Tunge kan chawimawi?

Kan hma lawkah hian, ‘Tumkau Pathianni’ kan tih, Pam Sunday-in min hmuak leh ta reng mai. Mizote hian kristian kan nih hnu aṭang chuan kum tin deuh thaw, Tumkau Pathianni kan hmang deuh ziah niin a lang. Min Chhandamtu Lal Isua, he khawvela a len laia Jerusalem-a ropui taka chawimawi a nih champha kan lawm ve zel a ni ber ang chu.

Mi tam tak chu a niah kan buai viau mai. Ni e, kum tin mai Isua chawimawini leh thihni te sawn reng mai hi chu a dik bik chiah lo. Keini pawh kan chhungte thihni hi kum tin tidanglamin, hman remchan hun a piangah hmang ringawt ila kan duh bik kher lo maithei! Ṭhenkhat phei chuan kan vawkte lakni nen lam kan chhinchhiah fel thlip thlep a nia.

Mahse, thil hi a khawlkham zawng ringawta thlir leh a dik ber chauh thluk theih loh chin a awm ve tih hriat a ṭha. Isua thihni dik tak leh Jerusalem-a chawimawi a nih ni kha chiang taka hre thei kan la awm em ni? Thil tih dik theih loh leh siam ṭhat vek theih loh chin a awm ve ṭhin - thil ṭha kan tih duhna thinlung hi a pawimawh zawk. Chuvang chuan a ni (day) hi kan buaina ber tur a ni lo; tunge kan chawimawia engtin nge kan chawimawi tih hi a pawimawh zawk.

Tunlaia veng tin/khaw tin deuhthawin Tumkau Pathianni kan hman dan hi veiawm ka ti deuh ṭhin. Ṭhenkhat chuan kan chhut chiang loin eng he-hu-ah kan ngai lo maithei. Tumkau Pathianni a lo thleng a, zing­karah Kohhran naupang leh an zirtirtute chu khawlaiah tumkau kengin, ‘Hosanna! Lalpa hminga lo kal chu fakin awm rawh se…’ tiin an au a; puitling kan tel ngai mang meuh lo! Jerusalem-a an chawimawi lai khan naupang chauh ni lo, puitling nen lam an ni tih kan Bible-ah kan hmu a ni lo’m ni? Engati nge, tuna taka naupang tih tura kan dah tak bik?

Naupangte chu kawngdung suartluanin an theihtawp chhuahin an au a. Kohhran hrang hrang chuan mahni nia kawng kan zawh ṭheuh avangin kawng lakah kan intawk lawi nuai nuai a. Inau­rinsiak emaw an nih ti niawm takin, thawm an inhriat phak deuh apiangin a aia uar zawkin kan au sauh sauh a! Tu nge kan chawimawi kan hre ta lo em ni le? Min hruaitute lah chu fuihpawrhtu emaw tih mai turin an awm lehnghal!

Chhim lam khaw pakhat, Cherhluna kan awm ve lai chuan kohhran lian ber (Baptist) hian naupang zawng zawngte min hruai mai ṭhin. Pawl pawl awm lovin inlungrual takin kan kal ho a, khua kan suartluan ṭhin. Hlim takin Pathian kan fak a, hmun remchang lai an tih apiangah hruaituten thu an sawi a. Tichuan, Baptist Biak Inah lut khawm lehin kan ṭin tawh mai ṭhin.

Khatihlai khan kal duh lohna bik kan neih pawh ka hre lo a, khawchhung kawngah kha chuan kan kal chhuak vek zel ni maiin ka hria. Tunlaiah erawh veng tin deuhthawin kal duh bikna kan nei a, kawngpui dung bak kan zawh duh ta lo! Veng kil deuh leh tlabirh deuh chu kan hrut peih lo a, Pathian kan chawimawi a ni tih pawh veng pumin an hre thei ta lo. Heng zawng zawng ka ngaihtuah hian kan chawimawi ber Pathian hi a lawm lo mai ang tih ka hlau ru ṭhin!

Veng tin/khaw tina koh­hran hrang hrangte hi, kum khatah vawi khat tal chu Pathian kan fakho thei lo em ni? Kan fak Pathian hi pakhat a ni si a, engati nge keini hi kan inpumkhat theih tlat loh? Pathian chu tidarhtu ni loin sengkhawmtu a ni si a.

Tunah hian veng tina koh­hran lian ber hian chapona tel miah loin kohhran dangte hi min han sawmkhawm ngam se, zingkar vawikhat na na na chu Pathian i fakho ang u hmiang. Hmun khata kal dum dum kher ṭul lo kan tih a nih pawhin, hmun khatah chhuak khawmin kalna tur bik insiam ila. Tichuan, hmun khatah bawk intawk khawm leh ila. Chutiang a nih chuan kawng laka intawh nuai nuai leh kal lohna lai bik neih loh a awm lo ang a, kan fak Pathian chu lungruala takin kan fak a ni tih veng daifem zu ngawlvei leh nawhchi zuar chhungkua te pawn an lo hre tawh ang.

‘Hosanna! Lalpa hminga lo kal chu fakin awm rawh se. Ram lo thleng tur kan Pa Davida ram chu chawimawiin awm rawh se; chungnungberah khian, Hosanna!’ tiin i au ang u hmiang.