Harhna leh kan nun

Zoramah harhna a thleng mek a, bing­biletin kawng kan zawh a, hnehna hla do nen zan reiah kawng kan zawh a, khawi veng biak in mai pawh hi tunlai chuan a lian tâwk lo vek a ni ber mai. Hetiang boruak kan tawn chhoh mek laiin thim thuah hnih chungchang sawi chhuah a ni fo bawk.

Hlim rui, taksa chêtna chang veng tinah ṭhahnem tak kan awm a, a chang ve lo tan chuan hriat thiam a har hle mai. Ṭhalai leh naupang zawkte lâm dan ṭhenkhat phei hi chu party-na hmuna lâm dan ni âwm ang tak a ni a, mahse anmahniah khatianga lâm kha a lang tlat a ni ang chu maw? Biak in chhunga khawvel lâm deuh taka han lâm chu ngaih loh lamah pawh a ngaih theih ta ve ang.

Veng ṭhenkhatah chuan miin an sawi fiam ang deuhin Kelkang kal tawh leh kal lo boruak a awm ṭan deuh em aw, a tih theih. Kelkang kal hi a ṭha hle a, mahse mi, an kal ve loh avanga khawvel mi leh ro ta riau anga kan ngai a nih erawh chuan Kelkanga kal emaw, Pathian thlarau kan chan hian tlâwmna min la zirtir tâwk lo tihna a ni ang. Thlarau chan a inchen lo a, Thlarauin mihringa hna a thawh hian a thawhna mihringte mize mil leh ngaih­tuahna milin hna a thawk fo.

Mi lunglêng leh emo­­tional taka a thawh dan leh, lung leng ngai lem loa a thawh dan a inang lo tih hria ila. Chutiang a nih loh a, mahni chan ang chiah chang tura mi kan beisei a nih chuan vuivaina a tam mai mai a ni.

Pathian biak dan kalhmang hrim hrim pawh hi tunlai boruak­ah hian kan thlir ṭhat leh a pawimawh. Pathian biak inkhawm hi mihring intihphurna emaw, a betu tui zawng zawnga kal­pui tur chi ni loin, Pathian duhzawng leh a ropuina tur ngaih­tuahna hmun, chutianga Amah chawimawia biakna hun a nih avangin mahni phûr ang ang kaihhruai leh kalpui a dik lo.

Lengkhawm emaw, zaikhawm emaw erawh hi chu mahni tui dan ang zawnga Pathian chawi­mawina hun a nih avangin mihringin a duh dan dana a kalpui kha a theihna chin a awm.

Mi ṭhenkhatin hlim-lâmna chang a, taksa chêtna changte eng­mah a nih bik lohzia, a lâm vak vak leh eizawnna hmuna a chêt inang lo a awma rêl zui hrep kan ching viau. Mahse hei hi erawh hria ila, teh kherin Pathianin thlarau a pe lo a, mahni fel leh ṭhat vanga Pathian thlarau hnathawh chang tur ni ta hlawm ila, tumah chang thei khawp an awm lo ang. Amaherawhchu, heng taksa chêtna kan chante hian kan nitin nunah a ṭha zawnga hmasawnna a hrin loh erawh chuan reiloteah Pathian thlarau hnathawh hi kan tihlum mai ang.

Harhna lo thleng hi mi tam takin an sawtpui a, an nun leh an miziaa a ṭha lama hmasawnna tam tak a thlen laia kan sawi chhia emaw, kan sawisel chiam chiam hi chu a mak hle. Mi­sual pakhat pawh la simtir lo hian mi chan hriatpui hauh lo hian kan sawisel chiam chiam a. Mi zawng zawngin an ṭhat phah hauh lo ang, mahse mi pakhat pawhin an sim phah chuan lâwm hle hi a ṭha zawk hle. Sawisel tur hre tak, tih ṭhat tur hre si lo kan tam lutuk hi kan buaina a ni fo a ni.