Aizawl traffic leh lirthei khalh

Aizawl khawpui a ṭhang zel a, mihring leh lirthei chhun leh zana chhuakvâk khawi hmunah pawh an tam tial tial. Hengte avang hian mi dang ngaihchan thiam leh hawihhawm a pawimawh tial tial ve bawk.

Lirthei a tam tial tial a, lirthei che vel a tâwt zual zel. Hei vang hian mi tinin hawihhawmna kan zir thar a, mi dang kan ngaihchan thiam zual zel a ngai. A bik takin lirthei khalhtute'n hawihhawm i zir thar teh ang u. Motor khalhna stearing leh handle kan vawn chiaha 'chapona rau' kan chan ṭhin hi i paih ang u.

Motor kan khalh hian chuhhelh lutuk bik i ni lo ang u. Motor khalhtu zinga chuhhelh ve lo leh mi dang ngaichâng thiam takte avangin kan la buai tam lo zawk mai mai a ni; chuhhelh vek phei ila chu kan buai ngawt ang. Ruaiṭhehnaah emaw, thil dangah emaw pawh ni se, intlar ngai ang chi-ah hian Mizote hi kan hawihhawm tlangpui a, kan chuhhelh lem lo; mi dang kan kian zawk ṭhin. Chu zia, ṭha leh mawi tak mai chu motor kan khalh lai pawh hian vawng nung zel ila a va ṭha dawn em!

Lirthei ke hnih nei khalhtute mawlh mai hian hawihhawmna an zir a ngai a, mi dang ngaichang thiam tura inzir an mamawh. Lirthei ke li nei chi intlar thliai thliai sirah two wheeler an tlân a, chu chu hnam dang media-te pawhin media-ahte an tarlang ṭhin a; chuvang chuan Mizo mipui kan lawm a, hnam dang lakah kan inchhuang hial a ni. Chutih karah chuan two wheeler zinga che mawi lo zual tam tak an awm; an zaktheilo bik ṭhin.

Hmaa lirthei tlan a ding a, a din chhan ngaihtuah map loa tlan pelh nghal tum mai tam tak an awm, chung mite chuan traffic jam an tizual ṭhin. Hmaa mite an dinin, eng vanga ding nge, tlan pelh nghal mai chi a ni em, tihte i ngaihtuah hmasa ang u.

A tlangpuia lakin two wheeler zingah pawh two wheeler taxi-te hi an 'polite' lo zual. Two wheeler tlanna lane-a tlan mai loa four wheeler intlar karah awm a awm zeuha lut, two wheeler lane-a let leh, lêu tawn chhen ṭhin two wheeler taxi zingah an tam. Sim a ṭha. Two wheeler taxi khalh vanga mâwl hûih bik loh tur, hawihhawm tum ve tur, mi dang ngaihchan ve ṭhin tur. Pawl ang pawhin lo inzilh/infuih nasa lehzual se a ṭha hle ang.

- Zoramchhana