Sahuan sakhi KS (?) vanga inbeihna rapthlak! (Reminiscence of Mini Zoo, Aizawl)
Chawlhni chawhnu her bâwih tawh, 15th January 1995 daih tawh khan Bethlehem Vengthlang, Aizawla kan Sahuan (Mini Zoo) ka enkawl mek chu ka nupui leh fate pathum, naupang fel ve tak tak tawhte lên khawthawnpuina ni pah fâwmin ka zuk fankualpui a. Chu thlasik boruak thiang nuam tak hnuaia thing zara záwng rual ban kual vel leh a piah lawka hauhûk hrâm ri kara sahuan tlawhtu naupangho râk nak nak rite chu hriat a nuamin, rilru pawh a tihahdam nghal sawng sawng a. Kan sazuk 20 rual vel enclosure (Zopa ṭin hnih hmun vela zau) bulah khan kan sakhi (barking deer) paruk rual vel kha paihper hmun vela zaua inngeih taka an tlaho ṭhâm ṭhâm pawh an hmuhnawm hle bawk!
Chutih hun lai vela kan PCCF, thuziak lama miril leh mihring duhtui tak mai, Pu C.P. Oberoi, IFS duh danin kan sahuan kha nungcha chi hrang hrang en turte dinhmun tihhmasawn bakah, a tlawhtute tan len khawthawnna nuam (recreational park) ni pahfâwm turin cheibawl thar (renovate) nan hma thar kan la nasa ve fu mai! Guwahati Zoo aṭangin kan la neih ve ngai loh ramsa lian deuh chi–keite (panthera pardus) nu leh pa, lian ṭha thelh thawlh takte leh sazuk ṭial chi (spotted deer) ilote chawlut tharin, sava in lian chi leh a chhunga dil tête leh a duhte sahuan ram chhung ke lawnga fan kualna (nature trail)-te siam thar a ni a. Enclosure tam tak leh sahuan hmunhma (premises) hrim hrim kha hmun tam tak cheibawl thar a ni a, mipui mamawh (public amenities) eng eng emaw kan siam tharte kha sawi sen a ni mai lo. Khang thil vangte khan emaw ni tehreng ni, hun danga thleng ngai lo–kan ram hruaitu zahawm tak tak–Governor Pu P.R. Kyndiah leh Chief Minister Pu Lal Thanhawla te pawh khan an rawn tlawh ve hial tâk kha!
Mahse le, khami ni teh kher khan eng ramhuai sual nge kha kan sahuan sakhi pachal pakhat thinlungah khan rawn lut ta ni le? Nge, kan sakhi nula hur thak zâ vel (heat) khan an kianga a pa (male counterpart) ho KS-pui châk vang, an zawlaidi (sexual hormones) an tlangzarh ta mai em ni le? Mihringte thluak leh hnara rim hriatna aṭang ringawt chuan thil awm dan dik tak hriat ve phak a ni chiah lo! Kha mit khap kâr leka thil thleng avang khan kan sakhi tleirawl pahnih, tisa châkna thlarau sualin a la zial ât ve lohte dam khawchhuahna (survival) atan khan rálkhêl dar vuak a ngai ta thut mai le!!
Chutianga ni dang ang bawka sahuan nungcha chi hrang hrangte ralmuang taka an khawsakho dial dial lai chuan sakhi ho enclosure-h chuan thâwm danglam tak, ui bauh or hawk ri (tuarh) ang deuh hi a lo chhuak a! Ka'n en nâk chuan, sakhi pa pakhat, ki zum ṭha verh vawrh nei mek chuan a nu hurho (?) laka thikthuchhiat (sexual jeolousy) vang ni maw, a pa dang pahnih, ki zum la nei ve hman lo, ṭha te tea tla ve hle hle lai chu thawklehkhatah a phîn ta phut mai a! Sazuk/sakhi ang chi family-ah hian an ki (antler) hi kum tin a tla/thlawn ṭhin a, tun ṭuma sakhi pa dang pahnihte pawh hi an ki tla ṭo tìr, an la ruh ṭhat hman ve loh lai, insualpui nan a la chan ṭhat ve hman loh lai a nih hlauh avangin a vanduai zawkah an ṭan phah ta a ni.
Tichuan, theihpatawpa chakin an inûm kual ta ziai ziai mai a, a kiin nge a ngho zawkin a pir thler tih pawh hmuh hman lovin a pa ki nei lo pahnihte chu kar lovah an thi dun ta hnuang mai! Hei hi duhtawk mai lovin a phîn nawn zel a, thih thâ tak meuha chakin thir pal enclosure chhungah chuan an inûm kual zel a, an inûmna speed pawh a lo sang thei nangiang mai! An inûm pah chuan (an thinrim vang nge mangan vang?), ui bauh rî (barking) ang mai hian an bauh ri tuar tuar mai a ni. (Hei vang hian a niang, sakhi hi sapṭawngin 'barking deer' an ti a ni âwm e).
