Written by
- Dr J.T. Vanlalngheta
Ziah Rún, Zonuam East

Lawmman latu khaw pangate kha


Lalthara te Unau Foundation (LUF)-in ramngaw leh nungchate humhalh ṭhate lawmman an hlan ni, 17.1.25-ah khan tel ve tura min sawm angin ka han tel ve a. Nungcha hmangaihtu khaw panga aṭanga lo kalte leh mi dangte a taka ka han tawng chu ka lawm hle. Mizoram, Krista zuitute (Kristian) ram tia hriatah hian nungchate nena chen ho hi kan la thiam lo hle a, a zira zir hmanhmawh a ngai a ni. Nungchate hmelma ena en kan la tam hle tih a lang reng mai a, a vanduaithlâk tak zet a ni. Kan zui ber, kan Lalpa Isua pawh kha Setana nen ni 40 leh zan 40 an inhmachhawn hnu khan hun eng emaw chen chu ramsate chenna a bêl tih kan hre reng si a (Marka 1:13).

LUF khan ram ngaw leh nungchate humhalh ṭha khaw 14 an thlanah khaw 5 an thli fîm leh a, hei hi sumin a daih loh vang niin a lang. He LUF Foundation hminga sum leh pai thawh theite hi awm se aw, tiin ka lo ngaihtuah ve neuh neuh a.

Khaw panga - Leng, N. Mualcheng, Rulkual, Tualbung leh Zote ten ramngaw leh nungcha humhalh ṭhat lawmman Rs 1,00,000 leh citation an dawng ṭheuh hian khaw ṭangrual tak an nihzia a lang chiang hle. A ropuiin 'hmasawnna' kawng dangah pawh khaw ṭangrual thei tak tur an ni tih a chiang reng mai; fak an phu. Nungcha humhalh kawnga hmahruaitu (pioneer), khaw dangte pawhina entawn phû an niin ka hria.

Mizoramah ramngaw leh nungcha hunhalh ṭha khaw 14-te hi lawmman pek kim theih pawh ni teh reng se, khaw awm zat 829 (rf: 2011 C) aṭanga chhut chuan kan ramngaw leh nungchate humhalh kawngah kan zaa tih tur a la tamzia a chiang hle a ni. '... thil siam zawng zawngte chuan beisei em emin Pathian fate lo lanna chu an nghakhlel hle si…’ (Rom 8:19) tih a taka chantir turin ke i pen zel ang u. Puan ven sawi chhing a, kan zaa ṭan a ngai tak zet e. An ei tur kan tihchereu zel avangin min la hnaih tial tial mai thei bawk. Pathian thu angin, ringtute hi min la rawn bêl dawn chauh ni pawhin a lang (... chhiatna bawih ata tihchhuahin an awm ang a, Pathian fate zalenna ropuiah chuan an lût dawn si a: 21 ibid); anmahni tihlum lova Pathian thu anga kan lo chenpui thiam a la ngai dawn chauh; mâwlna kal pêlin rilru inbuatsaih a hun tawh hle.

LUF buatsaiha inhmuh khawmnaah khan hun a tlem vang pawh a ni ang e, lawmman latute aiawha lo kalte bakah khan nungcha leh ramngaw humhalhna lama tawn hriat neite kha thu sawi tura koh tam ni se, tih kha ka duhthusam a lo ni a.

Zo fate tihmingṭhatu, unau thuma UPSC Civil Services Exam kaltlanga IAS-a inziak tlingte unauhoina ramngaw leh nungchate humhalh nana LUF din a, sum leh pai ṭhahnem tak an sêng hi an fakawm e.

- Dr J.T. Vanlalngheta, Ziah Rún, Zonuam East