Smart world ni si, smart lo tial tial
YouTube khawvelin min chiah hneh viau! Kan buaipui lah a ho tual tual niin a lang. Kan society hmasawnna tur leh ṭhanna tur lam aiin, thil ho leh inbàwlna rawng kai kan buaipui ta ber a nih hi!
Khawvel changkanna kan hûm fer fur a, kan kutah thiltihtheihna tam tak a awm! Video camera-man kan ni thei a, editor kan ni thei a, content creator kan ni thei nghal a; 'live' pe chhuak thei kan ni bawk. Chungte chu khawvel hmuha pholang nghal thei kan ni.
A tawi zawngin, video, cinema, cable TV news camera-man, Lammual inkhawmpui 'live' pe chhuaktu ang kha, journalist, movie maker, director etc. etc. nih theih kan ngah ngang mai!
Smart world-ah i smart em
He smart world-ah hian kan smart tel lo a nih chuan heng chhuan (generation) hrang hrang–Generation X (1965-1979), Millennials (1980-1994), Generation Z (1995-2012), Generation Alpha (2013-2025), tunah Generation Beta (2025 aṭangin)-te zingah hian tuar fe fe an awm dawn! Z, Alpha leh Beta te ngaihtuah chung reng hian i smart hrâm hrâm teh ang u.
Smart phone avang hian kan smart lo tial tial a, kan tuipui a nêp tulh tulh a, kan sûkthlêkin ram ropui a kâwk ta meuh lo! Pawltea, Piangtea, Edena leh Zonuni te nupa inhaute vel hi kan society-a mipui sep rawtui ber a nih chhûng chuan chhuan lo la awm zêl turte tan hian entawn tlâk kan awm lo palh ang e! Puan ven i sawi chhîng teh ang u.
Aizawl Treasury Square Court Road vela cyclostyle hun laia chanchinbu inchilh tlat, a káwma 'Ramhuai an hmu' tih vel thupui mak deuh deuh inziak, han leia chhiar tlak tak tak awm leh si lo nunah khan lêt tawh lo hrâm ang u khai!
Social media
Social media kan hman dan hi kan chhût nawn fo a ṭul ta viau mai. Nu leh pa pawhin kan fate kan enthlak reng a hun tak meuh meuh. A tâwka nun, pi leh pute hun ata tawh inzirtirna ṭha kan neihte kha a la 'tunlai' reng a ni tih hriat a ṭul.
Tute emawin an thinur leh an nun pawlawh tak an pholanna hi a tam ta êm êm a, Mizo zingah pawh a tam. Kan en tur bik te, naupang hmuh tur bik kan thliar hran thiam a pawimawh ta hle a ni. TV show-te pawh nu leh pate’n en phal bikte an nei ṭhin angin kan inkhuahkhirh ṭhat a ṭul ta.
Phone-ah hian screen hman hun chhinchhiahna dah vek a ni a, hemi aṭang pawh hian nu leh pate pawhin fa te emaw, tute emaw khuahkhirh dan chintâwk a siam theih. Zalêna insiam chu a ṭha, mahse, a chintâwk a awm tih hi chhuan lo la awm zel turte hian an hriat a ngai ve tlat. Kan rin aiin smart phone khawvel hian min nghawng thui tawh ang.
~ Zoa Tlau, Buannel Cabin