Aia upate zah thiamin

Tun hnaiah Face­book-ah ka beisei loh thu ka hmu ṭeuh mai. Zirlai scholarship pek duh loh vanga Chief Minister Pu Lal Thanhawla demna lam thu ka hmuh nual ka ring a, ka rin loh lam zirlaiten aia upa zahna an tlakchham thu leh mahni ram hruaitu pawh an zah thiam loh thu a ni ta tlat mai.

Thil hi tih nasat tum luatah chet sual a awm thei a, hei hi tun hmaa Mizo upain ṭanulh an tih ang deuh kha a niin ka hria.

Kan zirlai scholar­ship duh tawh lutukte kha an ṭangulh a, an duh aia thui an pên a, chief minieter-te kha misual tawp auhin an au a, ṭawngkam mawi lo zetin an au khum. A tukah kha chuan an la nui deuh dar dar a, a rei tawlh tawlh a, Mizo mi pangngai zia dik tak a lo chhuak a, 'aia upa zahna chang hre lo zirlai' tiin an dem lêt ta hlauh a nih kha.

Tun hma deuh chuan ei leh inah pawh a upa berin bul a ṭan hma chuan naupang zawkin tih khalh loh tur tih a ni a, tun hnaia khawpuia naupang inzirtirna tlanglawn chu bus-a chuan pawhin aia upa chu ṭhutna ken tur tih a ni ṭhin. Aia upa zah tura inzirtirna tam tak a awm a, hengte hian zawm a hlawh tawh lo. Aia upa zahna hi a tlahniam zel a ni.

Sorkarin scholar­ship a pek chhuah loh vangin sorkar hi dem tur a ni a, a mawh­phurtu pa ber chief minister hi a demawm a ni. Zrlai ni ta ila, ka scholarship min hrensak ta se, chief minister-in college zirlaite hmaah scho­larship vanga lehkhazir an nih loh thu min sawi khum se ka thinrim ve viau ang. Ka thinrim avanga ka ṭawngkam leh auhla erawh Mizo tlangvalin aia upa an au khum duh lohna tur chi chu a ni ve lo ang. Kan zirlai changkang, hmasawn, tunlai leh thiamna nei sangte'n aia upa zahna an kawl tel ta lo hi thil pawi tak a ni. Chu chu zirlai kawngzawhah khan a lang chhuak.

Facebook ka thlir a, mimal taka Cong­ress an ni lo tih ka hriat chiante pawhin chief minister an au nawmnah kha an dem thu an ziak. CM au nawmnahtute hian an thil tih pawizia leh zahthlakzia hi an la hre dawn chauh ang. Mizoramin kan duh taka kan thlan tlin a ni a, scholarship an pek chhuah loh vanga a chhe tinreng bel tur a ni lo. A awm danah kan lawm lo a nih pawhin zahna kan lantir thiam tur a ni.

Kan zirlaiten hei hi an zir chhuak lo a nih chuan, an puitlin hunah chuan an thlah­te chuan an au nawmnah nasa tawh hle ang.

Ṭhangtharte hian ngaihthuah chiang se, aia upa zahna tlahniam zelah tu nge mawhphur ang. Politics ka sawi lo. Income certificate lem hmanga scholarship diltu an nih lek phei chuan mahni chief minister pawh zah lotute hi an demawm hle a ni. Opposition party nih vanga aia upa zah lotute ṭan vak pawh a ngai chuang lo. Aia upa zah hi kan zir thar a ngai a ni.