Political Genius ropui Donald Trump (Republican Party Nominee ni tura a hmanraw chelek fing chu)

Mak tak maiin sumdawng hausa chuan khawvela Democracy ram ropui berah lal ber nih tumin US Presidential candidate a nih tur thu a puang ta mauh mai a. Dollar maktaduai 20 nei chunga a pa Real Estate sumdawnna chhunzawm a, dollar tluklehdingawn lalrama siamtu chuan a tirhah nuihzat a hlawh ngang mai.

Nimahsela, tunah chuan Republican Presidential Nominee History zinga vote la hmu hnem ber lawtlak ni chunga Delegates hmuh ngai zat a nei ta luah mai si a nih hi. Engtin nge hetiang dinhmuna a lo din theih tak mai chu le? Reality TV Star hi engti tiha khawvela ram ropui bera lalber ni tura mipuiten an duh tak êm êm mai ni?

Tunah hian US hian leiba 19,000,000,000 (trillion) dollar a nei mek a, 2-ah a kaisang chho thuai dawn nia sawi a ni. Industrial works tam tak Mexico leh China rama transfer a nih avangin US mi leh sa tam tak hna nei lovin an awm mek a. Obama Care vangin Tax a sang chhova, mi maktaduai 8 chuangin hnathawh lai an nei lo mek a ni. Heng mite tân chuan Donald Trump-a hi chhandamtu angin a rawn inlar ta a ni.

Engtin nge hma a rawn lak?

Get attention : Republican Presidential nominee 17 an awm tih kan hria. A bul ṭan nân ṭawngkam uchuak tak mai hmangin Mexican-ho a han sawisel a. ‘Damdawi ruihtheih an rawn kenglut a, sualna an rawn tipunlun a, pawngsual hmang an ni a, an zinga mi tlemte chu an ṭha mahna, chuvang chuan America ram an rawn luh theih loh nân bang ka siam dawn a ni’ a han ti nghal tawng mai a.

‘Terrorist ho reng reng chu an chhûng-kua thlenga umzuiin an chungah dikna laltiang i lek mai tur a ni. Bomb hmangin ka bei ang a, ka bomd darh vek mai dawn a ni’ tih ang leh ‘Muslim hi khawvela buaina chawkchhuaktu an nih ang chiahin America ram aṭangin ka hnawtchhuak vek ang a, tumah an rawn luh ka remti lovang’ tih ang chi a han sawi hian American mipui tân chuan thlan lal chi ziazang a ni lo, â taka heng thu hi sawiah lo ngai hauh suh ang che, chhan a nei vek a, a chhan avangin tunah chuan hnehtu a nih tak mek hi!

Republican Presidential candidate thlangtu zingah Mexican leh Muslim an tam lohzia i hre chiang lo a ni. President ni tura thlan lal nih tunah rih chuan a tum hauh lo, Republican-ho vote hmuh a tum mai a ni zawk. Chuta tâna pawimawh êm êm mai chu a candidate pui dangte ai zawnga thawm nei lian leh mi hriat hlawh a ni tlat.

Heng thu a han sawi zawh hnu lawk hian dollar tluklehdingawn hnih chuang man hu darkar 24 chhûngin Media Coverage a nei ta nghal pang mai a ni! Nuihzat mai mai chi a ni ta hauh lo mai! Republican Presidential candidate zingah mi pawimawh berah insiam chhovin ngaihven hlawh ber a ni chho ta dawrh mai - khawvel hian Donald Trump a ngaihven lo thei ta lo.

Elimination process: Chutih rual chiah chuan a candidate puite chu a mal beih ta nghauh nghauh a. Scot Adams-a chuan heta a khingpui a beihna hmanrua hi Linguistic Kill-shot tiin a hming a phuahsak nghe nghe a ni. A candidate puite zinga buk rit ber chu Jeb Bush-a a ni a. ‘Kan zinga mi chak lo ber mai chu phat rual lohvin Jeb Bush-a hi a ni’ tiin Jeb Bush-a leh an chhûngkua a han bei ta tak tak mai a! A pa, a unaupa leh a nupuite thlengin a han bei tak tak mai chu, Jeb Bush-a hi a game-ah a hruai lut chiangin a paihthla hneh kher mai.

