Rangvamual helna siam a ngai
Kum liam ta aṭang khan Rangvamual tawntirhah chatuan leimin, reh mai mai lo tura ngaih a awm a, helai kawng hi kawng pawimawh tak; ei leh bar lakna ber leh Lengpui airport kawng a ni a. A fur a ṭhalin eng lai pawhin JCB-in a vil a ngai a, a mang-anthlak khawp mai.
Sorkar, a bikin PWD lam hian Sa-kawrtuichhun lam cheiṭhatna tur sum hi tihngaihna an hre ngang lo a nih hmel a, Rangvamual helna dang kawngpui a awm si lo. Sakawr-tuichhun kawng lam hi chei ṭhat harsa lutuk lo, kawng ruh awmsa a ni a; civil mi naran tan pawh a harsa em emin kan ring lo hial a nih hi.
Rangvamual leimin reng mai helna tur dang hnaite a awm a, chu chu kan sorkar hruaitute hian ngaihsak hram se a duhawm khawp mai. Chu kawng helna chu Ropaiabawk
aṭanga Rangvamual Ch. Chhunga Truck Terminal bula chhuak tura kawng sial a ni. He kawng hi a awmsa riak ruak a, harsa leh hautak lutuk loin a siam theih ngei a rinawm.
Mizoram kawng-pui hrim hrim hi a chhe hlawm hle mai a, entir nan Lunglei leh Tlabung inkar kawng te, Lengpui leh Mamit inkar kawng te, Tut leh W. Phaileng inkar kawngte hi siamṭhat deuh dan a awm ngeiin a rinawm. PWD lam hian tun aiin ṭan han la deuh se, state sumin engtikawng mahin a daih lo tih chu hriatsa a ni a, central sum hailuh dan thlengin tihdan chu a awm ngei ang.
Tunhnaiah UD&PA changtu Minister Pu Zodin-tluanga leh PWD enkawl puitu Pu Lal-thanzara te'n theihtawp chhuahin Vaivakawnah hmun hnihah kawng siam-
ṭhat hna an thawk a, a lawmawm takzet a ni. Vaivakawn kawn lai taka mimal inhmun sorkarin a lei a, chu chu kawngpuiah siam zauin a thawl phah hle a ni. Vai-vakawnah tho Kanan leh Chawnpui lam panna kawng chho pawh anni pahnih hmalakna-in rawt hniama tihzauh a ni a, a lawmawm khawp mai.
Minister ten an ngaih pawimawh chuan department lam hotute pawh an che vat vat ṭhin a, chutiang bawk chuan Ropaiabawk aṭanga Luangmual Truck Terminal inkar hi ngaih pawimawhah han nei leh ta se harsatna tam tak a su kaw ngei ang. He kawng hi a hnaiin short-cut ṭha tak a ni bawk si a, sum sen a tam em em pawh a rinawm loh. Kan engineer-te hian thluak han hmang deuh teh se.
- Lalhmunsiama