Taxi intlan chhawk leh traffic jam

Mizoram sawrkar chuan traffic jam pum-pelh nan Aizawl khaw-puiah Taxi a inchhawkin a tlan tir leh ta. Taxi pute laka inhrosak leh sikul
ṭan hma tir bak kawng dang a hre ngang lo niin a lang.

Khawimaw lai kawng lun vak lohahte chuan taxi intlan chhawk avang hian traffic jam te chu a ziaawm phah mai thei a, mahse, a pawimawh lai ber Bawngkawn to Kulikawn inkar bikah chuan taxi intlan chhawk vanga traffic jam a ziawm phahna a lang chuang lo.

Ram changkangah chuan office a ni emaw, hnathawhna hmunah motor-a kal aiin ke a kal hi an uar a, hla tham fe tih loah chuan kein an kal nasa a, an hrilsel phah bawk. Entirnan: Aizawl khawpuiah Chanmari leh Treasury inkarte hi motor-a kalna tham a ni lo, kein kal mai ila a ṭha ngawt mai.

Taxi khalh ṭhin, chawh ruala thla khata Rs. 10000/- hlawh a, chhungkaw inenkawl thei ṭhin khan, kar khatah vawi hnih a chawlh chuan Rs.6000/- emaw, Rs.7000/- vel chauh a hlawh tawh dawn tihna a ni a. Inluah man leh fate sikul fee a tlawm ve phah bawk si lo a, chhungkaw sum indaihlohna tam tak a awm phah ngei ang. Chhiah hrang hrang lakah taxi te hian lir thei dang chawi ang bawk an chawi a, inhriat thiam bikna eng mah a awm lo.

Traffic ti jam tu dang leh chu Aizawl khawpui area-ah hian Civil Hospital chu thuhran ni se, private hospital a tam lutuk a. Hospital bakah private doctor clinic tam lutukte hian Traffic jam a siam phah hle. Heng hospital te hi eng tik lai pawhin lirthei tam tak nen mipuiin kan pan lo thei lo.

Mizoram Univercity te, New Secretariat Complex te, Falkawn Referral Hospital leh Presbyterian Hospital, Durtlang awmna hmunte hi a fuh khawp mai. He tiang ang deuh hian Aizawl khawpui chhunga sawrkar office tam tak te, private hospital leh doctor clinic thleng hian World Bank road lamah emaw, khawpui zauhna zel ni pahfawmin khawpui daifem lamah sawn chhuak thei vek hlawm i la, traffic jam hi nasa takin a ziawm ngei ang.

Khawpui chhunga workshop tam lutukte pawh khawpui thiang-hlim zawk nan khawpui pawnah sawn chhuah ni se. Hmun ṭhenkhatah parking-na hmun lova motor park tam lutukte pawh a ngaihmawh awm hle. Mipui lah zir lo, motor neitute lah zir bik bawk. Taxi leh city bus-te hi a remchang lai laiah kan phar ding a, duh hun hunah kan chhuk leh mai ṭhin a, ‘stand’ an siamte hi kan ngai pawimawh lo hle.

Heti zat motor tam leh in zui duah duahna hmunah chuan reilote chhuk a, din zawk chhung hian traffic jam a siam hman ṭhin. He lam kawngah pawh hian kan sawrkar hian ngaihtuahna hmangin hma thar la leh hram teh se.

- R.Lalhmangaiha, Bethlehem veng