Mizoram political party leh an ideology bihchianna
Politics kan sawi dawn tak tak hi chuan political ideology te, party ideology leh manifesto te hi kan rilruah a lang hmasa ber ṭhinin a rinawm. Political ideology leh party ideology te hi thil inan duh hmel tak, a huam chin inang si lo an ni tiin bul I’n ṭan phawt teh ang.
Kum 2023 khan R. Vanlal-hmangaihsanga chuan, “Pawlin emaw, political party-te’n emaw, ram (country) emaw an inrelbawl dan tura innghah nan an hman ṭhin heng mihring zalenna dah pawimawhna (liberalism), retheihna um bo leh intluktlanna ngaih pawimawhna (socialism), chin ṭhin dan phung humhalh duhna (conservatism) leh a dangte hi political ideology kan tih ṭhin chu a ni,” tiin fiah takin a lo ziak tawh a. Political ideology bik hi chu ti hian kan hre fiah vek tawhin a rinawm.
Party ideology kan tihah erawh chuan political party hrang hrangte’n an kal dan phung tur te, an party rinna leh hmalak zel dan tur an duan lawkte hi a ni a. Mizoram bikah chuan Kristian ram kan nih avangin party ideology-te pawh kan sakhaw rinna leh kan hnam kalphung (culture) mil leh behchhantea siam a ni ṭhin. Tunlai Mizoram political party langsar zual heng–Mizo National Front (MNF), Indian National Congress (INC), Zoram People’s Movement (ZPM) leh Bharatiya Janata Party (BJP)-ahte thlur bing dawn ta ila. Heng party hrang hrangte hian an ideology-te hi Mizoramin zalenna a sual chhuah dan aṭang te, kan hnam nunphung leh kan ram a lo intodelh zel nana khalh kal tumna leh an tum dan behchhantein an siam ṭhin a ni.
An ideology-te hian party-te mawhphurhna pawimawh tak tak mahni ram leh hnam venhim kawngah te, mahni intodelh kawngah te, hnam inpumkhatnaah leh khawtlang hmasawnnaahte nghawng lian tak a nei a. Party ideology leh manifesto-te hi thil kal kawp tlat an ni a; ideology-te hian thlir lawk thiamna (vision) a pe a, manifesto-te erawh chuan chet zui dan tur ruahmanna (actionable plan) a pe a ni. Inthlan zawhah party pakhatin an manifesto an kalpui dan chu an ideology nen an enfiah ṭhin. He inzawmna hian mipui rinna leh party hma lam hun tur a nghawng thei bawk. Political party-te ideology hi kan ram politics inher danglam dan te, mipui duh dan leh tualchhung hmasawnna nghawng thei thilte hriatthiamna atan a pawimawh em em a ni.
Mizoram political party hrang hrang leh an ideology
Mizorama political party langsar zual MNF, INC, ZPM leh BJP te hian an party thil tum leh innghahna tichiang turin ideology an nei ṭheuh a, chipchiar zawkin han tarlan tum ta ila.
1. Mizo National Front (MNF): MNF hi Mizote din a ni a, ram leh hnam humhalh kawngah leh zalenna sual chhuah kawngah sûlsutu an ni. Kum 1961-a din MNF party hian Mizo national movement-ah hmun pawimawh tak a chang a, Mizoram kan intodelhna kawngah leh mahnia rorel tura dikna chanvo kan neihte humhalh tumin hma an la ṭhin a, Mizote tan a ngaihhlut awm viau a ni.
2. Indian National Congress (INC): Tun hma leh tun thleng pawha Mizorama langsar Indian National Congress (INC) hian hnam ngaihdan zau zawk, mipui rorelna leh sakhaw zalenna chawisan hmangin hna an thawk a. State chhungah vawi tam tak sorkarna an siam tawh. INC hian ram pum huap thil thlirna hnuaiah tualchhung thil hrang hrang ngaihtuah a tum a, politics hmasawnna leh khawtlang nun tihchangtlunna lam an ngai pawimawh hle.
3. Bharatiya Janata Party (BJP): BJP hi Mizoram politics-ah hian party tênau tak ni mah se, an thuneihna zau zawka tihpun an tum tlat a. An party ideology hian ram hmangaihna leh ram hmasawnna lamte an dah pawimawh ber a, mahni intodelhna leh mahnia rorel tura dikna chanvo neihte hmangin mipui tam tak an hîp khawm chungin, Mizoram hi Kristian tamna ram leh mahni hnam din party âwn zawk ram kan nih avangin harsatna tam tak erawh an tawkin a rinawm.
4. Zoram People’s Movement (ZPM): ZPM hi kum 2017-a din a ni a, Mizoram political party naupang ber pawl ni mah se, mipuiteah thâwm an nei lian hle. ZPM hian rorelna ṭha leh mi zawng zawng huapzo hmasawnna an ngai pawimawh a; mipuite tana langtlang sorkar nih an tum nghet hle bawk. Hei bakah tualchhung hmasawnna leh mipui duhthusamte an ngaih pawimawhsakna hian a bikin Mizoram zirna in hrang hrangah ZPM hming hi a tiri nasa hle a ni.
MLA election thlirletna
Mizoram politics huam chhung inthlan zawng zawnga boruak nei lian ber ṭhin chu MLA election a ni. Constituency tinah party hrang hrang candidate leh an party worker-te’n an vawn lai party an tlin ngei theih nan ṭan an la nasa hle ṭhin tih chu kan hre ṭheuh awm e. Chu mai bakah, political party tinte’n manifesto ṭha tak tak neiin, mipui zingah pawh a tam thei ang ber hrilh darh tur leh vote dilin ke an pên chhuak suau suau ṭhin bawk.
