LUNGLEI MZP THILTIH HI

Aizawl-Thenzawl-Lunglei (ATL) Road hi kan sawrkar lo hrawn tawh zawng zawng hunah pawh ṭhat lai nei ngai lo (ti mai ang aw) a ni. Kan hriat angin ATL Road hi Aizawl leh Lunglei inkar kawng ngawr ngawr a ni lo va, chhim lam zawng zawng, Tlabung leh Chawngte thlengin ATL Road ring an ni. Heti khawpa mipui mamawh kawng hi sawrkar hotute hian an ngaihtuah tawk lo deuh tih phat rual a ni lo. Tuna MZP Lunglei an che ta pawh hi demna tur an awmin a lang lo. Engtik lai pawha Thenzawl aṭanga Lunglei lam kawng chhe ta bik em em reng pawh hi chhim lam tan chuan thinrim leh rilru natna tur a ni ve hrim hrim. A rei ve lulai tawh em mai.

March Pathianni vawi 2-na hmangin Lungleiah kohhran assembly hmangin ka kal a. Thenzawl leh Lunglei inkarah kawng siam hnathawk hmuh tur an awm nual ka beisei a, kum kal ta lam boruakte ngaihtuah phei chuan hmun nga/ruk velah hnathawk an lo awm sup sup turah ka ngai a. Mahse, kawng siam hmuh tur an awm lo. An la che chhuak rih lo a ni mahna ka ti rilru a. Kan PWD Minister hi an ruat fuh lo deuh em ni, ani taksa lam pawh bawrhsâwm ve tak lo ni bawk nen. Sum lam dinhmun kan hre ve lo va, chuti chungin kan hotute che muang lutuk hi chu a pawi khawp mai.

Lunglei/Hnahthial MZP lam pawh an che tlai ve mah mah, February thla bul lamah tal te pawhin lo che chhuakin pressure lo siam hma ve se. Tlai khawhnua ná leh rum zeta ti leh si turte chuan thâwm lo neih hma ve deuh se a ṭha tur.

Kum liam ta lamte khan Aizawl-Lunglei inkar chauh ni lovin, Aizawl-Mamit kawng te, Aizawl-Champhai kawngte kha a ṭha lo hle hlawm a, tunah erawh chuan Mamit leh Champhai lam kawngte chu a ṭha ta viau ni awm a ni.

Kan ramah tute pawh sawrkar se an ngaih pawimawh ber tur ni awm chu mi zawng zawng, ruling leh ruling party mi lote pawhin kan mamawh inang vek chu kawng ṭha a ni. Hei hi kan ram hruaitu lu berte pawhin an hriat reng a ṭha hle ang.

MZP kan sawi a, ruling party lamte pawh hi an pawimawh hle. MLA-te ring vek lovin, party lamte pawh bengchheng hma ve deuh ṭhin se a ṭha tur. Party han sawi takah chuan kan sawrkar lo hrawn tawh zawng zawngah pawh khan party hruaitute hi an nêp ṭhin mah mah em aw tih tur a ni. 'Therhlo' beisei an neih ve ṭhin vangte pawh a ni mahna. Politics chhia leh nêp tak kan neih rei tawh lutuk avangin party mite pawh sum zawng ve zel mi kan ni a. Tun thleng hian mahni tan ni lo, ram leh mipui tana pute nawr ngam kan la nei tam lo deuh niin a lang.

Ruahtui tlak tam lehzual hma, hnathawhna hun tlemte la awmah hian kan hotute, PWD-te pawhin theihtawp han chhuah se a ṭha ngawt ang.

- Rev. Biaka Chinzah