Kora te helna (Pathianin a puithiamte a hauh)
Kora leh a ṭhiante helna chungchang hi Numbers 16:1-35 chhungah kan hmu a. He helna hian zirlai tam tak leh hlu tak min hnutchhiah a, he helna hi zir chian fo a pawimawh hle.
Mosia
Hruaitu ropui leh ṭha, a tluk awm thei tawh lo hial tur chu Mosia hi a ni ngei ang. A chanchin kan sawi tam lo ang a, mahse ani tluka hruaitu ropui hi mihring zingah chuan an awm thei tawh chuang lo a. Hoffmeier chuan Mosia hi hruaitu ropui mai a ni lo va, dân petu, zawlnei leh thuziaktu ropui a ni, a ti. Mize puitling, hruaitu inti tam takin an neih loh ang a nei a, a thin a nel a, dik lo takin engmah a ti lo. A chunga an helnaah a thinrim ve hle a, hruaitu dang ang chu nise tih hlum tur thu a pe nghal thei. Mahse, chutianga ti mai lovin Pathian hnenah a thlen a. Pathian hnena a thlen pawh hian phuba la turin a ti nghal chuang lo. Kora te thinurna leh an puhna chungchang pawh Pathian ngaihtuah turin a dah a. Amahin a chingfel mai thei a, mahse court sang zawkah, dân ang thlapin, Pathian hnenah a thlen a ni.
Arona
Mosia u, Mosia leh Pharaoa inkara thusawitu tur leh Mosia pui tura Pathianina a ruat Arona hi Levia fapa upa ber dawttu Kohata fapa upa ber Amarama fapa upa ber a ni. Mosia puitu ber, Pathianina a ruat a ni chung hian chak lohna tam tak a nei ve a ni tih phat rual a ni lo. Mosian Pathian a biak chhungin Israel faten bawng no lem an lo bia a. Bawng no lem lo siamsaktu chu Arona hi a ni a, a hruaisualtute zingah a chhiar ve theih ngei ang (Ex. 32). Miriami nen Mosia an thîk a, Pathianin a zilhhau tawh nghe nghe a (Num 12).
Kora hian an helna chungchangah Arona hming a rawn sawi chhuak a. Hei hian hruaitu nih a tling tâwk lo tih a tilang thei ang. Puithiam lal ber, rimtui hâla inthawi tur êmah chuan mi tam takin an iai a ni tih a tilang thei. Amaherawhchu Pathian hian a mi ruat, a hriak thih tawh, a thlan tawhte chu eng ang mi pawh nise, mi chak lo leh mâwl, rinna kawnga chak lo ve tak pawh nise a chhan hle a ni tih kan hmu.
Kora
Bible-a kan hmuh angin Kora hi Izara fapa a ni a, a pu chu Kohata a ni. Kora pa Izara leh Mosia pa Amrama te hi unau an ni a, Kohata fate ve ve an ni; tunlai ṭawng chuan Mosia cousin a ni (Ex. 6:16f). Amrama hi an unau zingah a upa ber a, Izhara, Hebrona leh Uziela te a unau dang an ni. Kohata thlahte hi puithiam zingah dinhmun chungnung pawl tak an ni a, biakbûk rawngbawltu an ni. Izhara thlah, Kora te hian fa u ber, Amrama thlahte dinhmun an chuh a, fa u ber nih an khel, tiin a sawi theih ang.
Dathana leh Abirama
Dathana leh Abirama te hi chu Reuben hnam an ni thung a, Kora te, Mosia te, Arona te chu Levia chi an ni. An lungawi lohna ber nia lang chu hruaitu dinhmun chungchangah leh ramtiam pana an kal dan chungchangah a nih hmel. Ramtiamah Mosia'n a hruai lut tawh mai dawn emaw an tih laiin a hla lam panin an la kal ta deuh deuh a, an lungawi lo niin alang.
Reuben-a hi Israela fa hmasa ber a ni a, mahse a pa khumpui a kai avangin a chungnunna a hloh ta a ni (Gen. 35:22; 49:3f). Dathana te hian thuneihna hrim hrim hi an khel leh an thupui zawk a nih hmel (Ex. 16:13).
Hel chhan chi hnih
Kora leh a ṭhiante helna hi chi hnih niin alang a, pakhat chu sakhaw serh leh sang a ni a, pakhat erawh chu hruaitu nihna a ni. Kora hian Arona, a cousin chu a thîk a, biakbûk rawngbawlnaah a dinhmun chu hniam bik leh ṭha lo bikin a ngai a ni. Mahse, he helna hi Pathianin a huat berte zinga mi a ni.
Kora hian Arona aia ṭha leh fel, thiam leh zei zawkah a inngai tih alang a, a chapozia a tilang a ni. Serh leh sâng ti tura ruat bik ni loten an khawih ve hi Pathian huatzâwng tak a ni. Lal Saula chuan a tih loh tawp tur - halral thilhlan leh remna thil hlan te a lo hlân ve ngawt a, Pathian chuan a lalna a hnâwl phah tawp mai a ni
(I Sam. 13:8-14). Juda lal Uzia pawhin phâr hri a vei phah a ni (II Chro. 26:16-21).
Tin, Pathianin a ruat tawhte chu mi chak lo, zei lo leh thiam lo tak pawh nise, zah tur an ni a, Pathian pawhin a hauh a ni tih kan hmu thei. Arona chu mi chak lo ni mah se, Kora te lakah Pathianin a hum a ni. Pathianin a rawngbawl tura a serh hran tawhte chu tlûk châng leh chak loh châng nei pawh nise, mi pangngai ai chuan Pathian a hauh zawk a ni tih hi kan zir chhuah tur ni âwm tak a ni. Kohhran rawngbawltu, pastor, puithiamte hian chak lohna leh tlin lohna tam tak an nei ang, mahse inkhawmpui kaltlanga Pathianin hriak a thih tawhte an ni a, a chak lo leh a tling lo chung pawhin Arona chu Pathianin a rawngbawltu leh a puithiam hna ata a hnawl lo mai ni loin, amah ertute leh beitute lakah a la chhan em em zawk ang hian Pathianin a la hauh na hle tih hria ila a ṭha hle ang.
Helna dang leh chu hruaitu nih tuma helna a ni; Dothana leh Abirama te ang kha. Rom 13-ah chuan roreltute thuawih tura zirtir kan ni. Hruaitu chu eng ang mi pawh nise, Pathian ruat an nih avangin phiarrûk hi thil sual tawpkhâwk a ni.