Hâlpuah hâl lo ang u aw

Mizoram sorkar leh Central YMA ṭangkawp chuan Krismas vuakvetah halpuah leh a kaihnawih hâl lo turin Zoram mipui an ngen a, zawm pawh a la hlawh viau. Mahse, kumhlui thlah zan hi hâl loin kan paltlang thei ang e maw, Mizo, thuawih lo hnam hian.

Halpuah hâl lo tura sorkarin thupek a chhuah rualin heng kaihhnawih hi zuar lo turin thupek a chhuah tawh bawk a. Chuti chung chuan halpuah leh a kaihnawih mansak an awm ta nual mai a, a pawi hle. Heng an mansakte hi Mizo ngei an ni bawk si. Thu awih lo hnam chu kan ni chiang.

Halpuah leh a kaihhnawih zên khu rim hi a hrisel lo em em a, thâwk lama harsatna nei tan phei chuan he hun hi huphurhawm tak a ni. Thâwk lama harsatna nei lo, lung lam harsatna nei tan hlei hlei hian a hlauhawm em em a ni. Ri dur mai an hriatte hian thih thut theihna khawpin an tan a hlauhawm a, chung mite chu an khawngaihthlak em em a ni.

Hriselna atana ṭha lo lutuk, sum tihek bawk si hi eng vanga hâl kan châk tlat nge kan nih le? A mâwl thlak piah lamah mi dang tana pawi lutuk a ni bawk si tih hi kan hriat a va ngai em!

Vai puja lai chuan vai ramahte an hâl chuah chuah a, a khu rum rum mai a; boruak chhia a pek chhuah nasatzia kan hre ve vek bawk si a. Eng vanga Kristian ramah kan Kristianna nen inmil miah lo halpuah, halmawi leh a dangte hi kan chin tlat ni le? Vai ho chin ṭha lo kan la lut vel mai mai a, an chin ang ṭha lo hi ching ve duh miah lo teh ang u.

Kum hlui thlah nan pawh halpuah hâl kher loin a liam ve thei tho tih kan hriat a ṭha ngawt mai. Nuam ti taka kan hâl hian mihring hrisel lote’n an tuar em em a, thihpuina tur hial khawpa heng zên khute hi a ṭha lo em em a ni. Nuam kan tih viau khan damlo leh chak lote’n an tuar nasa hle tih i hre mawlh teh ang u.

Halpuah leh a kaihnawih thil hrang hrangte hi a man a tam duh viau bawk a. Mi lian leh mi tê ber thlengin hâl nuam kan ti tlat mai bawk si a. Chuvangin mi lian leh hausate u, insûm hram hram teh u khai. Mi rethei zawkte’n in thil chin ṭha lo tak hi kan chin ve loh nan.

- Lal Rinmawia