Jeb Bush-a khan sum tam tak sengin advertisement a han ti a, Donald Trump-a khan pawisa naia khat pawh seng lovin debate an neihnaah Jeb-a kha a hneh lak ta tawp mai a nih kha. An debate kha han ennawn leh chhin teh, khatiang êm êma inhnehlakna kha US Political History-ah hian i hmu ngai hauh lo ang.

A dawt lehah a ṭawngkam uchuak tak mai hmangin Ted Cruz-a a han lehthal leh a! Liar Ted tiin a hming a phuahsak a, Ted Cruz-a hi a hnu lawka mipui a hmachhawn ṭumin Liar Ted tiin an ko dual dual mai nia! ‘A kut dinglamin Bible a keng a, a dah thla zo chiah tihin dawt a sawi leh nghal mai a ni’ tih hmangin Ted Cruz-a hi a ching chau a ni ber! Weak Jeb, Liar Ted tih thumal ringawt hi a thusawina apiangah a sawi ri reng a, chu chu mipuiin an theihnghilh mai mai si lo a ni. Rubio-a pawh a paihthla thuai a nih kha, he a strategy hi kan hrethiam lo mai mai a ni.

Mipui thluak sukna: US Presidential Debate i en ngai a nih chuan an issue pawimawh ber ber chu an economic, defense leh political issue a ni tih i hria ang. Donald Trump-a erawh chuan mak tak maiin Immigration Issue te, Anti-Establishment chungchang te chu issue pawimawh berah a chhuah ta daih a. Heng issue-ah hian a candidate puite hian a ne pawh an ek si lo a ni. Thu mak tak tak a sawi lai hian America ram pumpui hnenah thu a sawi lo, Republican Voters hnenah thu a sawi a ni zawk.

American dik tak: Tunah hian Ame-rican mipui maktaduai 8 chungin an hna an chân! Factory-a hnathawhte chu China, India leh Mexico ramah outsource niin mipui an thinrim lai tak a ni. Chu tak chu Donald Trump-a hian remchangah lain mipui thluak a han su tak tak mai a! Mipuite hian mak tak maiin Politician ho hi an hne a, mahse tihngaihna tak an hre lo.

Politician la ni miah lo a rawn lang ta hlawl mai a, Politician hlunte campaign angin a rawn campaign lova, anni angin thu lah a sawi ve ngai hek lo. Mahse, amah han er pha awm deuh apiang chu a phet thla zung zung a, a game-ah a hruai lut zut zut a, an duh ang sawi thei pakhatmah an awm lo a nih kha.

Hna zawng zawng US lamah a hnuh let tur thu leh US chu hmân anga ram ropuia a siam leh tur thu a han sawi ta a. Donald Trump atân hian amah duhtute chuan tualthah hial an hreh loh thu an sawi kha i lo hmu em!? Amah ṭan laklawh tawh chuan thih huamin an ṭan bur mai a ni. US Republican House Leader mai bakah Dr Ben Carson-a ten an han endorse ta maite hi a mak asin!

A ki a dang ta daih mai: Tunhnaia a thusawi chu a dang ta. Presidential nominee ni tura Delegates a mamawh a hmuh hnuah chuan mi zawng zawng huapin thu a sawi a, a rorum ta hauh lo mai. ‘Western Civilization hi mawi taka a vul a, buaina aia remna hmanga khawtlang nun kaihhruai a nih a, indona aia inngeihna nun tluka duhawm a awm ngai lo. Indona hi a huatawm a, zalenna hnuaia rem taka khawsak tlan chu ka duhdan leh ka thil chak ber a ni’ a ti ta daih mai!

Keini zingah pawh hepa hi chu a mawl, engmah a hre lo tia a chungchang thua kawmen ka chhiar ngei mai. Businessman a nih angin a ngaihtuahna a seng a, a strategy pawh a plan thlap a. Chu chu Politician hlunten an lo la hmelhriat si lova, an chhiat phah ta a nih phawt hi.

US mipui zinga a tam zawk hian sawrkar policy hi an hre lo tih CNN chuan a finfiah tawh a. Khawlaia mi an han kawm a, Donald Trump-a haw hrim hrim an awm a, mahse hna lak let a tumna policy an han hrilh chuan ṭha an ti a. Mahse, amah an huat avangin an vote dawn loh thu an sawi mai mai nia. Chung mite chu Trump-a hian a target lian berte zinga mi an ni.

Hilary Clinton nena an inbeihna chung changah pawh hian sawi tur ngaihnawm a va tam dawn êm!

- Lalremliana Pachuau