Ka ram neih chhun
Mi tin mai hian kan ṭhalaite nun suattu ruihhlo hi kan hua a, kan do a, a sâwt lem hlei lo va. Mahse, tih ṭawngkam hi khawvel famkim lohzia tilang chiangtu a ni si.
Ruihhlo avangin tlawmngai pawl a pên chhuak a, YMA-in theihtawpin, a thim a var thlu lovin harsatna karah leh sawiselna karah nghet takin a kalpui zel a. Tun hnaiah pawh rapthlak tham zet an man a. Mahni sum sengin, an hun leh thâ, mahni hna ṭul an kalsan a. ‘Mahse’ tih a ṭul leh ṭhin.
Ruihhlo an man a, a hlâwkna têltute chu mifing, ruihhlo laka fihlim, magistrate leh ukil-te an ni hlauh asin le. Sumin kan mit a tidel a, kan hnam ral mek ai hian a hlu zawk a ni ang e. Mi tin kan inenfiah a hun kan ti em?
Sum ngah leh ropuina, inchhekarbawmna hian dam reina a keng tel lo va, chhungkaw hlimna leh chaw ei tuina a keng tel chuang si lo. Kan ram hian chhantu a ngai a, mi fel tam tak an awm a, khualrel chhiatna laka kan la him rengna chhan hi e, zing tin ruahsur karah leh thlasik khawvawt tak kara kum lama chawhnu tawhte’n khum lum nuam tak thawhsanin, biak ina kan ram leh hnam tana ṭawngṭai hram hram ṭhinte vang a ni. Lalpa’n hriselna leh dam reina pe mawlh rawh se.
Ka thuziakah hian helh theih tur a awm ngei ang, mahse, han chhût ve mah teh u, thu dik lo chu a ni si lo, tu mah mimal takin kan inti lo. Tu natna mah thlen lo hram rawh se.
Keini ang, nula ṭhenkhatte beng pawh chen lo, patling kal phe ve hlawk hlawk si hi e, ka fel famkim bik lohzia lah ka hai bik lo. He khawvel thlaler, lungngaihna chhûm dum hnuaia harsatna paltlang ve fotu ka ni.
Ka pa khan koki chhuanin khawlai min lênpui em ka hre lo va, hmeithai, nu derdêp tak chawi len ve mai ka ni. Eng dinhmun ṭha mah chang pha ve ngai lo, ka nihnate avang hian ṭhenrual zingah pawh ka tawmim a, ka thaw ve phawr phawr ngai hek lo. Mi zinga awm aiin ram lama mahnia khawsak mai hi nuam ka ti zawk reng a nih hi maw.
Ka tun hma nun khan ka nunah thu a la sawi reng a, harsatnaa tah hriam, mangannain a ensan ngai loh leh a zui reng ka ni. Chutiang karah chuan lêng mah ila, innghahna pakhat chiah ka nei, chu chu Lalpa Pathian a ni. He leiah hian ropui taka chhinchhiah tur hming leh chanchin ka nei lo. Nimahsela, ni tin leh zan tin, phek tin ka ziahte hian ka hmaah chatuan kawngkhar chuan min nghak reng si a, chu hmun ka thlen ve hunah chuan ka hringnun thawnthu hi eng ang chiaha ngaihnawm nge a nih ve ang?
Aw le, tute paw'n kan ram dinhmun chhiatzia kan hre vek a. Mimal taka ruihhlo kan do lo a nih zawngin, kan chanin maian chan pawh a tluk lo thuai ang, tih hi kei, ka nu fapa chhaw vah mai pawh hian ka hai lo ve.
- Zothansanga, Chhiahtlang, Kawnveng, Ph : 9612333536