Mi fing leh thusawi thiam tak takte’n an party hminga an mamawh tak mai tihsak turin mipui an han tiam tak tak hi chu, ṭawng mawi lo ni lo se–thingtlang kilkhawra cheng ni tin ei khawp hmu ve ṭawk ṭawkte tan chuan a thlakhlelhawm turzia hi kan ngaihtuah thiam pha kher lo hial zawk awm e! An mamawh tak an hmuhna tur chuan an vote lo pek mai kha chu thil harsa a nih a rinawm loh. Nimahsela, kha an vote ngei kha a tlin hnuah an thil tiam kha an pe leh thei vek si lo! Ziak leh chhiar thiam ve ṭawk ṭawkte tan phei chuan vote kan thlak hi kan dikna chanvo leh khua leh tui ṭha kan nihna a ni tih lam ai chuan, politics-a inhnamhnawih ve tawh loh law law an thlan duh hmel zawk riau.
Hetiang vang te pawh hi a ni mahna, kan voting percentage a tlakhniam tak hlek hlek zel ni. Election Commission of India-in a tarlan danin, kum 2013 MLA inthlanah Mizoram voting percentage chu 80.82% a ni a, kum 2018-ah 80.55% niin, inthlan hnuhnung ber 2023-ah khan 80.43% a ni. Kawng ṭhenkhatah erawh chuan kan political party-te dem vek theih an ni bik hauh lo. Mipui kan changkang ve tawh viau chungin thil phût leh a thlawna dawn tum kan la ngah lutukte hi ram hmasawn zelna dâltu lian tak a tling thei viau bawk. Mizoramah chuan kawng ṭha hi khawi khua leh veng pawhin kan mamawh ber pawl a ni ṭheuh ti ila kan sawi sual tamin ka ring lo. Hei vangte pawh hi a ni tak ang, kan political party-te hian an manifesto-ah kawng siamṭhat tih an telh châwk ni!
Kum eng emaw zat kawng chhia lo buaipui tawh state ni mah ila, kawng ṭha reng reng kan nei thei leh chuang hauh lo laite hi a ni buaithlak chu. A chang chuan kan political party hrang hrangte hian an ideology leh manifesto tihlawhtlin theih tur ngaihtuah ai mahin, election-a an tlingpui theih tur ideology leh manifesto an ngaihtuah ṭhin zawk emaw ni a tih theih hial ṭhin hi a pawi hle.
Sorkar ṭha
Thupui tawpna atan chuan sorkar ṭha, mi rethei leh hausa, mi khawsa thei leh a hniam ber thlenga hmasawnna kan hmuh theihna tur sorkar hi Mizoram hian kan mamawh hle a ni. Sorkar lai nawr kaltu tur atan opposition party kan neite hi a lawmawm. Amaherawhchu, kan opposition party-te hian an tih tur dik tak an ti ṭhin em tih hi zawhna pawimawh tak a ni. Hnathawh ṭhat leh hmasawnna neih tam kawnga sorkar el lo a, sawiselna leh demna rawngkai ringawta an iner a nih chuan, chu chu kan ram ṭhanmawhbâwk a ni ang. Opposition an nih laia thil ṭha leh thil dik tam tak an sawi ṭhinte hi an sorkar hun a lo thlen pawhin a tak ngeiin lantir zel thei ṭhin se kan ram hian hma a sawn chak leh zual ngei ang.
Sorkar mek party leh opposition party-te hian ram tan hna an thawh dun thiam a pawimawh hle. Zoram ṭhanmawhbâwkte zinga lian ber pakhat leh chu sorkarna chelh mek party-te hnathawh zawh hman loh term thar intlan hunin a lo nang ching ṭhin hi a ni. Sorkarna chelhtu party thar an lo awmin sorkar hmasa hnathawh tam zawk chu chhunzawm leh mai ta loin, a thar an han duang leh ṭhin a. Kan ram hruaitu political party hrang hrang leader-te pawh hian a bul ṭantu nih a pawimawh ang bawkin a tawp khar theitu nih pawh hi a hlu hle a ni tih hi hre thar leh se a va lawmawm dawn em!
Sorkarin a enkawl tur zawk a ram mipuite min um pha lo fo hi a pawi hle. Tun hnaia langsar deuh (tun hmate pawh a ni ang) tawitêin entirna pe ila. Zirlaite’n an scholarship dilna tur sum leh tha leh senso tur an buaipui fel vek thei a, an beisei leh mamawh ber a scholarship a erawh a hun taka sem a ni thei ṭhin lo leh zirlaite hnena sem kim tura hun a duh rei ṭhinziate hi aw! A dang lehah chuan changkanna leh hmasawnnain a ken telte zinga mi chu lirthei a ni. Tunlai chhanah, a bikin khawpuiah chhungkaw tam zawkin lirthei an nei fur tawh a, tuialhthei thunna tur pawisa pawh an nei, tuialhthei dah khawmna turin mimalin gas station (petrol pump) a la siam thei leh zel. Sorkar enkawl kawng (road) chhiat avangin kan mamawh hun takah tuialhthei ber erawh kan la thei lo fo te hi a pawi hle a ni.
A tawp ber atan chuan, amah Pu James Dokhuma ṭawngkam hawh ila, ”He ram, kan ram hi mi zawng zawngin kan inṭâwm awm chhun a ni a, sorkarna chelh lotu party chuan sorkar chu a sawisel a ni thei e, mahse, kan ram hi chu dîm rawh se,” tih hi a tawp khar nan ka'n hmang ang e.
- C. Lalthantluangi, 4th Sem, Pol Science, ICFAI University, Mizoram.