Indian armed force leh Mizote
Thuhmahruai
Kumpinu hun lai aṭang daih tawh khan kan pi leh pute’n Zoram leilung aṭang hian ram tan pên chhuakin sipaiah an lo ṭang tawh a. Kan ramah ṭhahnem tham takte’n ram tan an inpe a, sipai aṭanga châwl tawh (retired) leh ṭanglai pawh ṭhahnem tak kan nei a. Sipai kan ngaisang a, sipai kan hmuh leh hriatte hi ‘Eng batalion nge i nih?’ tiin emaw, ‘Eng regiment nge i nih?’ tiin kan zawt ṭhin. He zawhna hian ka ngaituahna a tithui ve deuh a, sipai kan tih chuan battalion-ah silai keng leh râl beihna hmunah, border khawi laiah emaw, ramhnuai kilkhawr deuhah va tâl char char turah hian mitthlaah a awm ṭhin a nih ka ring deuh a; ka mimal ngaihdan a nih chu. Zing thingpui in paha kan lo hmel hriat zau deuh hlek nan Mizote ram tan an pên chhuahna, sipai chanchin leh pêng hrang hrang a tlanglawn ka han tarlang ve ang e.
INDIAN ARMED FORCES
Kan ram hi khawvela sipai nei tam ber dawttu kan ni. Kan sipaite hi service pathumah a inṭhen a: Indian Army–khawmual sipai hi an tam ber a, dawtah Indian Air force niin, Navy (lawng sipai) an ni. Air Force leh Navy hi an technical em em a, an luhna tam zawk hi science background neih ṭulna a tam.
Indian Air Force hi an inenkawl dan, branch inṭhen dan hi Flying branch, Ground duty (technical leh non-technical branch) leh Medical branch leh branch dangte. Branch chhungah hian specialization hrang hrang a awm leh bawk.
Indian Navy-ah hian branch leh a chhungah specialization hran hran hetiang hian an inṭhen a:
Executive Branch: Surface Warfare, Hydro, Pilot, Naval Air Operations Logistics, Naval Aviation Intelligence, Information Technology leh Air Traffic Control te.
Engineering Branch: Marine Engineering, Mechanical Engineering, Electrical Engineering, Production Engineering, Metallurgy, Control Engineering, IT, Aerospace, Instrumentation.
Medical Branch leh branch dangte: Legal, Education etc.
Indian Army hi Mizoram aṭanga lut tam ber kan nih avangin tlemin han sawi zau deuh ila. Indian forces-ah chuan zaa sawmriat aiin an tam a. Army inrelbawlna hi a lian a, engkim a intodelh vek a. Indona leh râl beihna aṭangin, ralmuan lai pawh administration leh amah a function theih nan Army branch hrang hrang ruahman a ni. An role a zirin Arms leh Services-ah an inṭhen. Army inrelbawlna leh a hlawhtlinna hi an ṭanrualna leh thawhhona ṭhat vang a ni.
Arms hi hmelma/râldo hmai chhana bei tura hmatâwng tur an ni a, Combat Arms leh Support Arms-ah an inṭhen leh a. Combat Arms-ah infantry (ke sipai/foot soldier)-te’n hmelma an bei a, Mechanized Infantry hian khawl leh motor telin ral an bei a, Armoured-te hian tank hmangin râl an hmachhawn thung. Infantry-ah hian regiment eng emaw zat a awm a, regiment pakhat hian battalion hrang hrang engemaw zat an nei ṭheuh a, regiment ṭhenkhatte’n Territorial Army (TA) battalion an nei bawk. Regiment zinga Mizoin kan hriat lar ber leh Mizo tamna ber chu Assam Regiment a ni.
Support Arms-te hian hmelma bei thei turin an lo pui ṭhin. Artillery-in support fire a pe a, Engineer Corps-in mines-te an lo phah a, hmelma hmun aṭangin an phawrh a, Combat Arms-te tan kawng an lo chûl mâmsak a, bridge-te siamin hmelma lam thil siamte an ṭhiat a, mahni sipaite tan kawng an lo sialsak a, hmelmate hmawsawnna kawng dâl hna an lo thawk bawk.
Air Aviation Corps hian van lam surveillance hna leh commander-te rang taka kal zung zung turin an thawk a. Air Defense Corps-te’n hmelmate boruak aṭanga beihna (air attack) lakah lo dâlin, an bei ve thung. Signals hian military chhungah inbiakpawhna, civilian inrawlh theih lohna hrang hrang hmangin an pui a, military communication zawng zawng hmun hrang hrangah inpawh zungzung theih nan ruahmanna an siam a, IT lam hi an kut ani bawk. Intelligence hian a hming ang hian intelligence lam an khawih a, an thu dawn leh hmuhchhuah hmangin sipai hotute’n ral beih dan tur an rel ṭhin. Services hi logistic leh administration support petu an ni a, sipai mamawh–bungrua leh thil dang ruahman leh puibâwmtute an ni.
