KRISTIAN THLANMUAL

INTACH Executive Committee meeting-ah Mission Venga Kristian Thlanmual hi heritage site-a puan ka rawt a, Mission Veng Local Council-ah pawh ka rawtna ziakin ka thehlut bawk. Ka rawtna chhan hi sawi hmasak phawt a ṭulin ka hria.

Hmânlai chuan Mizote’n thlanmual bik kan nei ngai lo va; mi tin kha mahni kawtah te, in hnuaiah te, thingkhawn hnuaiah te, kâwmkâr leh kawtkaiahte kan inphûm mai ṭhin. Chuvangte pawh a ni ang, khaw hmun ngai rei tak luah hi hrisel lovah ngaiin kan pêm thuai thuai a; khaw thar kai reng mai kan ni a, thlan hmun bik neih ṭul tihna pawh a awm lo.

Mission Veng (tun hmaa a hming–Hriangmual), kan missionary Pu Zosaphluia leh Pu Zosapthara ten Kristian veng ni tura khaw nghet an din khan thianghlimna leh hrisel zawk nan kum 1905-ah thlanmual an lo neihpui ṭan a, Mizorama thlanmual hmasa ber a ni (C. Vanlallawma – Hringlang Tlang p-337).

Pu C. Vanlallawma sawi dan chuan, kum 1929 khan Mizo leh Vai Chanchinbu Editor Pu Makthanga’n khaw tinin thlanmual neih a ṭulzia sei deuh fe a ziak a. Chutah chuan Mission Veng Kristian thlanmual leh Saitual lal Dorawta te, Zotlang lal Thanghuta te, Durtlang lal M. Suaka te pawhin thlanmual an neih tawh thu a ziak a (Lalaudinga–Mizoram Political History 1890-2023 p-48). Mission Venga thlanmual an neih tirh chuan tlangval thlân lai ho hnenah Pu Saphluia chuan, “Hmun ren rawh u, tun hnuah a la chêp lutuk ang a, kan mangang ang e” a ti ṭhin a; tlangval thlân lai ho pawhin Pu Hluia thusawi hi an zâwm ve nghal viau a ni awm e.

Makthanga nawrna avangin Bawrhsap (Superintendent) chuan kum 1930-ah chuan khaw tinte thlanmual nei tura thupek a rawn chhuah ta a (Mizo leh Vai Chanchinbu 1930, May p-82):

“Tun chinah lal khuate’n mitthi an phûmna hmun ‘Thlanmual’ a hran nei se la a ṭha em em a ni. Khawlai thlêr leh kawngka bul lawka mitthi phûm hi a ṭha lo a ni. Tun chinah khawdaiah mitthi phumna ‘Thlanmual’ hmun a hranin siam tur a ni. Thu anga siam lo an awm chuan a pawi ang, tuikhura luang lut thei lo lamah ni rawh se.”

CGG Helme, Superintendent

Heta chinah hian Mizoram khaw tinah thlanmual neih a lo ni ta a ni. Hei hi Pu T. Lawmthanga, kum 1915-a Mission Venga piang leh seiliante leh a ṭhiante Upa Chawngzika leh Pu Bawihṭhuama, Mission Venga piang leh seilian Mission bêl ṭheuhte pawh khan min hrilh dan a ni.

Tunah kum 120 dawn a lo liam ta a, Mizo thlanmual neih hmasak ber, tun thlenga a la him hi heritage a ni tak meuh meuh a, roh taka enkawl leh venhim a ngai tak zet a ni.

Tute nge he thlanmualah hian an phûm hmasak ber tih leh mi engzat nge an phûm tih kan hre thei tawh lo. Amaherawhchu, Mizo mi lar eng emaw zat phûmna a ni, chung zinga tlemte hming lo tarlang ila:

• Rev. Chhuahkhama hi chu pastor hmasa ber a nih avangin Mission Veng Biak In kawtah phûm a ni.

• Rev. Liangkhaia, Great Bible Teacher, Historian, Writer & Hla phuahtu ropui.

• Ch. Pasena, Sap rama lehkha zir hmasa ber, ‘Zirtirtute zirtirtu’ an tih ṭhin kha.

• Rokunga, Poet of the Century.

• P.S. Chawngthu, AIR artist hmasa ber, hla phuah thiam.

• Chhingtei, Mizo Bible Women hmasa.

• Khûma, Mizo zinga baptisma chang hmasa ber.

• C.Z. Huala, Great Language Teacher (Bawrhsap leh Lt.Governor te Zo ṭawng zirtirtu, harhna hla phuahtu)

• Zalawra, MSSU Pa, Shillong-a a accident avanga phûm, a tu leh fate’n a ruhro an phûm nawnna.

• K. Zawla, Mizo Historian.

• Nutei, Mizo hmeichhia matric pass hmasa ber.

• D. Ṭhianga, Kohhran pharmacist hmasa ber.

• Laimana, Lunglei lam MNF hotu ber Aizawla lo zin, MNF movement avanga thi hmasa ber. January 1, 1966 Inrinni zanah Aizawl Tuikual Vengah kah hlum a ni. Kutthlaktute ngei interview a ni a, a thlân laitu zinga mi ngei Pu C. Hmingthanga pawh interview a ni.

• Unknown 13s, IAF jet fighter-in March 5 & 6, 1966-a Aizawl a bomb avanga thite. Missionary Rev. A. Roberts-a leh ATC zirlaite’n an lak khawma an phûmna a ni. ATC zirlai tel ve ngei Rev. R. Vanbela’n min hrilh.

December 11, 2024 khan INTACH-in Serkawn BCM Museum-a Pu Buanga te nupa thlânlung hlui London aṭanga an hmuh chhuah kan en a. Pu K. Lalsanga, Ex-MLA-in an zawn reizia leh Pathianin remhriatna a pek avanga an hmuh dan te, Zorama lak chhuah an dil dan te, lawng liana an thawn dante a sawi a; a va hlu em!

Mission Veng Kristian Thlanmual heritage site leh protected monument ni tura humhalh zui dan tur chu INTACH leh Mission Veng Local Council te, Synod hial pawhin ngaihtuah zui a ṭha khawp ang. Thil hi kan ngaih pawimawh chuan a pawimawh mai a ni.

- Prof. JV Hluna, INTACH Co-Convener