Kan ram an awp phal ngai suh!

Aizawl khawpui ṭhan chakzia, sumdawnna kawnga a inzar pharh nasatzia hi ni tin hmuh theih emaw tih mai tur a ni. Chutih laia heng sumdawnna kawnga huang zauhtute hi an nihna dik tak i hria em? Hre si lovin i lo ngaisangin, i lo ngaihlu viau hlawm em? Tun hunah Zoram hian mi thar a hmelhriat ṭan mek a. Heng mite hi tu dang ni lovin, dikhlel taka sum la luta inla mi lian, kohhran leh khawtlang tana an sum neih ui miah lova inphalrai mekte an ni si a.

An hming lam meuha anmahni tarlan hi châkawm tak a ni. Awlsam taka branded dawr hawng pawp pawp thei te, ram zau tak tak lei pup pup thei te, in leh lo ropui sa mup mup theite an kat nuk a nih hi. Mahse, hmân ata tawh sumdawnna nghet taka lo kalpui tawh, kum tam tak chhûnga an thawhrim rah vanga mi lian kan tihte hi, heng kan mi sawite zingah hian an tel hauh si lo. Kan sumdawng nghet leh liante tih hleih theih loh chu awlsam takin an rawn ti zung zung a, sumdawnna huang zauhin, an sum thiltihtheihna hmangin zawiin min awp ṭan ta mek a nih hi.

Hman ni lawka rawn sumdawng ve mai, hman ni lawka tu an nih pawh kan hriat loh, rawn che thei ta êm êm site hi Zoramah an tam sâwt viau mai. Khehpuam, chiahpuam, kuhva tawlh, petrol leh diesel dan loa hralh hmanga inla lian an ni deuh zel ang. Heng mite hi khawvel danah chuan îtawm tak, awhawm kan tih ang tur an ni ngei mai. An smart a, an sum peipun dan an thiam a, vantlang hmuh turah lah mi thianghlim ber angin an inlan thiam bawk si. Chuvangin, ram leh hnam hmelma anga en kan harsat tlat a ni.

Heng mite, hrisel ṭha phian, an thil tih apianga hlawhtling thei phian, malsawmna dawng mawlh mawlhtute ang avang hian Sam ziaktu pakhat Asafa pawh khan Pathian a phatsan phah ṭêp a nih kha. Nimahsela, heng mite tan Pathian hnaih hi tih theih loh tluk a nih tawh avangin, tihboralin an awm ngei dâwn a ni zawk. Eng vangin nge an tan sim a harsat? Sum hi an tan hmuh theih pathian ropui ber a ni tawh a; nawmsakna aṭanga tla hrang a, Zakaia anga sim hi an tan lungpuia liluh tum ang maia harsa a ni tawh tlat a ni.

Sum an lak luh thúr thúr avangin heng mite hi awt ngai suh. Thil tam takah an sum hmanga thil ṭha an tih avangin fakin tlawn huam hek suh. Lalpa hnenah tlu lut zawk la, nakinah vana i lawmman tur thlir nachâng hriain, dik tak leh fel takin thawk rim zawk ang che. Mahse, he thurawn hi kohhran leh khawtlang, pâwl leh mimal angin kan pawm hlei thei meuh si lo. Heng mite hian kohhran, khawtlang, pâwl leh mimal mamawh phuhrûk turin an neih an ui miau loh avang leh, a leh a linga mite tana malsawmna an nih tlat si avangin tu mahin kan thinhrik hlei thei meuh lo chu a nih hi.

Zoram hi thluaka sum lut natna veite'n an luah khat ṭan mek a, mi tam tak hausak châkin an tlan mek a nih hi. Chutiang mite thununna dan mumal a awm loh avangin zalen takin kan ramah an khawsa a; zah ahnêkin vantlang zingah langsar takin an inlâr ngam ta.

Dik lo taka sum la luta inla mi liante'n kan ram awp an tum hi kan phal tur a ni lo. Nakin lâwkah chuan tun aia nasa zawkin ram roêlnaah inhnim phûm tumin ṭan an la zual sauh dawn tih hi, ni chhuak ang maia chiang a ni. Tun apangin chutiang mite chuan ram politik an khel tawh a ni si a. An sum lo hnar zo lo party hruaitu kan ramah an tam bawk si nen, heng mite hian ro min la rêlsak lo ang tih sawi ngam a har ta a nih hi.

Chuvangin, an hnung lam aṭangin nuih tet tet ngam rawh. Nupui pasalah an thlahte pawh nei lo ngam rawh. Heng mite hausakna leh thilphalna tel lova engmah ti thei lova inngaihna nghet tak kan neih hma ngeiin, heng mite hi tun aṭangin a langa kan dodal ngam a hun ta hle. Zoram mipui hi thiam taka min salbeh loh nan, harhfîma heng mite laka inthiarfihlim hi kan tihmâkmawh a ni tih i hre mawlh ang u. He khawvel chauh thlir lovin, Pathian lal ram thlir chung zelin, heng mite ṭhianah hian a ṭan pawh ṭang lo ngam zawk ang che. An chungah Pathianin ro a la rêl ngei dâwn a ni si a.

- Lalremliana Pachuau