MIZOTE LEH NUN THIANGHLIM

Thianghlim han tih hi chu a mawiin a zahawm nghal hrim hrim mai a. Thil reng reng hi a man a to emaw, a tlawm emaw pawh ni se, a fai ṭhata a thianghlim chuan a duhawm mai ṭhin. In ropui tak leh ṭawp deuh ai chuan in ropui vak pawh ni lo fai leh thianghlim ṭha chu awm a châkawm daih zawk. Silh leh fente pawh a man to ngawt ai chuan a neituina fai leh thianghlim taka a vawn chuan a lang nalhin a zahawm mai ṭhin.

Hman ní chu police pakhat hian a car Alto 800 chhuak hmasa ber chi kha ka awmna bulah a rawn hûng a. A car kha a model a hlui tawh viau nâin a nalh ka ti khawp mai a, a enkawl ṭha tih a hriat; a fai ṭhain a hnûm hlarh mai a, a zahpuiawm lovin neih atan pawh a iaiawm hauh loh mai. A neitupa pawh ka lo fak hlak a, a lawm ve viauin ka hria. Chutiang bawkin mihring pawh hi kan hmelṭha emaw, chhia emaw pawh ni se, kan fai ṭhat a, kan inenkawl ṭhat chuan mite tan hmuh kan nuam mai a; kan duh vanga hmelṭhaa hmelchhia ni miau hek lo vi. Sap mi nawlpui pawh khu an incheina a sang miah lo; thawmhnaw secondhand leh man tlawm te te an inbel a, mahse, anmahni an thianghlim miau a, a lang mawi lo thei lo.

A bikin hmeichhiate leh thianghlim hi a inhmeh bik ni hian a lang. Hmeichhe inchei nalh deuh, thawmhnaw man to deuh deuh inbel, hmai hnawih chi tinreng nena hmui sen hlura an inchei pawh hian an balh ruk viau si chuan uṭawk sahbawn sen hmuam tluk chauh an ni mai. Zakkha nei pawh hi mi tam tak kan awm a, mahse, ṭhenkhat chu an invawng peih a, an nei tih pawh a hriat loh. Ṭhenkhat ve thung erawh an bula awm hrehawm khawpin an zakkha rim a nasa ṭhin, perfume-ah an hmang ta emaw tih mai tur a ni. Mizote hian zûk leh hmuam kan ti nasa lutuk a, khawvel huap ang pawhin a ram thuah ti nasa ber kan ni a, India ram state-ah pawh pakhatna kan ni. Cancer leh natna dangah pawh hian natna tuar tam ber khawvel huap pawhin kan ni hial mai thei. Nit ina Aizawl khawpui chhung veng hrang hranga mitthi kan ngah dan hi a rapthlak zawk a. Tunlaiah phei chuan mi kan changkang tawh a, ka chhung sen hêm huam leh bâl deuhte hi a mawi ta lo khawp mai. Tunlai ṭhalai tam tak chu an invawng ṭha ṭan ta viau mai a, thil lawmawm tak a ni.

Nulate hian an mawina ber chu incheina emaw, hmelṭhat lam ngawt ni lovin, an nungchang leh an thianghlimna hi a ni. Bible hian nula thianghlim hi a dah sang khawp mai a, Isua hringtu pawh Mari nula thianghlim a nih kha. Roreltute 21:11-ah, “In tih dan tur chu hetiang hi a ni: Mipa zawng zawng leh hmeichhia, mipa mutpui tawh phawt chu tiboral vek ang che u,” tiin thu an pe a. Bible hian nula, mipa mutpui tawh chu a a dah sang lovin a haw hle tih kan hmu. Tunlai khawvelah nula tṭhenkhatah mahni virginity lo zuar ta te, virgin nih chu thil zahthlak nia ngaia inzirtirnate hial pawh a awm.

Kan ramah pawh hian nula tleirawl ho zingah nula thianghlim (virgin) hlutna hre lo an tam hle mai. Mahni thianghlimna pawisa tam deuha mi hausa hovin an lei tak maite pawh sawi awm neuh neuh a ni. Nulate’n an thianghlimna an hloh tawh chuan an hlutna an hloh tihna a ni a, thui tak kal zel mai pawh pawisak lohna an neih ṭhin. Chu mai bakah, an taksa mawina thlenga hralh pawiti lovin nawmchenna khur thûk zawkah a hruai a; mahse, an rilru a hahin tâl chhuah leh mai duh mah se, tâl chhuah leh harsa tak a ni tawh ṭhin.

Mipa tam tak pawh hian nula thianghlim (virgin) kan ngaisang a, nupuiah pawh virgin ngat kan duh ṭhin. Nimahsela, ṭhenkhat chuan nula thianghlim tihchhiat tur zawngin kan hmanhlel a, tleirawl â deuhte kan bum a, pawisa tam tak leh hmanraw hmangtein kan thlêm thlu fo. Hetiang mite hian malsawmna an dawn kan ring em? Anmahniah lo tuar lo pawh ni se, an tu leh fateah eng nge nghawng a neih ang? Nula thianghlim nupuia tana kan duh ni si, lo tihchhiat hi sual lian tak a ni a, intihtheihna leh uanthuanna chi pawh a ni lo. Tunlaia KS leh call girl kan tihte hi a tam ber chu an tleirawl ât laia khawihchhiat lo tawk tawh, humsual lo dai laklawh tawh nia inhriate an ni ṭhin. Mipate hian kan thil tih ṭha lo nghawng thuizia leh mi nun kan tihchhiat nasatzia hi kan inen let a ṭul khawp mai. Exodus 22:16-ah, “Miin nula nupuia la hual loh chu lo thlêmin lo mutpui se la, a man pein a nupui atan a nei ngei tur a ni,” tiin a sawi asin. Kan ram hi hurna thlarau hian min chiah hneh tawh lutuk a, Pathian pawi hi kan va sawi nasa em!

Nu leh pate pawh hian kan fate hi sex lama inzirtirna hi an naupan lai aṭanga kan tuh a pawimawh hle mai a, a bik takin kan fanute phei chu kan venhim hle an ngai. ‘Á nu, á pa’ an tih duai duai chhung hian khawvel thilah chuan an lo nula tlangval hle tawh ṭhin. Tunlaiah phei chuan social media a chak tawh a, naupang thlengin phone an khawih theih tawh avangin an hriatna hi a advance em em tawh. Kan fate nena inkawm nêl a, engkim an harsatnate an sawi ngamna nu leh pa nih kan zir a ngai hle. Chhungkua inkâwm ngeih lo, chaw pawh eiho ngai lo leh titi hona pawh nei ngai lo hi engzat tak awm ang i maw?

Mipate hian tlangval thianghlim, nulat tlangvalna kawnga la inhnamhnawih lo nih hi zak lo ila, nupui kan neih hmaa kan invawn thianghlim chuan chhungkua kan din hunah kan inchhir lovin malsawmna zawk a ni tih i hre reng ang u. Tlangval tam takin sex lama inhnamhnawih lo nihte hi an zak a, mipa nih lohna ang hial insawinate a awm ṭhin. Invawn thianghlim tluka pà leh mawi hi a awm lo va, kan dam chhung hun tawitêa kan hlimna leh lawmna min siamtu zawk a ni. Chuvangin, Mizo nula tlangvalte invawn thianghlim hi kan hma hun zel atana ṭha leh Pathian duh zawng a ni tih hriain, thianghlimna nun neih hi i inzirtir uar ang u.

- Reuben Lalnunthara Hnamte