Zu thu – Thlirna dang aṭangin

Zu khapna Dan (Prohibition Act) hnuaiah kan khawsa mek a; he Dan khauh tak hian kan chhehvel environment (kan ngaw leh thing hmun) chunga a chhe zawnga a nghawng dan (indirect effect) hi, mi tam tak chuan kan ngaihtuah ngai kher awm lo ve. Heti lam zawnga Prohibition-in nghawng a neih dan lo chhut fo ṭhin ṭhian hnai tak pakhatin min hrilh dan hi mi tam zawk hriat ve atan tarlan a ṭulin ka hria.

Zu in ṭhin tan chuan zu ṭha pangngai dawr aṭanga lei tur a awm tak lovah chuan a ruka thlawr, funte leh ‘Amawii’ bottle lamah inhnangfak a ngai lo thei ta lo va. A vanduai pawl lahin an thih phah zauh zauh bawk a. Hetiang Dan hnuaia kan awm takah chuan a ruka zu siamtute’n hmun fianriala mi hmuh leh hriat mai theih loh a siam (thlawr) tur chuan, ‘meihawl’ hmanga siam a awlsam ta ber a ni awm e. A khát tawka Excise leh Police-te’n, zu thlawr zawh sa, ramhnuaia Dâp zema kual, silpauline-a thuah phui te chu, han sat chhe thinin leh, an man khawmsa Amawii containers leh funte te chu han leih baw fo ṭhin mah se, ‘a zual zawpui vailenhlo’ tih ang chauh a ni si! Economics principles-te’n an sawi, ‘law of supply and demand’ leh ‘law of diminishing returns’ te’n hringfate chungah ro a rel lo thei si lo nen. Chu chu Duhlian ṭawng chuan –‘a in duh awm chhung chu, in tur (supply) a awm ṭhin’ tihna leh ‘in in pawha duhtawk awm thei si lo’ tihna ang deuh a ni awm e.

Rangvamual (RV) a cheng, pa rintlak tak sawi dan chuan an veng chhungah chauh pawh ni tina zu thlawr nana an hman ral, meihawl chu Bag 100 aiin a tlem lo vang a ti. Phunchawngah te, Tuikhurhluah te, Ngaizel hnuai World Bank Road-ah te leh hmun dangah te pawh zu siamtute’n an ni tin meihawl hman zat hi a tlem bik kher lo vang le! Aizawl pawn lam leh ram pum ngaihtuah phei chuan meihawl mamawhna hi a va han sang dawn tehlul em! Heng meihawlte hi thingkung puitling kih aṭanga siam/rawh (burnt) an ni lo tlangpui, thing chang ṭha, ui pum tiat emaw, a aia te emaw aṭanga siam chhuah an ni. Hei hian kan ngaw ṭha tur a tikhawbawin a suat mek zel tihna a ni.

Forest mi thiamte chuan thing hmun leh ngaw awmsa suat aiin, meihawl siam nana hman thing kung suat hian pawi a khawih nasa zawk daih an ti. Patling (zawh tawk) pu hnih (two headloads) vel hian meihawl Bag khat a siam thei awmin an sawi. Chu chu hmeichhe thing phur hnih, phur thum lai a ni mahna.

Aizawl Forest Range-a an chhinchhiah dan chuan, Forest Checkgate kal tlanga ni tin meihawl Aizawla lut zat chu Bag 900 vel a ni, an ti. Sikri hmanga ei rawngbawl kan awm tawh loh lai leh thlasik vawh lai ber pawha meihawl hmanga siam, meilum ai ṭhin kan awm tawh mang si loh lai hian, eng atan nge heng meihawl hi hman an nih tak ang? Thingpui Dawr te lahin meihawl hmangin, in tur/ ei tur, an siam tawh hauh lo lehnghal. Chuti ni se, chuti zozai meihawl lo lut ta chu, engtin nge an thehthang tak ang le? Hmun fianriala zu siam (thlawr) ho mamawh atan a ni lo thei lo vang le! Mizoramah hian Forest Range 60 aia tlem lo a awm mek a ni awm e. Heng Forest Range tina meihawl phurh luh zat te chu eng zat tak ni ang maw? Mi thil hriate sawi dan chuan Champhai, Serchhip leh khawchhak lam, (Manipur tiamin) aṭangin heng meihawl hi an chaw lut ṭhin a ni awm e. Khawchhak lam hi Mizo thing chang ṭha Fah te, Thil te, Sasua te, etc. tamna hmun a ni a, meihawl siam nan heng thingte hi hman an nih chuan an va uiawm dawn em! Bungraw phur Motor lian, ke 16 nei ang lo lut ṭhin te hian khawchhak lam aṭangin ‘back load’ remchang atan meihawl an rawn phur lut ṭhin, zu tia maw le! Hetiang meihawla sumdawng ṭhin nu fel tak tak te pawh an awm, zu ti lehzel a. RV area-ah pawh hian zingah meihawl phur ‘supply chain’ te hian an sem zung zung a, a mamawhten Two-Wheeler hmangin an lo la chhawng thuai thuai ṭhin an ti.

Hetiang meihawl sumdawnna hi, kum engemaw zat liam ta, Prohibition Dan kan neih atanga awm tawh leh la awm mek zel a nih chu! Tlangram lo neih (shifting cultivation) vanga, kum tina kan thing leh mau hal chhiat thin hi, pawi tih nak alaiin, chung aia nasa fe zawk, meihawl rawh vanga kan ngaw kan tih chhiat dan hi, sawiin a siak love! Khawchhak atanga Kuhva tawlh rutute’n Police Checkgate pumpelh nan, kawng ruk an siam thluah e, an tih ang deuhin, Forest Chekgate kaltlang kher lova pumpelh atanga meihawl lo lut pawh, a va tam dawn tehlul em!

