Thlanmual i chei zel ang u

Krimas leh kumthar vuakvetah Armed Veng leh Chhinga Veng YMA chuan Dawrpui thlanmual an chei a, sawiseltu leh faktu an kat nuk mai! Armed Vengin thlanmual an chei chu Aizawl Municipal Council-in veng cheimawi berah an thlang nghe nghe a nih kha.

Ni e, a duh tan chuan sawisel a awm tho mai. Mi ṭhenkhat chuan mi vuina an rawn vui pui a, Vanglainiah pawh chhiar turin a awm a nih kha. Armed Vengin thlanmual an chei chinah hian ka pa leh ka u te kan phum ve a, kei chuan kan hmangaih ngawih ngawihte zalna hmun an chei hi pawi tihna ka nei lo. Pawi ka tih loh chhan chu thlanmual an chei loh laia thlanmual hman a nih dan hmu chiangtu ka ni a, he thlanmual cheitu Chhinga Veng leh Armed Veng YMA te hah theihzia mit ngeia hmuhtu ka nih vang a ni.

Chhinga Veng lam chu ka hriatpui thui lo a, Armed Veng YMA-in thlanmual an chei dawn khan, thlan chei theih loha thil an siam hnan tura thlan a awm a nih chuan an chhungte an hrilh hmasa a ni. Hrilh hmaih palh an neih leh neih loh erawh ka hre lo. Mihring rilru leh ngaihdan a inang lo tiin mi pawi sawi hlau takin Armed Veng YMA hian thlanmual hi an chei tih kan hre lo ang tih ka hlau hle.

Armed Venga pianga sei lian ka nih miau avangin, thlanmual an cheiah hian an chei hmain engtin nge mi an khawsak (a bik takin hunpuiah) ṭhin tih ka chiang ve hle. He thlanmualah hian mi hrang hrangin ruihhlo chi hrang hrang tihna hmun atan an hmang a, mipat hmeichhiatna khaw lo taka hmanna atana hmangte pawh an awm ṭhin. Hetiang a nih avang hian hunpui lai ngat phei chuan he thlanmual cheitu Armed Veng leh Chhinga Veng YMA te zan rei pawh sawi loin an duty ṭhin asin.

He thlanmuala an hmangaih takte phumtute pawhin he thlanmual hman a nih ṭhin dan hi an hre ngeiin ka ring... funte bung emaw, ruihhlo tihna hmanrua an hmangaih takte zalna hmuna lo let reng thianfai tawh pawh an awm ṭeuh ngei ang. Chumai a ni lo a, mipat hmeichhiatna an hmang ngei a ni tih finfiahna chhar ṭhin pawh an awm foin ka ring. Chutiang vel chuan a ni he thlanmual hi chei a nih hmain hman a lo nih ṭhin.

Hei mai hi a ni hleinem, miin an hmangaih tak tak kalte hriatrengna atan an hming leh an uina thu an ziahna lo ru tawk pawh an bo lo, chung hunah theihtawp chhuaha rukruk hi a reh theihna atan hma latu chu thlanmual cheitu YMA te tho hi an ni. Hunpui a lo thleng a, an hmangaih kalte zalna hmun chu a mawi lo ang tih hlauin neih thinglung khawngin an chei a, mah se misualin an lo ruk sak loh leh an lo tihchhiat sak fo ṭhin. Chung thilte chu a reh theihna atana tha thawh nasa ber chu YMA te hi an ni.

Krismas leh kumthar a lo thleng dawn a, Armed Veng leh Chhinga Veng YMA chuan kumdanga an tih ngai loh angin thlanmual an chei ta rup mai, hluttu pawh an ngah teh e. Mahse, mihring an thuhmun fo thei lo tih ang deuhin, sawisel phet tum tawk an rawn inlar a, sel theih dan hrang hrang an zawng ruai a ni.

Kum danga ruihhlo tihna hmun leh mipat hmeichhiatna hman khawlohna hmuna chang ṭhinah chuan mi an hlim a, naupang leh kum lamah upa tawh tak takte pawhin hlim takin hun an hmang thei ta. Zanrei pawh sawi loa thlanmual a thianghlim theihna atana duty ṭhin YMA member-te pawhin hlim takin hun an hmang a, kum danga thilsual ti tur veng reng renga khawsa ṭhin kha, mipui hlim taka an awm theihna atan an duty ta zawk. Duty rau rauah a innawm hleih ngawtin ka ring.

Ka hmangaih em em ka pa leh ka u ngei pawh khan an zalna hmun suahsual rawngbawlna atana hman a nih ai kha chuan, mi hlim taka an awm a, rilru sual pu hauh loa an awm kha nuam an ti zawk ngeiin ka ring tlat. Tute'n emaw an tih chhiat emaw, an rukbo mai mai tur aia an zalna hmun chei ai chuan, miin hlim taka hun an hman theihna atana buatsaih a ni kha an lawm zawk ngeiin ka ring lo thei lo.

Ṭhenkhat tan chuan a harsa lo mai thei, keini chhungkua ang tan chuan kan hmangaihte zalna cheina tur ringawt pawh hi hautak tham tak a ni. A nei deuhin sum tam tak senga an chei lai a, ṭhing taka an awm kan phal bik si lo. Miin an ru dawn em? An tichhe leh a ngem? tih pawh hre loin, neih ang angin kan han chei ve ṭhin kha a nia... ngaihtuah ruk ang ngeiin ni hnih thum vela kan cheina a lo chhe leh mai mai kha chu a rilru nat thlak tak zet zet a ni.

Kuminah chuan YMA te'n an chei a, mawi bik leh nalh bik a awm tawh lo. Keini ang duang tan chuan a va han lawmawm em... Mi lian leh mite awm tawh lohna hmuna cheng tawh, intluk tlang taka leng dial dial kan hmangaihte pawh khi an lawmve ngeiin ka ring. Chuvangin, thlanmual hi hunpui lo thleng leh turah pawh chei zel ka rawt lo thei lo.