'Nunna chán' kan hmang dik lo ṭhin

Hun eng emaw ti aṭang khan chhiatna eng emaw thlengah thi an awmin, chanchinbu leh chanchin tharah leh ṭawng tuallêngah 'nunna chán' tih hi an hmang rim ta viau mai.

'Keifang dáiah bus a chesual a, mi 15-in nunna an chán,' 'Lengpui Pukpui bula lung tlain car a delh a, mi pathumin nunna an chán,' tih ang chi hi a tam ta hle. 'Nunna chán' kan hman dan hi a dik tawk lo.

'Keifang daiah bus a chesual a, mi 15-in nunna an chán' ti loin, 'Keifang daiah bus a chesual a, mi 15an thi/boral' tih ni mai se; 'Lengpui Pukpui bula lung tlain car a delh a, mi pathumin nunna an chán' ti loin, 'Lengpui Pukpui bula lung tlain car a delh a, mi pathum an thi' ti mai ila. A kîkâwi kual lo zawk a, a mâm zawk a, a dik zawk bawk. 'Thi' leh 'boral' tih erawh hi chu thu dang ni rawh se.

Mi tuin emaw thubuai (case) a nei a, thubuai neitu chu thi ta se, thubuai ngaihtuah zui zel a ṭulna awm tawh lo a, thubuaiah thiam loh chang pawh ni se, hrem tur a awm tawh lo; chuvangin, thubuai pawh tihtawp a ni mai ṭhin.

'Nunna chán' chungchangah pawh, mi a thih tawh ber chuan chàn tur a nei leh tawh chuang lo. Nunna emaw, thil dang emaw pawh ni se, chántu chu dam lai ngei a ni tur ni àwm tak a ni.

Hetih rual hian, 'nunna chán' tih hmanna àwm tak leh hmanna tur dik erawh a awm ve tho. Ramchhuahnaah emaw, rál beihnaah emaw mi eng emaw zat zinga mi ṭhenkhat (mi panga ni ta se) an thi a; a la dam lai zinga miin, 'Kan ramchhuak chu nunna panga lai kan chán tlat mai' ti se, a dik thlap a ni. 'Ramchhuahnaah mi pangin nunna an chán' tih tur a ni lo.

'Nunna chán' tih hmang ṭhinte hian chhiatna thleng, sárthi awmna ang chi-ah hian an hmang tlangpui a; awmlaia thihna, dam lohna vanga thihnaahte erawh chuan 'nunna chán' an ti ngai bik chuang lo. Ṭawngkáa sawiah leh zualko thupuanah pawh 'A thi/boral a...' kan ti mai a; 'A nunna a chán a...' kan ti ngai lo. Sárthihna a nih avanga 'nunna chán' tia sawi tur bik chhan tur a awm lo a ni.

Chanchinbu leh TV-a chanchin thar ziaktu te, TV-a lang ṭhin, thil sawi ṭhinte ṭawngkam hman hian mipui a kaihruai thui thei khawp mai a, chuvangin, an fimkhur a, ṭawng dik an hman a ṭul em em. 'Nunna chán' tih pawh hi chanchin thar ziaktu tam takin an hman ṭhin avangin mipui zingah pawh hmang an tam tawh a, ram hruaitu zingah pawh hmang an awm fo; ṭawng dik a nih leh nih loh ngaihtuah chiang lêm loin an hmang mai a nih a rinawm. Chanchin thar ziaktute hian Mizo ṭawng hi an uluk lehzual a va ngai em!

Heng thute hi a ziaktu hriat dan leh pawm dan ringawt a ni lo a, rualú zawk, Mizo ṭawng thiama ngaih mi ṭhenkhatte ngaihdan lâk hnua ziah a ni.

- Kezo