Meihawl siam nana kan ramngaw in a chhiatpuizia leh chu chuan, kan ram sik leh sa leh kan tuihna te thleng a nghawng chhiat dan tur zia te ngaihtuah phei chuan, Zu khapna Dan hi, rang mangkhenga tihtawp vat chi a ni e, kan ti lo thei awm love? ‘Zu hi sual tinreng bul’ a ni, ti thawthanga ngai, kohhran leh khawtlang huap pawl lian pui puite hian, ngaihtuahna thar nei ngam sela; kan ram chereu zel tur venhim hi kan mawhphurhnaah kan ngai a nih si chuan, huaisen takin kan ko kan thlak a ngai dawn ta a ni e. Tun hnai Budget Session-a, Excise Department Demand sawiho lai a, West Tuipui MLA zahawm tak, Pi Prova Chakma thusawi khan ngaihtuahna a tithui hle; tihian a sawi a nih kha, “Chakma thalaite zingah zu chhe in vanga thi sawi tur an awm ve lo”tiin. CADC area hi, kan hman mek Prohibition Dan hian a phuar ve lova, Chakma thalai leh pavalaite chuan anmahni siam zu tha, uluk taka chhuan, (meihawl hman ve kher ngai lovin) Duichhuani te, Tinchhuani te chu, khap ve hni hne lovin, a duh duhin an in mai thin, tihna a nih chu! An hriselnain chhiatpui ve lem si lovin!

Environment venhim leh vawnthat lamah hi chuan, kan tawng tu huatthu ni lo se, kan kohhrante leh kan NGO tam takte boruak hap chin hi, a sang lua lovin a hriat theih. Khai mah aw, Falkland Venga Youth Recreation Centre (YRC) hmun laih (excavation) a nih lai chuan, an leivung paihna hmunpui ber chu, a thlang Chite Lui kam chu zu ni a. A haw vang lai phei chuan Chite Veng Kai bul, tuna Lei (cement bridge) chhak lamah khuan, Football Ground tia dawna zau, YRC leivung chuan hmun zawl zu han siam thei a mawle! Chu chuan Chite luikuang chu a nek sawn lo thei lova, a kam lehlama mi mal ramte a va hreuh phah ta nghe nghe a nih kha. Local Council hotute hriatpuina leh fee tlem chawi chunga heng leivung te hi paih an ni lawi a. Kum 2017 a Save Chite Lui Coordination Committee hruaituten, Chite Veng LC hotute an zawh fiah tum pawhin,”Heng leivung te chu, fur tuilianin a lenbo leh mai dawn alawm”, an ti sam et a. Save Chite Lui Committee hotute’n leivung leh tawphnawk paih Dan siam thar hmanga, an remtih tak loh hnuah chauh tihtawp a ni.

YRC laihna leivung leh tawphnawk dang te chu zawi zawiin fur tuilian chuan a lenbo nameuh mai; amaherawhchu a ‘long term adverse environmental effect’ chu hmuhhmaih chi rual a ni si lo. Heng leivung hian Chite Lui namen lovin a tibawlhhlawh (pollute) a, a lui kuang a ti pawnlang (siltation vangin) a, luidung tluanin chirhdum a siam a, nungcha te’n an tuar nasa. Mualpui Veng zawna Lengkir sang tak thin te pawh, Lengkir anga sawi tham an awm tawh lova. Chite lui hian Hlimen piah lawkah Tuirial a fin a, Chite Luiin pollution leh adverse effect a tawrh te hian Tuirial an thleng vekin, an nghawng chhe pha vek tih hi thil chiang sa a ni.

Hei mai hi a la ni lo. Aizawl tlaklam veng hrang hranga, kohhran hrang hrangte Biak In thar sak leivung te hi, mimal leivung nen, Tlawng Road liama paih deuh vek an nih hmel khawp mai. Heng leivung leh hnawmhnawk dangte hi, zawi zawia Tlawng lui, kan tui tlan ber tibawlhhlawhtu leh tui titlemtu an ni ngei ang. Save Riparians Pawl leh Environment Protection groups dang ten, a tihfai lamah theihtawp chhuah thin mah se, kan tui tlan ber Tlawng hi kan venghim zo lo achha chu a ni ta e. A venghimtu aiin a tibawrhbangtu lamah hian kohhran tam takte hi kan awm ve hmel tlat.

A tawp berah chuan, kan ram thing leh mau, sik leh sa venhim leh enkawl hi kan mawhphurhnaah kan ngai a nih chuan, Zu khap chungchanga kan ngaihdan kal pui mek, a dik a dawk thlu lova kan sahuai thingvawn tlat hi, ennawn nachang kan hriat a va hun ta em! A nih loh leh, Kohhran leh tlawmngai pawlte hian meihawl hman ngai lova zu siam dan tal, zu siamtute hi finchhuah tum ila, phengphehlepa khua a tlai hma hian!

Kan ngaihtuah chian duh hauh loh chu, khawvela Kristian ram dang zawng zawng pawhin ‘prohibition’ hi thil sawngsawhlawt lo (non-issue) a an ngaih vek tawh lai a, khap rem thei a, kan la inngai tlat te hi, a buaithlak lam deuh chu a nih hi! Muslim ram 10 emaw vel tihdan entawn ang hrim a, kan la khawsa tlat hi, engti dan nge maw ni dawn le? America ram ropui meuh pawhin, kum 20 tal tap chhunga an, khap rem theih tawh loh; keini a talova, kan la chaw tak khuk pui reng mai hi chu, a zia lo lam chu a nih hi! Political Party lal lo lam apiang te lahin, vote zawn nan ‘Ka support e’ te an han ti kawisawi rawl vei thin nen! 

- Rin Sanga