-ah te ṭha taka paih chhuah (drain-out) a nih avang a ni.

Package II (98-164 km) hi Tantia company-in an thawk a, kawng phah chung berah BC hman ni tho siin a chhe hma bik hle a. Section I & II-ah repair lian tham tih a ngaih loh laiin Secion IV-ah hi chuan repair lian tham a khât tawka tih reng a ni. Kum 2021 chho vel khan Rs. 120 crore hmangin BC phah chhuah vek tawh pawh hun rei lo te chhungin a chhe leh a ni.

Kawng chhiat hma chhan ni theia lang chu, a bik takin Tlawng leh Lunglei inkarah hian tuitái pût (rock bedding aṭangin) a awm vang leh chung tuite chuan pût chhuahna/ralna ṭha an neih tawk loh vang a ni a. Tin, kawnga tui lut hrim hrim hian kawng ruhrelte chu a chiah a, tui a luan chhuah ṭhat loh avangin fûr lai phei chuan kawng hi tuiin a chiah reng (undrained condition) ang a lo nih takah chuan, kawngin rihna a lak rualin a chhe zui ta ṭhin a ni.

Kawnga tui châmbâng tlat hian alkatra inchârnate leh lungin chakna a neihte chu chemical reaction chi hrang hrang hmangin a tichhe thei a. Chung reaction awm theite chu hydrolysis, oxidation, carbonation leh hydration te a ni.

Hetiang hian han hrilhfiah dawn ta ila. Hydrolysis tih hian tuia hydrogen ion leh hydroxide awmte leh lunga mineral awmte inpawlhin weak acid siamin, mineral nihphung an thlak danglamna hi a ni a. Oxidation-ah chuan oxygen leh tui inchawhpawlhin lunga mineral nihphung an thlak danglamna niin, carbonation chu tui leh carbon dioxide inpawlhin acid a siam hmanga lunga carbonate mineral-te a tihdanglamna a ni thung. Hydration erawh chu tui leh lunga mineral inpawlhin inmanna thahrui chak lo (weak bond) a siam dan a ni thung. Entirna pakhat chauh lo pe ta ila: tui leh lunga mineral pakhat feldspars te an inchawhpawlh (react) hian kaolinite clay-ah an chang ṭhin a, hetiang clay (tlak lei) hian lung chakna tichhiain, zawi zawiin lung sakhat chu a lo chhe ta ṭhin a ni.

ATL kawnga Section II bik kawng a ṭhat reina chhan chu, kawng aṭangin tui ṭha taka a pût chhuah theih vang a ni. Tin, Thenzawl pheia lei chhûn pâwn (embankment) chunga kawng phah a tlo bik dan aṭang pawh hian kawng hi tui lak aṭanga kan venhim that chuan a daih rei dawn tih a lang reng a ni.

Kawng chhiat hma chhan hi chi hrang hrang a awm thei a, Mizoram bikah chuan a kaikuang ber chu tui hnathawh a ni. Van ruahtui dawng ram kan ni hi kan vanneihna a nih rualin, a luan bona lam kan ngaihthah chuan chhiatna min thlentu a ni. Indian code-in kawng siam dan a sawite hi phai ram mila siam a ni tlangpui a, ruahtui tlemnaah hmunah chuan a ṭha viau a; amaherawhchu, kan ram sik leh sa leh leilung nen chuan a inmil chiah lo niin a lang.

Kan kawng siam danah hian tui inpaih chhuak ṭha lo (improper drainage within the pavement structure) hi kan mutàn ber a ni a. Kawng tlona tur chuan kawng chunga tui luanna ṭha (good surface drain), kawng ruhrel chhunga tui luan bona ṭha (good sub-surface drain) leh GSB leh base course-ah te tui a pût ral zung zung theih nan kâr âwl (void/gap) pe dik thei lung len zawng indawt thla dik (rock gradation) hi kan mamawh ber a ni.

- H Laldintluanga, MZU, Ph No: 7005899512