LAL ISUA HI KAN TA A NI

Johana 3:16- "Pathianin khawvel a hmangaih em em a, chutichuan a fapa mal neihchhun a pe a, amah chu tupawh a ring apiang an boral loh a, chatuana nunna an neih zawkna'n."

Bible chang kan tarlan khi intrenet a Pathian thu zawn hlawh ber a ni e an ti a, kan hre vek awm e. Lal Isua hi keimahni tan liau liaua lo kal a ni a, kan hnaih poh leh kan ta a nihzia a chiang ṭhin.

Thu leh awm lo a den hlum nghal tur hmeichhe uire lai tak an man kha, tun lai hun phei chu nise a mualpho viau ang; whatsapp leh facebook-ah kan vawrh darh nasa in mi zawng zawngin tuibur hmuamda lekah a uire thu kan hre nghal vek ngei ang. A thlalak phei chu en ngam a ni lo ang.

Mahse Lal Isua chuan, misual ber, thi nghal tur pawh chu ngaidamin, tisual nawn lo turin a chah a nih kha. Lalpa chu fakin awm rawh se! Kan sualna leh kan bawhchhiatnate chu khawvel mite hriata tenawm ber pawh ni se, Lal Isua-ah chuan ngaihdam kan ni tawh a, sima Lal Isua zui mai kha a ni kan tih ve tur.

Tin, chhiahkhawntu Zakaia, mipuite'n an huat leh an ngei ruk em em, a eiru ni ngei an ngaih inah khan Lal Isua khan chaw a ei tlat mai! Tun lai khawvel ang chu nise mipuite hian Zakaia chet dan hi RTI Act emaw CBI emaw in finfiah an duh maithei!

Hei hian a entir chu, Lal Isua hi keini misualte tan ngei hian chatuan nun min pe turin a lo kal a ni tih a lang chiang hle. Zakaia anga Lal Isua hmuh duh vanga theipui kunga lawn duhna rilru kan put phawt chuan Lal Isua hian kan nunah lo thlen a, chaw ei a duh reng a ni.

Judate'n an ten em em leh an hmuhsit ber hnam Samari hnam ngei kha Lal Isua chuan tehkhin thu-ah hmangin mite ṭanpuitu leh mite tana thilṭha titu a nih thu kan hmu. Tunah hian Samari mi ṭha kan sawi chamchi a, Kristiante zinga hnam lar bel pawl an ni hial tawh awm e.

He hnam ber kher Lal Isua'n tehkhin thu a hman chhan hi eng dang vang ni lo in chitin hnamtin tan a lo kal a nihzia a min hriattir a duh vang a ni. Brahmins (Hindu hnam sang ber) kan ni emaw, Dalits (Hindu hnam chhe ber) kan ni emw, Lal Isua hi kan ta vek a ni a, Pathian chuan kan tan, angkhat vekin min pe a ni.

Lal Isua hi kan ta a ni tih i hre nawn fo ang u. Beidawnna, manganna, harsatna leh suahsualna thuk ber pawhin min nangin min chimbuai mah se, Lal Isua hian damna min pe a, thlamuanna min pe in kan sual min ngaidam a ni.

I sim a, i pan a, i beisei phawt chuan Lal Isua hian Vanrama i ṭhutna tur kengin a lo pan che.

- Rinfela Zadeng