Darkar 1-a sikul ṭan hma

"Sikul ṭan hma chu kan tlin lo," kan tih dawn chuan kan ṭan hma ve phawt a, rei tak hman ve phawt a ngaiin ka ring a, sikul kan ṭan hma dawn chauha kan tlin loh thu lo hre thawt thawtho hi chu an rilru a chak ka ti a, camping luh zana inhlan thlap ang deuh an ni.

Sikul ṭan hma kan tih hian kan phawk hrawl leh lutuk a, a ken tel chi hrang hrang ni theia kan hriatte kan la khawm a, kan buai zoin ka hria. Tichuan, sikul ṭan hma thlawpho pawh hian an ti leh lutuk bawk a, thil chi hrang hrang an la khawm a, day light saving time leh state dangte sikul kal dante an rawn la khawm chiam chiam a. Heng thil hi chu lak khawm vak a ngai lo, darkar khat leka ṭan hma kan ni tihah hian chiang ila a tawk viau.

Inkhawm hun pawh an thlak fo a ni lawm ni? Zan lamah hian dar 6:00-ah inkhawm ṭan chang a awm a, 6:30-ah a changin an ṭan a, tunlai hi chuan dar 7:00-ah an ṭan leh tawh a, darkar khat laiin a inthlau ve ṭhin a ni tihte pawh hi hre ta phawt mai ila a ṭha awm e. Tichuan, han sawi ta zel ila, tuna sikul ṭan hma pawh hi darkar khata ṭan hma lek a ni mai, lak ulh lutuk tur a ni lo.

Darkar khata ṭan hma avanga naupang sualtir kher tum hi kei chu ka pawm thiam ve zawng a ni der lo mai. Darkar khata ṭan hma vanga chhungkaw buai let tawp tura ngaih pawh hi kei ka pawm thei chuang lova, darkar khata thawh hma mai kha a solution chu a ni mai tih hi keia rin dan chu a ni.

Darkar khata ṭan hma avanga ram puma buai tum a ṭul lo a, darkar khata kal hma tura rilru siam mai hi a ṭha tawk viau a ni. Buai chung loin i awm thiam tlang ang u.

Darkar khat chauh kan han ti tak nain chu darkar khat chuan kan hun hman danah nasa takin min pui thung dawn a ni. Naupangin dar 8-ah sikul an ṭan avangin naupang nei chhungkua chu dar 8-ah kan inpeih at tawh a, office kal tur pawh kan duh chuan a hun takah kan thleng thei, kan peih lo tlang deuh ṭhin hi chu a pawi khawp mai. Dawr pawh kan duh leh kan hawng hma thei tawh ang a, nitina inhlawh chawp tan hlei hlei a ṭhain ka hria.

Thingtlang lamin, "Khawpui traffic jam vanga lo kal hma," tihte hi sawi sawi loh tur, tun hi thingtlang timing zawk a nih hi. Thingtlangah chuan dar 7 - 7:30-ah tuk-ṭhuan kan ei deuh vek tawh a, feh turin hma takah kan chhuak thei zawk a, sikul naupang neite chu kan feh tlai zawk a ni lom ni.

Mi thiltih sawisel châk hrim hrim hi kan awmin ka hria a, zirlai pawlte pawh hian a enga mah hmaa sawisela do nghal mai lo hian eng emaw chen kan hman zet hnuah a ṭhat lohna hria se, chumi hnuah chuan a ṭha zawk chu rawn sawi mai se.

Tunah thla khat pawh kalpui hmaa sawi tur hriat lutuk hi chu mak ka lo ti ve mai mai a ni. Darkar khata hma hi i helh lutuk lo ang u.