Yoga-te lek lek, te mai mai

Tunlaia keini Mizo Kristiante min run mektu 'yoga' chuan kan chanchinbu a luah tam ta hle a, ṭhenkhatin Hindu zirtirna hlauh­awm leh Hindu sakhaw vawrh darhna angah kan ngai a, duh loh tak te in kan duh lo a nih hi. Hei hi Mizote hi Kristian dawihzep ber leh mahni sakhua pawh hre chiang lo ber kan nihzia rawn tilang chiangtu lek a ni.

Tunlai hian khawvel sakhaw dang chi hrang hrang, Science & Tech­nology leh thiam­na sang tak takin min rawn run mek a, kan dang hneh dawn lo. Hetiang zawng zawng laka kan rilru put dan hi keini Kristian intite hian paih ila, rilru zau tak pu chunga kan lo dawnsawn a ngai.

Sap thufingin 'every coins have two sided' a tih angin thil ṭha lo emaw kan tih pawh hian side lehlamah ṭhat­na tam tak a nei ṭhin. Chuvangin heng thilte hi pawngpaw hlauh emaw lo kalh nghal viau aiin a ṭhatna lai lo zawh chhuah thiam a finthlak ber a, chutiang mi ni tur chuan insiam rem i tum ang u.

Yoga ṭobul kan hre lo a ni thei, rilru zau hek hawk leh fim tak hmangin engtin nge kan lo hmachhawn ang tih hi i ngaihtuah zawk ang u. A pawnga puia Yoga hi lo ramhuai hlauh mai loin kan Kristianna kalsan chuang loin India khua leh tui ṭha tak ni reng chung hian engkim hi kan hmachhawn thei a ni.

Mizo Kristiante hian hlauha pui hi kan nei tam lutuk, chu chu kan rinnaah hian kan chiang tawk lo tihna a ni. Yoga hi Hindu zirtirna aṭang lo piang pawh ni se, Kristianna kalsan loin Yoga hi kan practice ve theiah ka ngai a, Hindu ho leh meditation tih vel bawl kualna remchang takah ka ngai bawk.

Zingkar boruak thianghlim lai hian Yoga meditation hi han practice ve teh, rilru thiang kak leh khawvel lam thil theihnghilh vekin i rilru han sawr­bing la, Hindu ho mantra vel chham kual a ngai reng reng lo. I thinlung tak takin Lal Isua chu han be pawp vang vang la, khawvel lungkham leh buaina te chuan a thlawh bo san ngei ang che.

I duh tawk hunah physical exercise han ti leh la, chutianga Hindu ho anga zingtin leh tlaitin i tih peih phawt chuan Hindu ho tam tak hlepin i Kristian nun chu hmasawnin a changkang sawt sawt ang a, i taksa leh rilru pawh hmuh theihin a hrisel sawt sawt ngei ang. 'Yoga is nothing, just a name' tih hi hlau mai loin pawm la, i va inchhiar dawn lo tak em! Hindu Yoga hi Kristian Yoga-ah i let hmiah teh ang u!

Isua-ah rinna nghet nei la, Hindu, Muslim, Buddish adt. hi hlau loin khawngaihna thinlungin i en tawh zawk ang. Lal Isuan "Thlamuang takin awm rawh u, keiin khawvel ka ngam ta" a tih kha. Chuvangin, Modi-a te Yoga hi heti zawng hian her rem sak daih ang u - kan rinna sawh nghet deuh deuh ila, dawihzepna hlipin huaisenna nen ding chhuak ila, thliarkar rilru hi i paih ang u.