A MAWI LO

Mihring hriatna leh thiamna a pun ang zelin kan khawsak dan leh kan nun phung, kan inchei dan leh kan chezia ten hma a sawn ve zel a. A thei faten thawmhnaw nalh tak tak an hak chhuah laia mahni neih ang tawk hak chhuah chu zahthlak kan ti a, ṭhing bik kan inti ṭhin ṭhalai tam takten thil mawi leh zahawm kan hriat loh vang a ni.

Miten min chung en se tih kan duh luat avang tein mi dang bulah an insawi a, an hawi chapo vah zel. Chutiang ang thu belhchian dawl lo sawi chu a zahthlak a, lan chhuah hun a nei ngei ngei ṭhin. Miten min hriat chian hnu chuan engah mah min ngai tawh lo tih hriat a ṭha.

An chhungkaw dinhmun leh nihna ka hriat chian ve deuh deuh kan vengah hian mahni insawi thei deuh leh hniak phawi loa dawt sawi thei pathum vel an awm a, midangte ngaihsan leh zah an hlawh lem lo khawp mai. Thu dik tak pawh sawi ve mah se an thu sawi chu dawt tel vek turah kan ngai a, chaw tak khuka khuk pui chiah kan ngai lo. Chutiang anga miten min en mai loh nan chuan dawt sawi i ching lo ang u.

Facebook, what­sapp, twitter etc, khawiha online reng mai te pawh hi thil mawi tak leh nalh tak a ni lem lo. Zing thawh hlim aṭanga pro picture thlak zut zut mai te hi a zahthlak a ni. Hnathawh hun laia online reng mai te hi a zahthlak. Hnathawh tur kan nei lem lova, hna kan thawk lem lo a nih pawn nileng lenga fb, whatsapp etc, khawih hi zawng thil ṭha tak a ni thei lo hrim hrim.

Tlawmngaih loh lutukte leh uikawm viau te, mahni thu duh viau te, ṭha ber anga inngaih te, zawm pawh tum hawt si loa midang tana thu ṭha tak tak sawi fo te, mahni dik lohna leh fel lohna hre duh si loa hmu duh si loa midangte tlin lohna leh ṭhat lohna hmuh theih viau te, mi sawisel leh rel chin te, midang thil tih ṭhat hre duh hauh loa an thil tihsual leh tih dik loh hriat theih em em te, midang hmuha lan ṭhat tum luat avanga an tih ṭhat te lam aia an tih dik loh sawi chhuah fo te, mi thusawi laia lo inrawlh ve sek te, biakina pawnfen chhing tak tak fen te leh kekawr dawr fual tak tak, kawr lian tak tak hak te, aia upa zahna chang hriat loh te, hotute thu awina chang hriat lohte hi thil mawi tak leh nalh tak a ni lo.