Kan mamawh ber chu

Rim taka kan thawhna chhan te, taima taka lehkha kan zirna chhan te, kan lo nawm zawk theih nan, mi dangte tihbuai ngai loa kan awm theih nan te a ni tlangpui ṭhin. Anchhe dawng kan lo nih hnuah chuan nasa taka thawka ei kan zawn a lo ngai ta. Ei tur sin tur kan lo neih chuan kan lung a lo awi hahdam thei ṭhin. Kan lo neinung ta deuh deuh a, kan lo hahdam zel ta a, a tawpah duh tawk tak tak kan nei hlei thei ta lo. Neih belh zel chu hlimna, lungawina, mahse, kan lungawi zo chuang tak tak thei lo, kan nun chu a ruak zel tho mai.

Aw le, hetiang hi mihringte dinhmun tlangpui chu a ni a. Hausa tak pawn a tawpah a thlân tur ft. 6&4 chu a mamawh tawk a ni leh mai, engmah chhawm theih a nei chuang lo. “Sruakin ka lo piang a, saruak vekin ka kir leh dawn,” tih ang kha a ni mai. Kan dam chhunga kan mamawh ber chu chan tawka lungawi zel mai, duham leh a kaihhnawih hian engmah min thlen lo. Chuvang chuan, kan lungawi theih chuan mi vannei, theih loh chuan, chuti hlauh chu a ni mai.

Nun hlim

Mi, a hausa emaw, rethei emaw, a mamawh ber chu nun hlim, hlimna a ni. A hausakna a hlimpui chuan si loh chuan a awhawm chuang lo ve. Retheite pawh a hlim viau si chuan mi awhawm ber a ni thei tlat mai. Milian nih te, hausa nihte a ṭha lo kan tihna a ni chuang lo a, kan han sawi tum chu lungawina neih a ni. Mahse, chu nun chu neih mai theih a ni ang em le. Mihring hian hmasawn zel a tum a, kan sawn zel bawk a. Hetiang karah hian buaina neuh neuh kan neih ṭhin chu, mite baka awm tum, duham kan nih hian a ni. Chu chuan rah ṭha lo tak, eirukna, thamna, dawtte kan lo sawi phah ṭhin. Dik lo taka khawsa leh sum la lutte tan chuan hlim tak tak a har, an sim loh phei chuan dam lai hremhmun a ni nghal. Thlarau khawvel lam tur pawh a chiang lo khawp mai. Hrisel lohna hian mi a tibuai thei hle bawk a, mahse, a tam zawk hi chu zu leh ruihhlo, zuk leh hmuam tena min thlen a ni; keimahni insiam chawp a ni.

Engtin nge ni ang – 1:

Nun hlim chu engtin nge kan neih theih ang. Taima takin hna thawk ila, dan leh hrai te bawhchhe lem lo ila, mi nun tluang, nih hian a hlim ve theih viau mai. Mi nunah buai lutuk lo bawk ila. Kan zalenna hian mi harsatna tur siam lo bawk se la. Taima taka lehkha zir ṭauh ṭauhte hi chuan a tawpah hlawhtlinna an hmu nge nge a, mite awh an lo ni mai ṭhin. Thawh hreh nei lo, mahni dinhmun ang taka lang ngam zelte hi chuan a tirah mi hmuhsit leh nuihzat hlawh mah se, an dingchhuak nge nge duh khawp mai. Zu leh ruihhlo, zuk leh hmuam laka inthiarfihlim hram hram ṭhinte pawh hian a tawpah, ”E, nang chu a la ziaawm viau e,” doctor-te hian an ti duh khawp mai. Fiamthu thawh thiamte han ngaihthlak pawh hian rin aiin kan hlim duh phian, mahse, a ṭhat ve viau rual hian a tawpah zahmawh a ni duh khawp mai. Engpawhnise, hlim loh tum ai chuan hlim tum hrim hrim hi a ṭha viau e.

Eng tin nge ni ang- 2:

A pahnihna atan chuan Pathian thu lam aṭangin han ti ta ila. A hmaa mi kha Pathian thu lo aṭangin kan tihna a ni chuang em em lo a nia. Pathian thuawih (piangthar)-te hi chu an hriat riau bik ṭhin. Khawi hmunah pawh hian miten an thlamuanpui viau duh bawk. Bible-te kan chhiar a, sermon-te kan ngaihthlak chuan kross kawng ni mah se, an nun a hlim. Keini pawhin kan hre ṭhin ang–natna khum pawha hlimna nun an nei tlat mai.

Keini pawhin Bible-te chu kan chhiar a, sermon-te pawh kan ngaithla ṭhin alawm kan ti mai thei. Nia, a ni viau mai. Mahse, thlarau thianghlim tel lo chuan eng teh chiam a ni thei chuang lo. Thlarau tel erawh chuan chang khat lek pawh hian reilote chhungin mihring nun pumpui hi a thlak danglam vek ve thei thung. Chutiang khawpa thil ti thei chu kan Bible hi a ni tlat mai. I chhiar i chhiar ṭhin ang a, Pathian duh dan, biak dan turte I lo hre telh telh ang. I phone ang lo tak khan i hman rim poh leh a thiltihtheihna a tam tawlh tawlh ang.

Kan pasalte’n a rukin kawppui an nei ṭhin tih kan hriat chuan nun hlim neih chu a har khawp ang. Kan fapate ke a vûng ber bur, fanute lah tlangsum an tih hial an lo nih chuan hlim chu a har duh mai thei. Tin, kan eizawnna a tawp thut emaw, a buai ta tlat a nih chuan hlim chu a har deuh ang. Ṭhenawmte an hmuingil viau laia damdawi inah kan awm emaw, a changa pawisa puk tur zawn a ngaih chuan hlim a har khawp ang.

Aw le, khawvel a ni miau mai. A ṭhen an dingchang a, a ṭhen an tlachhia. Zoram, keini khawvel pawh chutiang tho chu kan ni ve reng mai. Kan chungah hian roreltu (Pathian)a awm a, a duh chu a tilian a,a duh loh chu a paih bo ṭhin bawk.

Hetih lai hian kan theihnghilh loh tur chu kan zavaia chungah ang khatin ni a chhuahtir a, a tlaktir leh ṭhin a, duhsak bik a nei lo. Kan mamawh ber (nun hlim) kan zawnnaah hian a ṭhen chu kan chau der a, ṭhenkhat erawh an hlawhtling. Tute nge hlawhtling chu le? A tawi zawngin sawi ta ila: Pathian hnena an thil neih ṭha ṭha (sawma pakhat) pe ṭhin te, damlote kan ṭhin te, luang chhuak ṭhin te. Heng mite hian van lamah an khawl khawm tihna a lo ni. Pakhat mah an chhawm chhuak thei dawn lo tih an inhria a, chuvang chuan petu leh hlantu nih chu lukhawng a nei, Bible-in a lo tih ang khan.

Aw le, luang chhuak nun hi a hlimawm, mite tan lah malsawmna hlu tak mai a lo ni bawk si.

- Lalchhandama Colney; 9862982321