Assembly session leh a chhehvel
Assembly budget session neih mek a ni a, sorkar bill leh thil dang eng eng emaw sawiho karah inhniala han intih deuh sak sak pawh a awm ve nual; kut inthlak emaw, âwm lo lutuka ṭawngkam hman erawh a awm lo niin a lang. Engpawhnise, member tinte'n zalenna an nei a, an inhnial ve bawk tur a lawm.
Eiruk thubuai chungchangah CM Pu Duhoma khan INC member, MLA senior zinga mi Pu C. Ngunlianchunga chu case a neih thu a sawi chhuak a, anticibatory bail lak a ṭhat mai theih thu a râwn nghe nghe a nih kha. Ani Pu Nguna lahin case a neih a hriat loh thuin a chhang ve thung. Kha thilah khan inhnialna a awm ve bawk a, mahse, member senior pahnih an ni bawk a, chuti teh chiamin an inhnial na hran lo a, House an tingaihnawmin an timawi viauin a hriat zawk a ni.
Tun hma deuh khan House chhungah ngaihdan inang lo a awm tawh ṭhin a, kut inthlak deuh uaih uaih pawh a awm tawh ṭhin. Khang hunah pawh khan politician, rilru zau pu awm khawm na nâ nâ chu a hnuah boruak a dai leh mai ṭhin kha a ni a. Tun hnaiah pawh Assembly ṭhutkhawm chang pawhin inhnialna chu a awm ve châwk a, mahse, hmanlai ang deuha kut inthlak tumna emaw, House chhunga han chhuah khawm lût lût a awm ta lem lo.
Assembly House-ah hian ruling lam an ni emaw, opposition member an ni emaw, thuhmun vek an ni a, an intluktlang vek a ni. Chuvangin, Speaker pawhin rorel lam member emaw, eptu lam member-te emaw pawh ni sek sek se, lai takin a duhsakna leh duhsak lohna a lantir tur a ni lo. Tuna kan Speaker hian House a kaihruai thiam fuin ka hria a; a fakawm viau a ni.
Assembly House-ah chuan rorel lamin dan thar emaw, dan awm sa siamṭhatna a pharh fo a, ruling lam leh oppotition lam ngaihdan a inang lo ṭhin a, ngaihdan inchuhin inhnial laih laih fo ṭhin. Rorel lamin dan an pharhte sawiho a ni ziah a, an sawiho fe hnuah pass dil tura Speaker-in a pu luttu minister a sawm laiin eptu lamin an dodal a nih chuan an pass pui lo a, House an chhuahsan mai ṭhin.
CM leh Pu Nguna chungchangah House ṭhutkhawm chawlh lailawkah khan Pu Ngunlianchunga chuan Aizawl Press Club-ah media a kawm nghal vat a. Eiruk thubuaia a hming a lan thu CM-in a sawi chungchangah, LADC-a CEM a nih laia Lawngtlai by-pass road siam turah ACB-in an chhuiin a hming a lo awm ve reng tih a sawi a. Mahse, a fihlima a inhriat avangin anticibatory bail a dil dawn loh thu a sawi a nih kha.
Assembly House-a thil thleng, a bikin eptu member-te'n an ngaihdan a nih loh chuan press mite an pun fo a, House member fing deuh chuan hetiang hi an ching viau. Hetiang thila media an kawma an insawifiah hi a zahawm a, an tih fo pawh a mawi hle a ni.
- Melissa Pa