Sap sikul kan uar dan em em hi!

Tun lai Zoram khaw­vel chu hmun tinah han kal ila sorkar primary sikulah kal tur aram an awm ta lo a ni ber mai. Tih laiin sorkar primary sikul, Mizo sikul ni ṭhinte pawh sap sikulah leh a ni deuh vek ta mai. Hei hi kan ṭhatpui ang nge kan chhiat pui zawk dawn tih hriatthiam a har hle.

Mizo sikul a nihlai pawha zirtir ṭha peih mang hlei lo, home work pawh pe ṭha peih mang lo kha chuan sap sikula leh a nih tak avang hian an tih ṭhat peih chuan a rinawm lem lo. A zirtirtute ngei pawhin bel taka an thiam, Mizo ṭawng ngeia an zirtir ṭhin lai pawhin an zirtir ṭha peih si lo a, an thiam chian mang loh sapṭawnga zirtirna han pekte lek phei chu an peih lutuk lo tawp ang.

Kan zirtirtu tam takte hi chu sapṭawng subject han zirtir tlak vak pawha lang lo, subject awm nem te te zirtir tawk vel an ni ve hlawm a. Kan fate leh kan tute sapṭawng nal taka ṭawng thei tura han zirtir atan chuan duhthu an sam vak bik lo a ni. Kawng dang a awm miau si lo a, sapṭawng thiam tak tak si lo, mahni pianpui ṭawng, Mizo ṭawng pawh thiam chiang mang chuang lo hian kan inchhuah mai ang tih a hlauhawm thei rum rum mai.

Kan sorkar hian nga­tinge hetia a Mizo medium sikulte English medium sikula leh a phal tak zel mai le? Naupang an neih tlem tak em vang hi emaw ni dawn, hetia sap sikula let lo hian eng vanga naupang nei tlem ta nge an nih tih hi a bul ṭhum aṭangin chhui se, siamṭhat dan a awm ngei ang.

Zirtirtute hi kan sorkar hian a ngam lo a ni ber a, Mission sikul leh private sikulte chuan an zirtirtute an control tlat a, chu­vangin zirna pawh a ṭha ṭhin. Sorkar sikul zirtirtu, qualified tak tak, teacher training pawh pal chhuak vek tawh awm khawm ni si hian engatinge zirtirna hi an pek ṭhat theih tlat loh ni ang le? A ruaitu sorkar hian discipline a kenkawh ngam loh vang a ni mai lo maw?

Nge sikul endiktute hi tun hma lam, Dis­trict Council-a Zoram a awm lai ang vel khan an awm ta loin kan sikulte hian endik an tawk ngai ta lo te hi kan sikul chhiat chhan chu a lo ni reng zawk em? Tuna a lan dan chuan sorkar sikulte hi zirna tlak vak a ni loin a lang a, an zirtirtute lah sikul hi mutthlak nan leh hlawh pung leh hamṭhatna dang ngaihtuaha sawi khawmna hmun a ni berin a lang.

Mizo medium han hnualsuat a, kan han titawp ringawtte hi chu a lungchhiatthlak khawpin a lang. Mizo­ramah kan cheng a, a ram pum puia chengte ṭawng hman lah Mizo ṭawng a ni. Chutihlaia kan zirna sikula Mizo ṭawng kan hmang duh lo hi chu a hnam hmangaih loh thlak ngawt mai.

Kan sorkar sikul zirtirtute hian Mizo medium-a an zirtir hian sap sikulin an zirtir ang tluka nasa hian zirtir ve sela an naupangte hi distinction-ah an pass tir fai vek theiin a rinawm. Chutih hunah chuan 'an sikul a chhia' tih hi a reh ngei ang.