Inren lo V. Ramaswami

Indian Supreme Court judge ni ṭhin V. Ramaswami chanchin leh kan tunlai thil thleng hi a inhmeh riau mai. Amah hi India rama SC judge impeachment motion move khum hmasa ber a ni. SC judge a nih hma hian Chandigarh High Court judge a ni bawk a. Supreme Court-a a kaisan hnu hian Chandigarh-a a lo khawsak tawh dan chuan a rawn ûm zui ta a ni.

Kum 1990 khan Chandigarh HC judge a nih laia a khawsak dan chuan a rawm ûm zui ta a. A quarters chu a chei (renovate) nia insawiin sawrkar sum a lo seng nasa em em mai a, chhui zui a ni ta a ni. A quarters furniture (sofa set, dawhkan, air conditioner pariat, bathroom bungrua, choka bungbel leh inchhung cheina dang tam tak tiamin) Rs 8,00,946 a seng a. A phone bill pawh thla khatah cheng nuai 9.10 laite a ni. Madras-a chawlh hman nan sawrkar motor a keng a, a la hawn leh lo zui a. Assistant Registrar chu thlawhnaa thlawkin car la let leh tur ringawtin a tir bawk.

Hetiang hnu pawr tak a neih avang hian a bân theitu Parliament-ah a chanchin ngaihtuah a ni a, bân tura motion put luh a ni ta hial a. Mahse, amah hi south Indian a nih avangin Congress chuan south lam tihvui hlauvin vote an thlak lo va, bân (impeached) a ni ta lo. Hna pawimawh erawh thawhtir zui a ni ta lo a ni. A khaw lamah chuan a zâm vak lem lo va, a bân hnu hian MP election-ahte a ding a, a chak ta lo thung.

Cheng nuai 8 zet mai mimal quarters cheibawlna atana hman hi Parliament-a mipui house, Lok Sabha-ah meuh bânna motion put luh a nih chhan hi thil pakhat a awm a; corruption anga han charge theih si loh, sawrkar sum ei hek tak si a ni.

Mipui laka mawhphurtu leh mipui rawngbawltute hi an rank a san poh leh an mawhphurna a sang a, entawn tlaka an nun a ṭulzia an tihlanna leh an zilhhauna pakhat a ni. Inrenchem ṭulzia sawi reng sawrkar tan phei chuan hetianga sawrkar sum sêng hiau hiau mai mi an zinga an awm a nih chuan, Indian history aṭanga inzir fing tawh mipui (informed citizen)-te hmai zah vang tal pawh hian inzilhhau ve an ngai mai awm e.

- Frankie Zonunmawia