Khualzin phur lirthei chuan man leh tourism

Vanglaini 9.9.24 chhuakah chuan man (fare) bituk zawm ṭhat loh vangin 'online cab booking' kalpui a nih tur thu kan lo chhiar a. Mipuite’n chuan man (fare) dik tak an chawi a, awlsam zawka lirthei hman (hire) tur an koh theih nana online 'cab booking service' kalpui a nih tur thu han hriat hian hun rei lo te chhungin sawrkar thar hian thil thar ṭha tak, mi retheite phurrit chhawk zangkhaina chi khat atan hma a la a ni tih tar langtu a ni a, a lawmawm hle mai.

Khualzin phur lirthei neitute’n dan kalha lirthei chuan man an lak palh chuan Mizoram chhunga zin mite lakah kan Pathian hming an tichhia mai ni loin, ram pawn aṭanga rawn zinteah hlei hlei hian Zo fate hming tihchhiatna leh Kristianna hming tihhliauna a ni thei a; chuvangin, Transport department hmalakna hi a ṭha tak zet a ni.

Amaherawhchu, hetia thil thar kan ti dawn rau rau a nih chuan two-wheeler taxi tiamin, car taxi koh nan pawh online leh offline hi hman kawp ni thei se. Vai rama Uber system an hman pawh chuan man dik tak inpekna a nih piah lamah, a him bikin a ṭha viau a ni. Internet awm loh emaw, a muan châng a awm ṭhin avang erawh chuan online chauh erawh chu a him lo vang. Lam hla deuh kal tur atana pre-paid taxi system tihchhuah pawh hi rawt nahawm tak a ni a; a chhan chu a him a, fare hi a fair zawk nge nge bawk avangin tourism promote-na ṭha tak a tling ngei bawk ang.

Dik tak chuan, hmel hriat loh emaw, mi nei nung hmel deuhte emaw, hmel hriat sa emawte’na chuan man an pek hi a inan loh zung theih chuan a ṭha lo a; Zoram pum mualphona a ni theih bakah state pawn aṭanga khualzinte lakah kan mualpho dawn bawk a. Kan mualpho reng tawh zawk em tih erawh chu he thu ziah chhiartute chhanah dah ila. Kan lo mualpho tawh a nih phei chuan khualzin kan hîp lo mai ni lovin, khualzin (tourist)-te laka kan hlâwkna tur a kiam duai tawh tihna a ni thei bawk ang.

State pawn aṭanga Mizorama lo zinte lakah hian hawihhâwm i chhuah sauh sauh ang u, tiin thu ka'n ti tawp hlauh ang e.

- Dr JT Vanlalngheta