MIZO TLAWMNGAIHNA HI

Hmanlai kan Mizo pi leh pute khan tlawmngaihna tih hi an ngaihluin an ngai pawimawh em em ṭhin kha a nia. Kan tunlai khawvel changkang chho mek zelah hian he tlawmngaihna hi nunpui tak tak kan awm lain, tlawmngaihna kan nunpui dan erawh a pawnlâng ta hle niin a hriat. Mite mitmei ven avanga tlawmngai ta mai maite pawh a awm theih hial tawh awm e.

Mi tin hian tlawmngaihna chu kan nei vek mai a, kan tlawmngaih dan erawh a inang lo fo. Mi tlawmngai chu khua leh tui ṭha a ni fo angina, amah avangin khawtlang a nuam a, a him a ni. Khawtlangah thihna avanga vanduaite tan leh mi hlawhtlingte tan nawmna leh lawmna a siamsak ṭhin.

Tlawmngaihna hi Mizote ta bik liau liau leh kan pian chhuahpui bik nia ngai kan awm ṭhin. A dikna chen tam tak a awmin a rinawm. Amaherawhchu, khawvela cheng hnam hrang hrangte pawh hian tlawmngaihna hi an nei ve vek tho a, tlawmngaihna an neih dan erawh a dang mahna.

Kan pi leh pute aṭanga kan chhawm tlawmngaihna kan nei hi kan vannei tak zet a ni. Tunlai khawvel changkang chho mek zelah hian ṭhalai nula leh tlangval mai bakah, tleirawlte thlengin a ni ang chu, tlawmngaihna an theihnghilh ta em ni chu aw a tih theih. Kan Mizo tlawmngaihna hlu ral mek nia an hriat leh an sawi ṭhinte hi ṭhalai, nula leh tlangval mai bakah, chhungkaw tinte hian a chhawm nun hna thawk turin ṭan i la thar zel ang u.

Tlawmngaihna tihnun thar leh chungchangah hian khawtlang hruaitute an pawimawh a; kohhran hrang hrangah mahni vengah ṭheuh leh mahni kohhran ṭheuha kan hruaitute’n kan Mizo tlawmngaihna hlu tak ti nun thar hna thawk turin leh ṭan an lak thar leh a pawimawh bawk a. Ṭan la thar sauh sauh tura kan mite hnenah kan zirtir thar a ngaiin a pawimawh tak zet a ni.

A tawp berah chuan, kan Mizo tlawmngaihna hi keiin ka chhawm nun a, ka nunpui loh chuan tu mahin an chhawm nung dawn lo va, tu mahin an nunpui dawn lo. Chuvangin, kei hi ka pawimawh ber i ti ngam zel ang u.

- George L. Ralte, Vaivakawn