Puzawn/ Pizawn chungchang - R Sawithanga, Kulikawn

Puzawn leh Pizawn koh danah hian engati nge kan buai kan buai, thu tam sawi pawh a ngai lovin ka hria. Ka nu leh ka pa nu leh pate chu kan pi leh pu sa an ni a, va zawn hranpa pawh an ngai lo. Kan nupuia nu leh pate erawh hi chu Pi leh Pu atana kan va zawn tharte an ni a, ka Pi, Ka Pu kan va tih tur an ni chiang khawp mai. Hei hi kan pi leh pute aṭanga kan Mizo hnama bet tlat a ni.

Chuvangin, makpa tena vawkpa sutnghak talh nikhua pawhin kan puzawnte chuan Pu sachawn an ti a, a bawp an la mai ṭhin a ni. Chuti ni lova, ka nu ka pa kan va ti ve ngawt dawn a nih chuan kan puzawn leh pizawnte pawhin, ka makpa ti lovin, ka fapa min ti ve mai dawn em ni ang? Min lo ti ve ta si se'ng makpa hming hi thai bovin a awm mai dawn em ni ang?

Puzawn tena vawkpa sutnghak an talh chuan makpate chuan a dar kan la ve thung ṭhin a ni. Chuvangin, kan Mizo nunphung leh nihna sawi danglam tur zawng hi chuan a tute pawh hian thil hi i ching pawrhin i sawi buai i sawi buai lo teh ang u. Hetianga thil kan ti dawn a nih chuan, "Mo kan nei ve ta," tih aiah "Fanu kan nei ve ta," kan ti mai dawn em ni ang? Chuvangin, "Ka pa zawn ka nuzawn" ti lovin, "Ka pizawn, ka puzawn," i ti zawk ang u. Pizawn leh puzawn hming a dai mai ang tih a hlauhawm em mai.

Tin, ṭhenkhatin, "Kan fate pi leh pu tura kan va zawn a ni e," tite an awm a, kan nupuia nu leh pate chu kan fate tan chuan an Pi leh Pu tur an ni sa tih i hria ang u. Tin, fa lo nei lo pawh ni ila, ka puzawn a nihna a bo chuang lo. Thanga ni sia Liana tia ko tlat kan va ang dawn em! Kei chuan ka puzawn chu ka pu ka ti zel dawn, mi dang pawh ti ve zel turin ka sawm a the u. Thil dik awm sa hi i sawi pawr tawh ngai lovang u. Hei hi kan Mizo nuna thil awmsa, thil ziktluak a ni e.