Zu zuar leh mai ang u

Zu hi ṭha ka hauh lo a, zu in pawh ka ngaisang lo. Khawvelah hian zu awm lo se tih hi ka duhdan a ni. Mah se, hei erawh ka chiang keiin zu ṭha ka tih loh vang ngawt hian khawvelah hian zu a awm dawn lo tih hi a dik tlat lo. 

Mizoramah hun rei tak zu zawrh a nih loh hnuin, Congress sorkar hnuaiah khan zu zawrh leh a ni. Zu zawrh ṭha titu leh ti lotu an tam a, zu zawrh ṭan tirh lai khan zu rui an tam hle bawk - a in lo thleng thleng an rui sup sup a nih kha! 

Zu zawrh ṭan a ni a, zu in duhho an intlar put put a. Hun a rei a, wine shop a lun lo telh telh a, khawlaia zurui pawh an vang tulh tulh. Khawlaiah zurui hmuh tur an awm lo ka ti hauh lo, mahse kan zawrh rei deuh hnu kha chuan zu zawrh hma leh tun ṭuma zu kan zawrh loh leh hnu aiin khawlaia zurui an tlem zawk ngeiin ka ring. 

MNF sorkar chuan an intiam ang ngeiin sorkarna an chan hnu lawkah zu zawrh an titawp. Chutihrualin zu erawh a van phah chuang si lo. 

Covid-19 avanga inkharkhip khauh zual deuh lai erawh kha chuan a vang. Kan inthlah dul deuh a, zu a vang lo zui leh nghal.

Zep rual a awm lo tu sorkar mah hian zu hi an khap hneh meuh lo chu a ni. Keini ang state force nei tlem tak tan phei chuan khap hneh rual a ni lo ang. 

Ka sawi tawh angin zu hi awm loin, in awm miah lo se duhthusam a ni. Mah se, khap burna hnuaiah hian zu in tur a awm reng tho a, a nei deuhin zu ṭha an in a, nei lo deuhin zu ṭha lo deuh, engtia siam nge tih pawh hriat chian loh an in a ni berin a lang. 

Zu in duhte'n in tur an hmu reng a, a senchi pawh a duh chuan an hmu reng thei an ti. Zu man erawh a to deuh a niawm e. A hlawkna tel ber turte chu dan loa thil ti leh tuna buaina kan neihpui mek, Lailapur leh Bagha vai ho khu an ni ngei ang.