An role azira service hrang hrang inṭhen dan:
Army Service Corps (ASC) hian supply network ṭha neiin, sipaiin an mamawh, fuel leh ration-te tlang ram, ramhnuai kilkhawr leh vûr hmun aṭanga thlaler ram, sipai awmna tawh phawtah chuan hnianghnar taka a awm theih nan an thlen ṭhin.
Army Ordnance Corps (AOC) hi army-in a mamawh ang weapon system, arms leh ammunition te, vehicle zawng zawngte leh an thawmhnawte ruahmantu a ni.
Army Education Corps (AEC) hian sipai leh officer-te education policy leh training an pe a. Static formation-ah staff hna thawkin, foreign language training, cyber, infotech leh inter-national interpreter leh translator an ni bawk.
Corps of Electrical Mechanical Engineer (EME)-in electrical, mechanical leh electronic kaihnaiwh an khawih.
Army Medical Corps (AMC) hian medical discipline hrang hrang awmin, medical lam an lo cover ve thung.
Army Dental Corps (ADC)-in ha lam hriselna leh enkawlna lam chu an kutah awm a ni.
Corps of Military Police (CMP) hi Army chhunga police hna thawk an ni a, sipai ho discipline an kutah a awm.
Army Physical Training Corps (APTC) hi sipaia physical fitness kaihruaitu an ni.
Army Postal Service (APS) hian sipai huam chhunga civil-in postal service a neih ang a ni a, sipai hmun pawimawhah lehkha leh ṭul dangte an thlen ṭhin. Lehkha thlit fim leh a kaihhnawih hrang hrang an kutkawih vek a ni.
Remount and Veterinary Corps (RVC)-in Army organization chhungah ransa chi hrang hrang an mamawhna ang enkawlin an zirtir ṭhin.
Judge Advocate General Branch (JAG)-in dan (legal) kaihhnawih an khawih.
Military Nursing Service (MNS)-in military hospital-ah damlote an enkawl.
Defense Security Corps (DSC) hi defense hmun hrang hrangah security lam mawhphurtu an ni.
Military Engineering Service (MES) hian defense hmunah building-te leh training leh security lam a kaihnawih construction zawng zawng leh maintenance an khawih a, an kuta awm a ni.
Heng branch hrang hrang bakah hian Rastriya Rifles (RR) a a awm a, Army regiment leh battalion hrang hrang aṭanga lak khawm an ni a, Jammu & Kashmir-a firfiak bei tur (counter insurgency) atan bika awm an ni. Territorial Army (TA) hi military reserve force an ni a, volunteer-a lut niin, hmun khatah an awm a, civil administration an pui a, natural disaster puihna lam an thawk. National Security Guard (NSG) hi firfiakte hmachhawna bei tura awm an ni a, Indian Army leh CAPF aṭanga lak khawm an ni. Assam Rifles (AR) hi India leh Myanmar ramri ven hna leh hel (insurgency) bei tur an ni a, North East-ah leh North India hmun ṭhenkhatah an awm.
Hengte hi a tlanglawn thei ang bera tarlan a ni a, organization hi ṭha taka inrelbawl nan branch tin hian role hran hran an ngah hle a, chipchiar takin an inṭhen leh ani.
MIZOTE LEH ARMED FORCES
Indopui Pakhatna leh Pahnihna:
Mizote hi kan lo duai bik lo hle a, kan pi leh pute aṭangin kan Zoram kawt zawl piah lama an pên chhuahna hi Indopui Pakhatna aṭang tawh khan a lo ni daih tawh. An huaisenna leh sipai ṭha tak an nihzia an hmelmate’n an lo fak daih tawh a ni. Kan record neih theih chinah chuan Mizo ṭhalai 2,100 chuan 27th Lushai Labour Corps-ah an tel a, Mizo ṭhalai 30 rual chu 8th Army Bearer Corps-ah an lo tel tawh. Mizo pasalṭha 71 Lushai Labour Corps leh 8th Army Bearer Corps aṭangin Mizo huaisen pasarih an lo martar tawh a ni. Indopui Pahnihnaah khan kan hriat theih chinah Mizo 937 chuan an thâ leh zung an lo seng tawh a; chhinchhiah thlip thlep loh pawh an tam ang. Indopui Pahnihnaa tel mi 7-in min la dampui a, mipa paruk leh hmeichhia pakhat an ni. Indopui-II veteran la damte hi an hlutzia hre rengin record a awm dan angin an hming tarlang ve ila:
Pi LT Mawi (kum 100), Serkawn
Pu Kawlhlira (kum 100), Chaltlang
Pu Vanzinga (kum 100), Armed Veng South
Pu Lalthanhawla (kum 99), Darlawn
Pu Lalbiakthanga Pachuau (kum 98), Chanmari
Pu Hramtuma (kum 97), Sangau
Pu Chhuanliana (kum 97), Bethlehem Veng.
