Heti zawng hian i ngaihtuah ngai em (Chanchin Ṭha hriau hrui thil khawm hnamte)

Tunlai khawvelah hi chuan America ram khu a ropui ber reng mai ti ru. A hausa a, sipai leh ralthuam a ngah a, thil a ti thei a, khawvel ram dangte pawhin an ngaisang a, an tlawn ru deuh vek mai a nih khu. Hetianga America ram ropui a lo nih chhan thurûk hi eng nge, kan tih chuan, phat rual lohvin Chanchin Ṭha siam len a ni kan ti ṭheuh awm e. Tun thlengin a ram chhungah suahsualna leh Pathian hawisanna nasa hle tawh mah se, a hminga Chanchin Ṭha a la buaipui hram hramna avangin Pathianin khawngaihna kutin a la chelh hram hram a; khawvel ram ropui ber chan a la chang hram hram zel rih a nih khu.

A chunga tehna khi a dik a ni tih kan hriat chian theihna chu Kumpinu (British) ram hlimthlaah hian a ni. Kumpinu ram pawh khu khawvela Chanchin Ṭha theh darhtu a nih ṭhin avangin Chanchin Ṭhain ram ni tla sêng lova roreltuah a siam tawh ṭhin a. Nimahsela, Chanchin Ṭha zara malsawmna an chan–ropuina leh hausakna hmang thiam lova khawvel thil, sum leh nuamsip ûma Chanchin Ṭha an tlàwmsan tâk avangin Pathianin a ṭhiat tê leh a, tunah chuan ram tereuhtê a lo ni leh ta. A hminga Kristian ram an la nih ve a, Chanchin Ṭha an la vawn nun ve chè chê avang erawh chuan ram tereuhtê, pawimawh tak erawh a la ni chauh a. America pawh hian a siam liantu Chanchin Ṭha hi a tlawmsan hun hun chu a tlukchhiat leh hun a ni mai; a ni em em ang. Hei hi Bible thu aṭangin kan ring tlat a ni. (Isaia 60:12, etc. etc.)

Tun hma deuh kha chuan America leh Russia (USSR) kha an ropui fâl dun a, an inel tawk hle ṭhin a, 'Big Two' tih an ni dun ṭhin. Ralthuam leh thiltihtheihna kawnga an inelna (Cold War) pawh khawvelin a thlir ṭhup ṭhin a nih kha. Mahse, kum 1990 vel khan Russia chu keh sawma a lo têt tak hnuah khan America chu amaha lian fâl zuiin, super power, 'Big One' tih a lo ni zui ta zel a ni.

Mak deuh chu, Mizote hian tun hma aṭang tawh khan America hi thinlung taka ngaisangin kan ṭan ru ràn reng mai a. Leido neiin eng ram nen pawh an tualthu chhia se, America hmelma apiang chu kan lo hmélmâk ve nghal mai zel a. Russia (USSR) nena Cold War an neih lai pawh khan America chu kan lo ṭan ve em em ṭhin a nih kha. Hei hi eng dang vang ni lovin, Kristian ram an nih vang leh sakhaw lama min hringtu, Kumpinu nena an inkungkaihna vang a ni ngei ang.

Mizoten America ram kan ngaihsanna hi kan nu leh pate aṭanga intuh daih tawh a, kan lo ṭan ru ràn reng ṭhin khan a tichiang hle awm e. Indopui Pakhatna vel lai aṭang daih tawha America lam hi hawi tawh kan nih hmel. A enga pawh chu ni se, kan thinlunga a len chhan ber chu sakhaw lama kan zàwlpui, kan hmunpui lama kan ngaih tlat vang a nih a la rinawm ber tho ang. Muslim emaw, Communist emaw ni ila heti tak hian kan ngaisangin kan ṭan reng hauh lo vang le.

