ZO-FATE INTHLAHCHHAWN DAN (ZOFATE GENEALOGY)

Zoram Thar Zofate Lairelna chuan March 26-28, 2021-ah khawvel pum huap Zofate Haw Runpui leh Hnam Inkhawmpui Thianghlim Thenzawla  neih turin a rel a. Hemi hmalakna kal zelah Hnam Lungphun Zirhona (Seimar) chu Ni 16/10/2020 khan Aijal Club-ah neih a ni. Zofate kum sang chuang kan thlahtu bulbal pawh hre lovin, thlah khat leh hnam khat kan nihna ang pawha awm lovin ṭhendarh leh awpbeh kan ni a. Tunah inpumkhat nan hunbi a kim tawh avangin Hnam Ropuite kan ding chhuak dawn ta. Zofate Hnam lungphunah hian Zova Thlahte Hnam peng hrang aṭanga chi peng hming zawng zawng ziah lan vek tur a ni. He hnam lungphun hmang hian khawvelah Zofate chu thlahtu bul thuhmun (one ancestor) hnam khat (one nation) kan nih kan puang tawh dawn a. Tu'ma ṭhendarh leh awpbeh theih lovin kan insuihkhawm tawh dawn a ni. Zofate Hnam Lungphun hi dik leh kim thei ang bera ziah tur a nih avangin a hnuaia thlahtute chhuina (genealogy) kan ziah sawisel duhte chuan October 2020  thla ral hma ngeiin a hnuaia tarlan Zoram Thar Zofate Lairelna hruaitute hnenah phone emaw ziaka thehluh tur a ni ang.

A chunga kan hmuh ang hian thlahtu bul chu Zo-a a ni a, Zoa fa pathumna Nauchawnga fapa chu Chawngthua leh Ngaihtea an ni. Chawngthua fate aṭangin CHAWNGTHU hnam an lo chhuak. Chawngthua unaupa Ngaihtea fate aṭangin Zomi hnam pengte an lo chhuak bawk. Ngaihtea chuan Thlahpa a hring a, Thlahpa chuan Lamlira a hring a, Lamlira chuan Luseia hringin LUSEI hnam peng an lo awm. Lamlira unau Manmasi thlah aṭangin Hmar hnam peng an lo piang ta a ni. Chawngthua fapa Chawngza-a aṭangin LAI leh MARA hnam peng an lo piang a. An thlah kal zel aṭang hian Bawm leh Pang hnam pengte pawh an tel. Chawngza-a fapa Zahawnga chuan Sektaka leh Thuantaka/Suantaka te a hring a. Sektaka’n Thahdova hringin THAHDO/KUKI hnam peng an lo piang leh ta a. Thahdovan Ralzina a hring a, Ralna a hring leh a, Ralna an Raltea, chuta ṭang chuan RALTE hnam peng an lo piang leh ta a ni. Thuantaka/Suantaka chuan Neihluta a hring a, Neihlutan Genzova a hring a, Genzova chuan Suatea a hring a, Suatea fate atangin VAIPHEI hnam peng an lo piang leh ta a ni. Heng hnam KAKPUI pengte aṭangte hian a zar peng tam tak a lo chhuak zel a. Chung Kakpui aṭanga pengte hming pawh chu kim thei ang berin kan la rawn ziak zel ang. 

ZORAM THAR ZAWLBUK:

CNB C-14, LILY VENG, CHALTLANG, AIZAWL 796012, MIZORAM 

MOBILE PHONE: 8131958421/8794859008

WhatsApp group:

https://chat.whatsapp.com/CaOjl2gUqbi7QcjallmOTV

FACEBOOK:

ZORAM THAR (https://www.facebook.com/groups/967355216617538)

WEBSITE:

zoramthar.wixsite.com/zoramthar