Zu dawr hawn belh leh hmun thianghlim siam belh kan mamawh!

Hman ni chu Millennium Centre-a kan awm laiin ruah a sur thut mai a, a sur hnem phian mai lehnghal a. ‘Kan’ ka tih chhan tak chu ka fanu hruaia kal ka nih vang a ni. Chhuak leh mai thei lovin ruah chuan hun eng emaw chen chu min dang a. Tih tur em em ka neih lem loh avangin vai zu an zawrhna hmun ka enkual ta mai mai a. Vai zu dawr kawtah zu lei phalna nei, zu lei duh an lo tlim hmur mai a. Ruah a sur hnem deuh avangin pawn lamah thui tak intlar theih a ni lo va, corridor zau takah an lo ding khat mup mai a. Hmeichhia chu an awm ve a, mahse an tam lem lo. Chutih lai chuan whatsapp-ah Kelkang hmun thianghlima leng lo khawp mipui tlim hmur mai chu ka hmu a. Hmun thianghlim chu a zau zawk daih a, mi an tam zawk bawk.

Amah lah chu a tawi si a, kan tih fo ṭhin- mipui an tam vanga tawi leh ta zawk Zakaia chanchin ang deuhin zu dawr kawt chu zu lei duh an tam tham em avangin a zau tawk lo hle a ni. Power supply ṭhat loh lai a ni a, a thim ruih mai a. Vai zu duh chuti zozai pungkhawm thla chu lak ka duh deuh nachungin ka la ta lem lo va. Patling leh nutling zu duh ding huang mai chu an lainatawm hlein ka hria. In lamah pa ber, nupui fanaute zinga thingpui inna no lian bik nei leh ṭhutna bik nei rual meuh te pawh an kat nuk mai a. Changkang taka an in tur zu ṭha kan hlui a nih rau rau chuan, changkang taka zu ṭha an lei dan tur te pawh ruahman awm takah ka ngai a.

Eng pawh chu lo ni ta tehreng se, zu lei phalna nei mi sing chuang an awm laia zu dawr a tlem lutuk chu ‘sa ṭahchhuak pek’ an tih ang lek fang a ni. Zu zuartu tur an thlang uluk em a, zu lei phalna pe chhuak turin an fimkhur bawk si a, zurui control dan tur buaipui a hautak bawk si nen, zu dawr an lo hlamchhiah palh hlauh te pawh a ni mai thei. Corporation ropui tak tak kutah zu zawrh hna an burbun avangin an ngaih a ṭha lu deuh te pawh a ni mahna.

Zawrh an tumna hmun pakhat, Zarkawt Vengah lah chuan Presbyterian kohhran hovin zu dawr hawn an phal lo tih thawmthang te chu kan hria a. Kohhran hian englai mahin zu zawrh an phal ngai lo va, an phal dawn lo tih te chu an hria a, kan hre tlang vek a; rawn ṭulah pawh an ngai lo kha a ni a. Zu zawrh phalna nei leh zu lei phalna nei te hi kohhranin engtin tak ti zel ang maw?

Veng hrang hrang chuan an area chhunga zu dawr siam an phal loh thuin MLPC Act chu hlam angin a zui a. Dodalna nasa tak karah MLPC Act chu pa tak, huaisen takin an pass ngam a. Dan lova zu zuar tur ni hlei lo, dan ang thlapa sawrkar remtihna lehnghala zu dawr hawn chu engati nge a harsat em em?

Mipui pawngpawrhin zu zuartute an tlangchil an hlau a, an ensan mai an hlauhthawnpui rilruk vang em ni zawk? Mipui an lungawi loh a, an lungawi loh tak zet chuan zu dawr neitute ensan leh tlangchil te chu thil awm thei chu a ni teh meuh mai. Mahse, heng te chu hriat sa a ni a, thil thar a ni lo a, phuahchawp lah a ni hek lo. Mizo hnam dan a ni a, pi pu hun ata kan hnam dan a ni daih tawh. Kristian kan nih hnu hi chuan tlangchil leh ensan hi thil vang tak a ni a, kei chuan hlauh em em turah ka ngai hran lo.

Heti taka zu dawr hawn a harsat a, sum harsatna a nasat em em bawk si hi chuan zu zawrh nan office pindan hman ni ta mai se, department tam tak tan sum hnar ṭha tak a ni ang a; ‘sum ṭha hmu, sum ṭha hmu,’ tiin department lian deuh phei chuan room tam tak an hmantir phal ngeiin ka ring. Ka rawt tur chu a ni chiah lo va, ka rawt tihna pawh ni lo mai teh se. Thuneitute chuan ruahmanna ṭha zawk chu an neih ngei ka ring a, an la hmanhmawh rih lo a ni mai thei bawk.

Khawchhak kilkhawr, khaw te tak te mai- Kelkang daia hmun thianghlima luh tum an inhawr khawm tup tup laiin khawpui laili, kristian kan nih kum za tlin hriat rengna Millennium Centre ropui tak maiah chuan zu lei tum an inhawr khawm tup tup a. Ramhnuai leh hmun kilkhawrah Thlarau Thianglim kan buaipui a, khawpui laili leh hmun ualauah zu kan buaipui thung a. Ram pawn aṭanga Thlarau Thianghlim chhima Kelkang dai an rawn pan mek laiin kan rama corporation lian pui pui pathum lai mai chuan ram pawn lama hnam dang zu siam an zuar a, an buai ve mek bawk a. Hnam dangin kan rama harhna a thlawna an chhim laiin, keinin hnam dang zu siam sa sum tam tak sengin kan chhim ve thung a. Harhna chhimin ram hla tak aṭangin an lo kal a, keinin ram hla tak aṭangin zu kan chawlut ve mek a. Kan rama harhna zarzo tum ram dang mi an lo kal laiin kan ram industry develop tumin ram dang zu kan zuar ve ta hlauh thung a….

Kelkang hmun thianghlim pantu mi sing khat emaw lai an tlin chang a awm a, a hmunhmain a dawl zo lo hle a ni. Chutih lai chuan zu lei phalna nei mi sing chuang an awm a, zu an inchan lo nasa hle mai bawk a. Zu lei duh leh Thlarau Thianghlim duhtute chu a hmunhmain min dawl zo ngang lo a ni ber mai. Chu vang chuan zu dawr hawn belh leh, hmun thianghlim siam belh kan mamawh!