Ni e, America ram hi Kristiante tan chuan a ṭanawm ve rêng a ni. Zêp thu a cheng lo ve, kan ngaisang (idolize) reng pawh hi a awm a ni. Keini Mizo, India ram, Hindu tlimpui kara Kristian tlemtête tan phei chuan Kristian sakhua hi khawvela sakhaw pawl lian ber a la ni te, America ram, Kristian ram chu khawvel ram ropui ber a ni tlat rengte hi kan lo chhuangin kan lo thlamuanpui ve hle ṭhin zawng a nih hi. Hei hi keini Mizote dinhmun aṭang phei hi chuan a mak lo va, a àwm ve rêng a ni. Chuvangin, America ramah Muslim-ho an pung chak lutukte hi kan lo vei a, America ram hian a la tlukchhiat phah ang tih pawh kan lo hlau pha ve ṭhin a nih hi.

Heti a nih lai hian Mizote zingah pawh hetiang thlir dan hi thlir dan ṭhing nia ngai a, a ram chhunga thiangzau zawka khawsak duh vanga Donald Trump-a hnawkti pawlte lo ṭan zawk eng emaw zat kan awm. An president thlan hmasaka Biden-a hnehna pawh an hnehna tluka ngaia kut lo beng pawl pawh kan awm a nih kha. Donald Trump-a’n a hun laia America ram ropuina thurûk hria leh America ram chu Kristian ram dik taka din thar leh a, khawvel hmun hrang hranga Kristiante thlavâng a hauh ṭhinna kha nge America hian a ṭhatpui ang a, Biden-a hova ring lo mite nen rual lo taka nghawngkawl bah tlàn zawk khu tih chu kan thlir ber tur chu a lo a ni ta a nih hi. Lo thlir zel i la.

Mak leh deuh pakhat chu, America sawrkarin Israel ram chu a nau awm lai anga ngai a, 'Israel vawih chu ka vawih' ti khawpa a kaihkuah tlat rengte khu a ni. Heng zawng zawng han ngaihtuah khawm hian van lam chatuan remruat hriau hruiin a thil khawm, thûk taka thlarau lama inkungkaihna nei vek kan nih vang a nih ngei a rinawm a, a bible culture leh hle bawk.

Abrahama thlahteah hian chhungpuinu Sari hrin Isaaka thlah Israel-te leh, bawihnu Hagari laka mi, chung lam thu anga Abrahama hnawhchhuah Ismaela thlah kal zel (Muslim) hote khu an inmil ngai dawn lo. An intai reng ang a, khawvel tawp hmain nasa taka indovin hun hnuhnung indona rapthlâk (Harmagedon) indona Bible-in a sawi pawh hi anni hnam hnih inkar aṭang bawka inṭan tur ni-ah kan ngai a. Tunlaia Hamas firfiakho nena inbeihna hi Harmagedon fawhkai a ni tawh mai ang em? Israel fate leh an chhehvel hnamte indona kal tawh han thlir phei hi chuan, Israel fate, chungnung kutin a chelh tlat avanga an let tam taka tam Arab ram ṭangrualte’n an do rawn pawha an hneh thei lo tlat mai ṭhinte kha, a tluka ngaihnawm Mizo Kristiante bengah hian a awm thei lo a nih hi.

Heng zawng zawngte hi Bible-a inphun leh Bible tidiktuah kan ngai tlat bawk. Bible hrilh lawk angin Israel-te khu tunah Messia hriatna kawngah la harh rih lo mah se, harh hun la nei tur an niin, an harh hun pawh a thleng ṭêp tawhin kan ring a. A hunbi a lo kima an harh huna an hmelmate nena indona hnuhnung Harmagedon Indonaah pawh a takin kan tel ve emaw, tel lo emaw, thlarau lama leido thuhmun, rinnaa Israel (Pathian Lal fa) kan nihpui, hun tawp tak takah chuan 'Dam leh tlang khatah, thih leh ruam khatah,' kan la tihtlânpui tur tho an nih kan ring a nih hi.