A hnu deuhah chuan sazuk enclosure bul hnaiah chuan a pa tleirawl (ki la nei mumal ve lo) hliam tuar pahnihte tlan chau lutuk tawhte chu an rawn bawk thlawp a, an thaw hlawp hlawp tawh mai a. Pakhat chu a hmai, a nghâwng leh a mawngtam kual vel thisenin a bual sen zêih zûih tawh a. Pakhat zawk phei chuan hliampui tak zet a tuar tawh. Hmun dangah a hliam nual bakah, a dul chu a thlêr duai mai a, a pumpui, a ríl leh thin (liver) ṭhenkhatte pawh a uai lang deuh pûr tawh mai a ni! An hliam kha a na dun tawh tak zet.
Mithiam/zirmite sawi dan chuan, nungchate khawvelah hian ramsa chi hrang hrangte hi chhan chi hrang hrang avangin insual buaina a thleng fo a. An insual chhan tlangpuite chu–chaw ei tur inchuhna (competition for food/survival), chenna ram bial inchuhna (territorial dispute), ramsa species thuhmun chhunga a nu hur inchuh, adt. vanga insual buaina (infighting), hotu ber nih inchuhna (battle for dominance), adt. Heng thilte avang hian a bikin sa hel eiho zingah hian insual buai luai luai hi a thleng chàmchí ṭhin a, hei hi an nun dan phung pangngai (normal lifestyle) pawh a nihna chin a awm. Mahse, heng insualna tam berah hi chuan a pakhat zawk a tlawm a, a tlanchhiat (surrender) tawh hi chuan an inṭha-ṭhen a, an inûmzui tawh ngai lo. Sakei chi hrang hrang, savawm leh kan ran vulh–sial, ui, ar, adt insualahte pawh a nih ṭhin hi.
Amaherawhchu, he sakhi pa luhlul leh thîkthu âtchilh tlattu hi chuan hetiang nungchang tluangtlam hi a pu ve tlat lo. A ṭhian te, hliampui tuar mekte chu nakina atan an la rawn hnawksak theih ngai tawh lohna tura dah bo hlen (sîk hlum ṭhak) law a duh a ni ngei ang; a chimawmin a va nunrâwng uchuak bik tak em!
Kha insual buaina dangdai leh boruak chhe zet mai kha tihtawp a nih theih nan kan sahuan staff leh visitor ṭhalai ṭhenkhatte chu sakhi enclosure-ah an tlan lut a, inbeihna chu tlawmngaia ṭhelh turin ka tir lut ta ngawt hlawm a! Mahse, tam tak chuan kha sakhi luhlul leh kawlhsen tak mai zuk counter ngawt kha an phûr lem lo! Hmanlai Mizo upa chuan sakhi tài hliam nih hi an lo duh lo hle a, "Sakhi pachal nghoin a tài hliam tawh mihring chu buh pho veng atan pawh an hmantlak loh," tih thute pawh hi a lo awm a ni âwm e.
Hlauhthawn ang ngei chuan chu’ng sakhi hliampui tuar pahnihte chu a ngai têin a pa ngawhngawl zet mai chuan a bei chhunzawm leh ta! Pakhat zawk chu a ki thirlêna a inbah kawl-âwk avangin kan naute'n nangchingin an chhan chhuak a. Pakhat dang, dul thlêr kak duai zawk nen chuan zankhaw tairêk thlenga kan vety doctor-te’n kan Zoo Hospital-ah theihtawp chhuaha an enkawl zui ngial chung pawhin an nunna erawh an chhan zo ta ngang lo kha a ni a! Hemi ṭuma kan sahuana thil thleng ang hi khawvel sahuan dang khawiah mah a thlen ve pawh ka ring lo! A pawi ka tiin, drama leh mangchhia mai mai ni se a duhawm ka ti khawp mai. Mahse, kan control theih kha a ni bawk si lo.
Thubelh: Nungchate khawvel (animal kingdom)-ah hian ramhnuai or sahuanah pawh a nu hur inchuhna/inthîkna vanga insual buaina hi chu thleng fo mah se, inthahna thleng hial khawpa inkhawih duhna em em hi chu thil thleng ngai lo a ni a, ziak (document) lamah phei chuan hmuh tur a awm meuh ka rin loh avangin he kan tawnhriat (unique experience) dangdai tak mai hi boruaka a thâmral mai mai loh nan a thlen tirh khan khatih hun laia Mizorama periodical magazine lar ber pawl Sakeibaknei (Bi-Weekly) etc velah ka lo ziak nual tawh a. Chhiartu tam takin ngaihnawm an tih avangin hei, kha thil thlen hnu kum 30 vel chiahah ṭhangtharte hriat thar leh atan tiin ka han ziak nawn leh ta a nih hi!
[I do solemnly dedicated this unique article to my beloved colleage Dr K Kire, IPS, PCCF (retired) for his untimely demise on 22nd September, 2024 in Kohima]
- Lalrinmawia, IFS (Rtd)