Zo nun ze mawi – Hawihhawmna

Mizote kût ropui ber Chapchar Kût 2025 thupui atan ‘Zo nun ze mawi – Hawihhawmna’ thlan a ni. Hawihhawmna tih hi nungchang ṭha leh mawi, mi dangte ngaihsak, mi dangte tana thil ṭha tih a, a taka lantir emaw, chet chhuah tih hian a chiang em em a. Hawihhawm tih thumal ringawt hi sawifiah kher ngai loin Zo fate rilruah chuan a chiang a; Zo nun ze mawi lan chhuahna ber a ni.

Mi dang kêpna rilru hi a Kristian em em a, mi dangte tana inpek, mi dangte ngaihsak, thil ṭha tih hi Zo fate nuna bet tlat a ni. Kan Kristianna nena inrem thlap hawihhawmna hi kan ni tin nunah a takin kan lan chhuahtir tur a ni. Zo fate chuan kan pi leh pute aṭanga kan rochun Zo nun ze mawi hi kan kalsan a thiang lo a, changkannain kan phûm bo tur a ni hek lo. Zo nun ze mawi–aia upa zah, tlawmngaihna, rinawmna, hawihhawmna leh a dangte hi changkansan chi a ni lo.

Changkanna leh awlsamnain min luh chilh hneh tawh hle a; kan pi leh pute khân Zo nun ze mawi nunpui lo ta se, kan ram hi nuam kan ti ang em? Kan vanneihzia hi chhût nawn fo tur kan ni. Khawvelin hmasawnna leh changkanna a zawh mek zel a, eizawnna leh zirna avangte leh ṭulna hrang hrang avangin kan ram kan kalsan a ṭul chângte a awm ṭhin. Kan ram pêla kan zin chhuah chânga kan haw châkna ber chu kan ram bawk a ni. Pu Rokunga (fam)-in, ‘Kan Zotlang ram nuam’ tiin kan ram nawmzia hla thuin a phuah a. Ram danga kan zin chângin mi ṭhenkhat chuan kan ram sit zawngin kan iak fo ṭhin a, kan Zo tlang ram nuam kan ti tak nâng a, kan Zo tlang ram nuam aia nuam leh mawi hi a lo tam tiin an sawi fo ṭhin zuk nia!

Kei zawng he kan ram, kan pi leh pute’n lu chhum bân chhum huama an sah zau aia nuam hi ka hmu lo! He kan ram riangtê hi Pu Rokunga khan, ‘Hei ang ram nuam reng hi ram dang awm ve maw?” tiin a lo phuah a nih kha. A ram nawmna a hmu fuh a, he kan ram ang, a chhunga chengte’n Zo nun ze mawi an vawnna ram, an pi leh pute rochun Zo nun ze mawi an nun chhuahpui avanga Zoram nuam an siam hi awm ve tak ang maw?

Ram dang mawi leh nuam chu a awm a ni mahna; kan Zo tlang ram nuam tluktu reng an awm lo'ng e. A chhunga chengte’n lungrualna an hmachhuan a, rinawmna leh dikna an pi leh pute aṭanga an chhawm chu vawn zel an tum a. Mi dangte tana thil ṭha tih tum tlat rilru putute chenna ram hi zawng, ram dang aiin a thlanawm zawk a; mi dangte kenna rilru put zel tumin, sem sem dam dam, ei bil thi thi tiin tun thlengin he Zo nun ze mawi hi an la kalpui asin!

Zo nun ze mawi–hawihhawmna hian chhung tin thleng phâk se, kan pi leh pute’n nun ze mawi tak min rochun hi hnam dangte zingah lantir zel ila. Kan zingah rinawmna leh diknain hmun chang zel se. Mi dangte kêpna rilru, thil ṭha tih tum tlatna rilru hi a mawi em em a, a zo em em bawk.

Zo nun ze mawi–hawihhawmna inzirtir zel hi kan tihmâkmawh a ni. Kan changkanna te, hma kan sawn zelnate hian he nun ze mawi hi kalsan lo se. Kkan hriat reng tur chu, hawihhawmna hian mihring nun a timawi a, Kristian kan nih anga kan nunpui tel tur a ni bawk. Kan eizawnna, sikul kalna, in ṭhenawm khawvenna leh a dang tam takah mi dangte ngaihsak, nungchang mawi leh rilru ṭha put zel hian mi hawihhawm kan ni tihna a ni mai. Keimah chauh ka inngaihtuah a, mi dangte ngaihsak lohna, engah mah ngaih lohna rilru hi a Zo zia lo a, kan tih loh tawp tur a ni. Lal Isua zuitu chu mi hawihhawm a ni tur a ni a; a thua kan hmuh angina, mahni aiin mi dang ṭha zawkah ruat ila, mahni indah pawimawh lovin mi dangte tana nun, mi dangte tana inpek, eng emaw tala mi ṭangkai nih tumna rilru hi Zo nun ze mawi hawihhawmna lantirna vek a ni.

Hawihhawmna hian mi a tizahawm a, mi dangte tana inpekna, ṭhat chhuah tumna rilru hi Zo nun ze mawi a ni. Mizo Kristian chu a hawihhawm tur a ni a, mi dangte ngaihdam, mi dangte kêp, mi dangte ngaihsak hi Lal Isua zuitute tih tur a ni. Mi hawihhawm bula awm a nuam a, a hahdam a, rilru chhia put a theih loh. Kan chunga ṭhat chhuahtute hi ṭhatna vêkin kan rûl let ve ṭhin; chu chu Zo nun ze mawi–hawihhawmna a ni. Ṭhatnaa inlâwm tawn nun hi hmuh a nuam a, vawng reng tur leh hawihhawmna nun mawi tak nei turin i inbuatsaih zel ang u.

- Vidpuia Hrahsel