Khawvel ram leh hnamte hi an intiat vek thei lo va, lian deuh leh tê deuhte an awm reng dawn a. Hetih laia America (Kristian ram) chu ram lian leh ropui bera a ṭangte hi a van ṭha em! Khawvel ram dangte laka America hawi lamin lei a rêlziate hi i ngaihtuah chiang ngai em? America ni lo, hetiang dinhmun pawimawha ding tlak ram dang i hmu em? Han zawng chhin teh. Tuna Mosolman leh Communist ramte zingah hian chutiang dinhmuna ding tlak chu i hmu em? Duhâm vanga ram lian zawkin ram tê zawkte an rûna an awp ral zel mai tur laka veng tlat thei, ram hruaitu duhâm leh dàwn tawite’n khawvel muanna tihchhiat an tum reng lai a, chutiang laka veng leh inrawlh ngam, Muslim firfiakte râwng taka an chet pawha dodala vèl hrep thei tur ram khawvel hian a mamawh hle reng a. Chutianga chet mai duh reng ram hruaitu nunrâwngte’n an hlauh leh zah tlak, thu lai laa ram tê zawkte thlavang hauha inrawlh vat tur khawvel hian a mamawh rêng a ni.

America hi tuna a dinhmunah khuan ding lovin, Muslim ram emaw, Communist ram emaw lo ding ta zawk se, khawvel hrehawm turzia hi i ngaihtuah ngai em? Kan chenna India rama Mizo Kristian tlêmtête phei hi chu sakhaw lian ber Hindu firfiakhovin min nêkchêp a, kan sakhua min dîp ralsak vek an châk em em reng lai pawha kan thlamuan rûkna ber chu Kristiante thlavang hauh tlat ṭhintu America sawrkar leh Kristian ram dangte an awm vang a ni ngei ang. India ram hruaitute rilru sûkthlêk han thlir hian khawvel ram dang (Kristian ramte) mitmei vên tur nei lo se keini Mizo tlemtê Kristiante hi chu min dîm lo hle ang. Chu chu Mosolman tamna state J&K tun hnaia a sawisak duh danah hian a chiang reng a ni. America ram chhunga UNO hmunpui a awm tlat a, an thawkho ṭha em em mai ṭhinte khu a van remchangin, khawvel hnam tê zawkte tan pawh hian a van ṭha em!

Aw le, kan sawi tawh angin hetiang taka America hi khawvelah a pawimawh em avangin a dai sual palha a tlakchhiat pawha pawi ti ber tur chu Mizote hi kan ni ang. Chumi avang chuan kohhran leh mimal ang pawhin kan ṭawngṭaisak ṭhin a, kan la ṭawngṭaisak zel bawk ang. Hei hi a Kristian em em a, a Mizo bawk. Chuvangin, America ram meuh 2020 kuma an President thlang khati taka khawvel hmaa an a mualpho ta mai pawh kha pawi kan lo ti em em a nih kha. Hetih laia Kristiante ngaihtuahnaa langsar em em chu, America rama Kristianna pawlh dala tihchhiat tuma inthlahdah hauh lova hma la reng, Muslim-ho leh America ropuina chhan thurûk hre pha hauh lo, sakhaw lama invawnna ngaithei lova a thiangzau thei ang bera nun duhho, a ram mi ngeite pawh an tâl nasa ta em em mai khu a ni. America ram hian Kumpinu ram angin tlakchhiat lam a pan ve ṭan ta pawh a ang thei ta dawn dawn em?

America ram hian a siam liantu Chanchin Ṭha a tlawmsan phawt chuan vanin a ṭhiat tê leh mai dawn a ni. America ram hian Kumpinu ram angin a ropuina hloh ve ta se, Pathianin Chanchin Ṭha iptepui bànna tur ram dang a siam lian ve leh thung ang em? Nge, vanin khawvela Chanchin Ṭha hril hun hi a duh tawk tawh a, Chanchin Ṭha hril tur ram dang siam len a tum tawh lo zawk ang le? Bible-a kan hmuh angin Jentail-te ni kin hi a hnai tawh a, chu lam hawi chuan khawvel hi a insingsa mek a ni tawh em? Hetih hun hi chu a la awm ngei dawn a ni. Heng zawng zawng pawh hi van lam rorelna hnuaia mi vek a ni, tih chu, 'heti zawnga ngaihtuah ṭhintute thlirna chu a ni reng e.

"Tin, he ram Chanchin Ṭha hi hnam zawng zawng hriattîrna tûrin khawvêl zawng zawngah hrilhin a awm ang; chumi zawhah chuan tâwpna chu a lo thleng ang." (Matthaia 24:14) 

- PC Hmangaihzauva