Thisen hlu! Thisen hlu!

Tunlai hian kohhran ṭhalai pawlte’n thisen pek (blood donation) an uar a, an ti ṭha hle mai, a lawmawm tak zet a ni. Ni tin deuh thawin chanchinbuah eng kohhran ber emaw ṭhalai pawlte thisen pek thu kan hmu ṭhin hi a mamawh leh a dawngtu dinhmun a han din chiah hian a lawmawm zual a ni. Voluntary blood donation lama hma latute an lo awm leh zelte hi thil ropui tak a ni. Thisen pawimawhzia hi keini thiamna nei lo chuan kan sawi thiam lo, kan Pathian thua kan hmuh leh Bible leh Bible pawn lama hman a nih dante lo sawi ila.

Kan Pathian thu chuan, "Nunna chu thisenah chuan a awm si," tiin min hrilh a. Thisen chungchang thu hi Leviticus-ah hian kan hmu ṭeuh mai. Thisen ei a phal lo va, Israel hote zingah thisen eitu chu a chipuite zingah tuithlârin ka awmtir ang, a ti a. Tin, "Nunna atana inremna siamna chu thisen ngei chu a ni,” a ti bawk (Lev. 17: 11)

Mizote hian Kristian kan nih hma aṭangin thisen hi inthawina atan kan hmang ṭhin tih kan hria. Sa-uitan tih te, inremna atan–ar, vawk, etc kan lo hmang tawh a nih kha. Sawi tam ngai lovin kan hre vek e.

Kan Pathian thuah lo lut leh ila; "Thisen chu in ei tur a ni lo," tih kan hmu. Rilrua lo awm ta chu, keini ho hian sa a thisen chawpin kan ei fo mai niin a lang a, sa thithun ei ṭhin kan ni.

Ka fanu hian chakai hi a ei duh chhunte zinga mi a ni a; chakai hi eisualte an awm ṭhin avangin kan chhum so sawk a, a tui kan paih a, chumi hnuin kan chhum hmin ta ṭhin a. A lo rei a, kan Bible-in a lo sawi bawk nen, mahni inah chuan chakai chauh ni lovin, eng sa pawh, a tui hmasa (minute 5 vel chhumna) kan paih ta zel a ni. Mahni ngaihṭhatna mai bakah a hriselin ka ring deuh tlat ta mai.

Ringtu, Krista thisena tlante kan nih avangin kan fakna hlaahte ngei pawh Krista thisen, kan tana pek, hlutna leh chawimawi, fakna thu a tam hle. ‘Thisen, thisen, tiin bâng lovin kan zai ang,’ tih te. Ka man thisen a ni, Vanlal ta ka lo ni, etc. etc. kan ngah mai. Ringtu nun siam tharna hla tam zawk hi chu Kraws lam leh Krista thisena tlenfai kan nihna lam hlate a ni.

Kan sawi tum tak lamah lut ila; kan tisa damna atan a mamawhte tan thisen pek hi kan ṭhalaite’n uar zel teh se, a hlu em mai. June 25, 2024 zan khan kan nu (ka nupui) û hi Ebenezer Medical Centre, Aizawlah zai a ni a, thisen unit 4 emaw kha pek a ngai a. Hmanhmawh takin Civil Hospital leh Synod Hospital-te kan han bia a, mahse, thisen pek tur blood bank-ah an lo nei hauh lo. A hma ni 24th June Vanglaini-ah khan thisen unit 319 an pek thu ka lo chhiar a. Kan nu u thichhawnga awm pek tur ni khat chauh chhunga a lo zo hman kha mak ka ti a. Thisen hlutzia leh kan ṭhalaite’n an 'donate' ṭhin hlutziate min hriat chhuahtir nasa hle. Kan ṭhalai pawl -ṬKP, KṬP, SAY, PYD, etc thisen pe ṭhinte an ti ṭha hle a, sim lovin pe zel teh se.

Thisen hlu! Thisen hlu!

- Rev Biaka Chinzah