India leh Bangladesh Indo 1971:
He indonaa Mizo hnahthlak telte hi kan la hmuh phakte an ni. Battalion hrang hrang aṭangin Mizo sipai 321-te chuan kan ram tan ral an bei a. Kan record piah lamah hei aia tam an awm rin a ni.
Mizo sipai martar:
Kan Mizo sipaite’n kan ram tan ṭhahnemngai leh huaisen taka hmelma hmaa zâm lova beitute zingah ram tana nunna hlan an awm nual a, Mizo martar 158 kan nei a ni.
War Memorial:
Sorkarin a sipaite inpekna, an nunna ram tan hlantute chawimawina leh hriatrengna War Memorial hi Aizawl, Lunglei leh Champhaiah a siam a. War Memorial-te hian kan pi leh pute ram tana an pen chhuahna leh an inpekna hlu tak chhinchhiahna a ni. Ṭhangtharte’n kan hlut thiam a, kan chhawm nun reng hi kan tihmakmawh a ni.
Mizo sipai zinga Gallantry Award (huaisenna lawmman) dawn tawh dan:
Pre- Independence (India-in zalenna a hmuh hma):
Indian Distinguished Service Medal (IDSM): 1
Military Medal (MM): 8
Military Cross (MC): 4
Burma Gallantry Award: 2
Post- Independence (India-in zalenna a hmuh hnu):
Vir Chakra (VC) (Award sang ber aṭanga pathumna): 1
Shaurya Chakra (SC): 5
Sena Medal (SM): 30
Mention-In-Dispatches: 26
National Award:
Mizo sipai zingah hian national award la pha mi pariat (8) an awm.
Padma Bushan: 1 (Hony/Capt LZ Sailo)
Padma Shree: 6 (Rfn James Dokhuma, Pvt Khawlkungi, Cnf C Rokhuma, Brig Thenphunga, Hav Lalbiakthanga, Rfn C Kamlova)
Sangeet Nakak Akademi Award: 1 (Sep Lalhluna Lushai)
Freedom fighter Pu Darthawma chu Subhash Chandra Bose pawl Indian National Army (INA)-ah telin ram tan a lo pên chhuak tawh bawk.
MIZO SIPAI
Khawvela sipai tam ber dawttu India ram defense ropui takah hian Mizote’n hming an chher ve nual a. Indian Army-ah hian Maj. RK Hranga hi kum 1942-ah commissioned officer ni hmasa ber a ni a, Brig. Ṭhenphunga, AVSM hian a dawt. Tun dinhmunah hian Army officer 98, Air Force officer pasarih leh Navy officer pathum an awm.
Army officer-ah hian Mizo hmeichhia paruk an awm tawh a, a hmasa ber chu kum 2002-ah commission a ni. AEC, INT, AOC leh ASC-ah pakhat ṭheuh commission an ni a, Medical-ah pahnih commission an ni. Assam Regiment bakah, Arms leh Services hrang hrangah Mizo ṭang lai leh pensioner an tam tawh hle.
India sipaite hi an luhna educational qualification an nei ṭheuh a, mahse, sipai huang chhungah inzirtirna khirh tak tak an paltlang a, ram hmun inang lo tak tak humhim leh mihring nunna chhan thei tur khawp thiamna leh finna nei tur hian training leh course hrang hrang an zir chhuah a ngai a, an ṭan laiin civil education a duh tan chhunzawm zel theih a ni. An ṭan chhungin eng rank pawh a ṭul dan azirin leadership neih theihna tura hrual an ni ṭhin.
Khawvela sipai training-ah India sipaite hi hautak leh khirh ber pawlah rîn luh ve a ni a; training hi tu tan pawh inang vek, ṭan chhung zawnga taksa fit leh mahni intah hriam ngai reng a ni. Hei vang hian rawn chhuakte pawh hi ṭhalai tak takte kan hmu ang, thil khirh tak tak hmu leh experience tam tak nena rawn hawte an ni a, an hun ṭha zawng zawng ram tan inpe a, kan hnam timawitu an ni. Mipuite duhsakna leh thlawpna hi sipaite tichaktu a ni. Zo val leh lanu te mahni ram leh hnam tan i pên chhuak zel ang u.
- Maj. Rebecca Lalzarzovi Chhakchhuak (Rtd)