Mizoramah tunge lal ber?

Mahni tel phak lohna tur committee-a thu ve deuha awmte tluka lal hi an awm theiin ka ring lova, chuvangin Mizorama lal bera ka ngaih chu NGO hi an ni. Sorkar hnathawk ni si an tel phak lohna tura NGO-a an nihna 'angin' an han tel ṭhin chu a ni si a, heng mite hi an lal ber mai.

Minister-te, officer-te hi chu an nihna reng a nih vangin lo inti lal deuh pawh ni se, "An inti lal tak tak a ni," tih bak hi han comment zui ngaihna hi a vang a, NGO lama lal ho hi chu an intih lal poh leh an nuihzatthlak a, an nihna kan hriat kur si avangin kei chu ka nui lo thei lo.

Zirtirtu ni na na na Chief Secretary hova committee-ah NGO-a an nihna vangin an han ṭhu ve kuk a, a zahthlak hian ka ring. Sorkar office-a staff ni si kha an pu-pu-pu lehte level-ah committee-ah NGO representative an han ni daih a, kan ram kal dan hi a mak ve khawp mai. Ṭhenkhatte phei chu zir zawh vek tawh hnua zirlai pawl hruaitu nih vangin Chief Minister hova meeting-ahte an han ṭhu ve kawisawi a, hengte hlei hlei hi anmahni hre chiang tan a nihzatthlak theiin ka ring.

NGO ho titi hi ka hre ve tawh a, thuneitu angin an titi ṭhin a, lal angin an inngai hmiah mai. An duh anga thil a kal loh chuan, "Sorkarah kan thlen ang," an han ti a, an han thlen a, an tihlawhtling leh nge nge ṭhin a, an lal em a sin. Remna Ni hman danah te khan an han lal em em khawp a, YMA-in an han rel phawt a, sorkarah an thlena sorkarin Remna Ni hmanna tur pawisa tam deuh a pe hmiah mai a, sorkar lah an â duh bik der si lova, political party zawng zawng thunsawina hun neihte kha ruling tan chuan advantage lian tak a ni a, hnung thak inhiahtawnna lam rawngkai a ni ta zel em? tihte chu ka hrethiam ve phak lo.

Mizoramah hian NGO hi an lal ber maiin ka hria. A dawtah kohhran, a dawtah sorkar niin ka hria.

- Lalthanmawia