I nu leh pa zah rawh

Kan nu leh pate tluka min hmangaihtu, kan tana engkim tuar huam an awm ngai lo ang a, kan nu leh pate tluka kan tana hlu leh ropui an awm ngai bawk hek lo ang. Kan nu leh pate hi kan lei pathian, kan engkima kan engkim an ni. Chuvang chuan eng ang mi pawh nimahse kan zahin, kan chawimawi thiam hle tur a ni.

Tunlai ṭhalai tam tak chuan mahni nu leh pate hlutna leh ropuinate pawh an hre tawh lo fo a, chung vang chuan an nu leh pate rilru an tina fo a, an ti ṭap fo a ni. Hringtu nu leh pate kut thlak duh hial ṭhin te phei hi chuan an damchhung zawngin lei malsawmna an dawn ngai hi ka ring lo a, eng ang mi pawh ni se, mite zah leh chung en an hlawh ngaiin ka ring lo bawk.

Zu i rui a, damdawi i rui a, khawtlangah buaina leh harsatna i thlen a nih pawn i nu leh pate chu buaina siamsak ngai suh. A chhan chu maw, i tan theih tawp an chhuah a, hreawm tam tak an lo tawk a, nangmah avangin mite hmuhsit leh ngaihnep hial an lo hlawh tawh a, nangmah avangin bianga thlantui far zawih zawih khawpin hna an lo thawk a, an chunga awm, an pi leh pute thu thuin kum tam ni an lo hmang liam tawh a, rual i awh an hlauh em avangin i tan theihtawp an lo chhuah tawh ṭhin a sin. Chutiang anga i tana an lo thawhna zawng zawng chu i hai­der ngam dawn em ni?

Tuna i nu leh pate laka i khawsak dan ang khan nupui pasal i neih hunah, i faten i lakah an rawn ti ve turah han dah chhin la, ṭha i ti meuh ang em? Nang ai i nu leh pate kha an zir sang lo zawk a, an mawl zawk a nih pawn hmusit suh la, nuihsawh ngai bawk suh; i nu leh pate thawhrimna avang chauha tun dinhmun kha thleng thei i ni si a.

Nu leh pate u, nangni pawh in fate entawn tlak leh zir tlak, zah leh ngaihsan tlak tlakin awm tum ve ula, in nun uluk ang che u. Nu leh pa tam tak chuan, fate entawn tura nun an tum ngai lo a, fa enkawl kawngah an hlawhchham fo reng a ni.

Zu in reng chung leh eiru reng chunga i fanu fapa kha ruihhlo ti lo tur leh eirukna laka fihlim tura i hrilh fo chuan, i fate khan i thusawi kha an zawm mawh khawp ang.

Mihring chu inzah tawn a, thu ṭha inhrilh tawn tur kan ni a, chuvang chuan in fate pawh zah dan thiam ve ula, thu ṭha zawk an hrilh hriat theih nan che u in rilru in fate lakah hawng zau rawh u. Ka fanu fapain min zilh ve tur a ni lo, tih rilru hi pu lo hram ang che u.

I nu leh pa chawi­mawi rawh, chuti chuan i tan a ṭha ang a, leiah hian i dam rei bawk ang.