Social media-a thu thehdarhah fimkhur a ṭul
Khawvel changkannain a ken tel smart phone hi mi tinin tunah chuan kan nei ta fur a; internet service lamah pawh nasa takin Mizoramin hmasawnin, ram changkangte ang bawkin internet service chak ṭha kan nei ve ta. Covid hri len hnuah ngat phei chuan internet khawvelin min chiah hneh lehzual a, naupang tê aṭanga rual ûte thlengin smart phone hi kan nunah a bet nghet tawh hle.
Social media pawh hmangtu kan pung zel a, naupang aṭanga kan pi leh pute thleng pawhin kan inawm tleina ber a ni tawh. Social media platform hrang hrang Mizorama kan hman uar heng – Facebook, Youtube, Instagram leh WhatsApp zingah hian WhatsApp hi kan hman nasat ber a nih a rinawm. Social media dang hmang lo pawhin WhatsApp hi chu kan hmang deuh vekin a hriat.
Social media hi a hmang thiam tan chuan thil ṭha tak a nih rualin, a hmang thiam lo tan chuan thil hlauhawm tak a ni thung. A hmang thiam tan chuan eizawnna tling, kan sumdawnna tihlarna ṭha tak, kohhran, khawtlang leh sawrkar pawhin mipui hriat tur thil pawimawh leh thlarau nun châwm thei Pathian thu thlenga thehdarhna hmanraw ṭangkai tak a ni.
Chutihrual chuan, hmang thiam lo fe fe pawh kan la tam hle. Duh duh sawi theihna hmun emaw kan ti a, thu dik leh dik lo pawh thliar hrang loin kan duh duh kan sawiin kan thehdarh chiam chiam mai ṭhin hi chu, kan inzirtir ṭhat kan ngai hle.
Social media-a thu dik lo thehdarh hi dan khap a ni a, jail tân theihna a ni. Tun hnaiah pawh social media-a dâwt hmanga inpuh hmingchhiat avanga jail tâng tate pawh hriat tur an awm ta zeuh zeuh a nih hi. Hetiang thil theng leh ṭhin hi a pawi a; mipuiin fimkhur phah nan hmang ila a lawmawm hle ang. A post siamtu kan nih loh pawhin a thehdarhtu (forward) ringawt kan ni a nih pawhin, dan hnuaiah chuan a post siamtu ang bawkin thiam loh kan chang thei tihte kan hriat a pawimawh. Police lamin awlsam takin fake account neitu te, WhatsApp-a thu post leh forward-tute awlsam takin an chhui chhuak zung zung thei tihte hi hriat a ṭha.
Hei vang hian social media-a kan thu thehdarhte hi fimkhur ila, thu belhchian dâwl lo thehdarh kan sim a ṭul tak zet. Thil dik lo kan enliam chuan a punlun zel ṭhin avangin puh hmingchhiat tuartu (victim)-te pawh hian dawh mai loin dan hmangin hma la zel thei ila, thu dik lo thehdarh hluar lutuk leh social media-a dâwt hmanga kan inbeih chiam chiam ṭhin hi a ziaawm phah ngei ang.
- Mapuii