Early Retirement Rules - 2015 leh MIFCO

MIFCO (Mizo-ram Food & Allied Industries Corpo-ration) Ltd. hi December ni 19, 1989 ah din a ni a. Kum 25 chhung hian sorkarin Equity Share Capital Rs. 20 cr a pe a, tunah hian an khawl leh hmun leh hma hlutna hi Rs. 15 cr man vel a ni tawh ang. Hemi chhung hian loneitute thawh chhuah an leina hi Rs. 10 cr. vel chu a tling tawh maithei.

MIFCO hian din-hmun harsa tak tak tawhin a chang phei chuan thla 7 lai hlawh la lote in a awm ṭhin a. Sorkar lam pawhin a theih ang ang chuan an chhawmdawl ve zel a, mahse thawhchhuah hlawkna awm thei hek lo, a tawpah chuan state sorkar thuneihna sang, Cabinet Meeting chuan privatize turin a rel tlu ta nge nge a ni.

Hetianga privatize tura a rel lai hian PSU dang pahnih te chu close-down an ni tawh bawk a. Tichuan, MIFCO a hnathawk-tute chu privatize a nih dawn avangin Finance Department chuan duhthlan tur pahnih a pe a. (i) Early Retirement hmana a chhuak tur emaw (ii) Private a thawk chhunzawm turin - tih hi duhthlanna a pe a.

MIFCO a thawk zawng zawng mi 77 zinga 56 te chuan Early Retirement hi private-a thawh aiin tiin an thlang a. An zinga mi 13 te chuan sorkar dinglaiah thil ti thei deuh laina hnaivai an neih chhuanlamin sorkarin a offer miah loh, sorkar department a lut turin Minister-te tha chakna hman tumin an phe buai a. Minister-te pawh an zar buai hle a ni awm a. A dang mi 8 te chuan MIFCO privatize a nih thlenga thawk turin rilru siamin an awm ta a ni.

Kan sorkar Finance Department hian heng PSU a thawktute ham-ṭhatna tura ERR-2015 a siam hi thla 12 atan chauh a ni, tiin Gazzettee-ah tihchhuah a ni a, mahse MIFCO a thawkte an la in singsa fel loa a hriat aangin August 15, 2015 thleng hun a hawnsak leh a. Hemi chhunga ERR la duh lote hi chuan ERR a kal hi an tum tawh lo niin a lang.

Heti chung hian tuna MIFCO aṭanga la chhuak duh lote hian an duh hun huna chhuaka ERR avail leh thei tur hian an inngai tlat mai hi a mak hle a ni. ERR-2015 hi Rules a ni a, mimal duhdan a pawhsei theih a nih chuan a Rules siamtute leh sorkar ang pawhin mimal hamṭhatna tura sorkar dan leh hrai palzutna a ni chiang dawn a ni.

Tuna MIFCO thawktu mi 56 ERR hmanga chhuak tate tan hian rilru a na duh hle ang. A chhan chu, anni chuan hun tiam chhungin thuawih takin duhthlanna harsa tak, kum 20 leh a aia tam an lo thawh tawhna loh theih lohna avanga thla tin hlawh pawh nei tawh lo tura an kalsan laia an thawhpuiten mimal hamṭhatna an han tel bik tur hi sorkar an demin, an theih ang anga hmalak an tum ngeiin a rinawm.

Chuvangin, sorkar hi a dan siamah hian nghet takin ding sela, mimal induhsakna avangin he dan hi palzut ni lo sela. Sorkar pawh a zahawm ang a, uitang bauh din zawh loh hian a kal dawn nge, mimal duhsakna avangin bauh dinin a awm zawk dawn i lo thlir teh ang.

- CVL Ruata, BVT